Es neus Gfährt für 4 Wuche

Mir hei wunderbar gnächtiget i üsne grosse Bett u si früeh uf zum zmörgele. Churz drufabe simer vome Shuttle abghout worde, wo üs het zur Vermietstation vom Camper gfahre.

Dert acho heimer paar Zettle dörfe unterschriebe, viel Infos übercho u e längi Ifüehrig gha über d Funktione. Mir hei beidi chli respäkt sones grosses Gfährt zfahre. D Sandra het die erste paar Kilometer de uf sech gnoh u schnell gmerkt, das es gar nid so schlimm isch.
Zersch simer e grössere Ichouf ga mache, hei öpis zMittag gässe u ner simer witergfahre zu üsem erste Campingplatz.
Us dem Ort use heimer gad e rechte Stou verwütscht u hei dür ds e Stund länger gha. Guet heimer üs vorgnoh nid au zu wit zfahre u dür ds simer doch no bezitte z Hope acho, wo üse erst Camping isch.

Hie heimer de afa üse Camper richtig irichte, hei üs vertrout gmacht mit auem u z erste zNacht kochet. Es isch schön gsi wider mau säuber zchöcherle u nid immer müesse es Restaurant sueche. Dr Abe isch dür das schnäu verbigange u bis mer z Bett hei zwäg gha isch de oh recht spät gsi. Morn wird de afa eis uspfuset..Read more