Es glösts Problem u neui Bekanntschafte

Wägem Wasserleck simer dä Morge no mau zrugg uf Kelowna gfahre ine Werkstatt. Dert heimer öpe 1,5h gwartet bis sie ds Rohr hei chönne flicke. Ir Zwüschezit heimer dusse gsünnelet u telefoniert. Wos du isch witer gange simer hurti ga zMittag choufe u hei üs ufe Retourwäg gmacht. Unterwegs isch üs i Sinn cho, das mer ja e Camper hei u chöi esse wo mer wei... Drum simer spontan a Wood Lake ufne Parkplatz, hei dert gässe u chillet. Am spätere Nami simer zrugg uf Vernon ufe Camping u vo dert us no zu de BX Wasserfäll gspaziert. Die si allerdings nume so haubbeidruckend gsi. Dr Abe heimer mit Spieli spile verbracht.

Dr nächt Tag het ume chli früecher gstartet. Hüt fahre mer ume witer richtig Revelstoke. Am Mara Lake heimer es churzes Pöiseli am See gmacht bevor mer si witergfahre. Unterwegs simer no ime grössere Stou cho. Si hei d Strass 2h gsperrt gha wäge Bouarbeite u mir hei drum dert gueti 30 Minute gwartet ufem Highway. Mir si aber de no mit zwone Damene, dr Susan u dr Lindsay, iz Gspräch cho. So Begägnige si immer mega schön u si hei u Freud gha das mer Kanada für üsi Reis hei usgwählt gha. ZWarte isch dür ds oh sehr Churzwilig gsi.

Wos du isch witergange simer direkt uf Revelstoke gfahre u hei bim Camping icheckt. Si hei hüt Saisonbeginn u mir si quasi die erste gsi ufem Platz. Z Revelstoke isch hüt mega warm gsi u wiu mer no so viu Zit hei gha, simer no zStädtli ga erkunde. Hie bliebe mer e paar Täg u es git de sicher no einiges zBrichte.Read more