Wandere u Skispringe

Da am Fritig nomau schön Wätter gmäudet isch, heimer ds gnützt zum e Wanderig mache im Mount Revelstoke Nationalpark. Zersch heimer sone Trail gmacht im Wald inne wo öpe 1,5 Stund isch gange. Es isch sehr ä eifache Wäg gsi mit Infotafele zu de verschiedene Böim.

Zrugg bim Parkplatz heimer entschiede no gad chli meh zloufe u drum simer no zum Nels Nelson Ski Jump ufegloffe. Dert ufe ischs zwar nid lang gange, aber derfür stotzig. Ds het üs gad guet tah ume mau so zbewege. Revelstoke isch vor öpe 100 Jahr sehr bekannt gsi für Skispringe. Dä Wäg beschriebt die Gschicht vom Skispringe sehr guet u me gseht oh d Rampine no wosi denn brucht hei u zoberst isch oh no sone Art Figur vome cha dristah und sech wine Skispringerin füehle. DMichelle het ds ungloublech faszinierend gfunde u isch sehr beidruckt gsi. Vorauem vor Isabel Coursier, si isch vor 100 Jahr vo dere Schanze gumpet mit damals 16i u isch die ersti Frou, wo e Rekord im Skispringe broche het. Sie isch oh die ersti Frou, wo allei gumpet isch und in Hose (dennzumau hei Froue nume in Begleiting vo Manne und in Röck dörfe gumpe u d Isabel het eifach so denkt: "ja fuck it i maches allei"). Dr letscht Wettkampf uf dere Schanze het 1975 stattgfunde.

Nachem wandere simer no hurti üsi Füess im Columbia River ga dünkle u dr Abe heimer när miteme Füürli la usklinge.

Dr Samschtig isch e gmüetleche Tag gsi. Es het dr ganz Tag grägnet u mir hei die Zit gnützt zum telefoniere, wäsche, plane u zum käfele im härzige Kafi nebem Camping.Read more