Viva México!

Dä Morge bini früeh uf u ha in Playa del Carmen gseh dr Tag erwache. I has ume chli gmüetlech gnoh u bi de am Vormittag chli düre Ort spaziert. Playa del Carmen isch e absolute Touristeort mit vielne Shops, Restaurants und Bars. I bi ar Houpsstrass ir nechi vom Strand entlang gschlenderet u chli dür d Lädeli gange. Z coole isch, dases e Fuessgängerzone isch, ohni Outos u ds machts mega agnähm. Trotzdem hanis nid dr schönst Ort gfunde u es isch mer, im Verglich zu Bacalar vorher, oh gad chli z lebendig.

Hüt fiiret Mexiko übrigens no ihre Unabhängigkeitstag. Eigentlech isch dä am 16. September, aber e Mitarbeiterin vome Hostel hetmer verzeut, dass Anno 19irgendöpis e Präsident het gfunde, ds wird iz gänderet. Dä Präsi het nämlech am 15. September Geburi u befunde, me chönnt ja ab sofort beides a eim Tag fiire. Sit denn fiiret Mexiko scho am 15. September. I hät no chönne mit mine Zimmerkolleginne usegah, die Fiir ga aluege, aber i bi zu müed gsi u drum früeh ga schlafe. Am 16. am Morge isch de no sone Parade dür d Stadt gloffe, genau denn woni mis zmorge ha wöue ga choufe. I ha auso trotzdem no chli öpis vom Nationalfiirtag mitübercho.Read more