7 verschideni Blau

Die letschte drü Tag hani in Bacalar verbracht adr Laguna de los 7 colores. Si heisst eso, wiu si so viel verschideni Blautön het.

Dr erst Tag hani nid viel gmacht, i bi fasch dr ganz Tag im Hostel gsi. Am spätere Nami hani de no dr chli Ort erkundet u probiert zu dere Lagune zuechecho. Ds isch gar nid so eifach, da vieles vo Hotels oder Restaurants verbout isch u es git nume es paar Stääge, wome gratis zueche cha. Es paar wenigi Föteli hani chönne mache, aber natürlech gseht me dert druf niemaus die viele Farbe wies in echt het. Am Abe bini de mit dr Marian (oder Marianne?, si isch schliesslich vo Frankrich) ga e Abeschwumm näh. I teile mer z Zimmer mit ihre im Hostel. Es isch oh hie Nebesaison, es het weni Lüt u ds macht aus e chli familiärer.

Am nächste Morge simer de zäme mit de Velos zur Cenote Azul gfahre. Die Cenote isch nid so deckt gsi wie die letschti u het meh am ne See gliche. Z Wasser isch aber chli chüeler aus das vor Lagune und es isch super gsi zum abchüele. Mir hei üs e gmüetleche Tag gmacht, bädelet u viu plöiderlet.

Dä Morge bini de no ga dr Sunneufgang aluege u ds isch würklech e sehr schöni Stimmig gsi u zudem bini dert oh fasch allei gsi.

I ha in Bacalar mega guet chönne abefahre u chli si. Es isch mega zfride gsi dert u es het sehr guet tah. Schliesslech sötti ja de chli erhout zrugg cho, süsch ghöri de ume es "aber iz hesch doch gad 5 Monet Ferie gha"...Read more