Ä Tag für üs Allini & ä Rägätag

Am Sunntig het jedes vo üs dr Tag allini verbracht, da d‘Michelle Bewärbigä het müessä schriibä. So isch d‘Michelle am Sunntigmorgä uf Banff i näs Kaffi ga telefonierä, Bewärbigä schriibä & no chli ga Lädelä. D‘Sandra het dr Tag gmüetlech im Camper mit em nä Z‘morgä gstartet & het ds Motoräöl vom Camper kontrolliert, da mir scho 1‘500 km zrugg gliit hii.
Dr Tag isch när wiitergangä mit zwünä Telefonat id Schwiiz.🥰
Da ds Wätter rächt fründlech isch gsii, isch d‘Sandra när mit em Camper no zum Lake Minnewanka gfahrä & isch öpä 1h zur Stewart Canyon Bridge glofä. Dr See & d‘Brügg isch mega iidrücklech gsii & ha d‘Rueh sehr gnossä. Ungerwägs hani ono ä alleinreisendi troffä & so hii mir no zämä Fotos gmacht. Äs Streifenhörnchen het mir bim Z‘mittag no Gsellschaft gleischtet.🤩
Ig ha mi när wiedr ufä Wäg zrugg nach Banff gmacht, da d‘Michelle fertig isch gsi mit ihrnä Sachä. Mir hii üs ufem Campingplatz wiedr troffä & hii zämä äs feins Curry kochet. Da mir rächt früech gässä hii gha, siimer när no spontan zu dä Hot Springs dd Banff ga bädelä. Ds Wasser (40 Grad) isch sehr warm gsii & si nid mega lang dinnä gsii. Äs het mega guuet da & hi när natürlech no gd chönä Duschä, da mir ufem Camping ke Duschi hii gha, isch ds für üs gd gäbig gangä. Nach däm entspanntä Bad sii mir när wiedr zrugg ufä Campingplatz & si glii mau ga pfuusä.

Am Mäntig hii mir sit langem so ä richtigä grusigä Rägätag gha.🌧️ Mir hii dä Tag mit em nä Brunch im Camper gstartet & hii drzue mit ärä Kollegin ir Schwiiz telefoniert.
Dr Räschtä vom Tag hii mir mit Läsä verbracht & si när am Namittag no ids Stedtli. Mir sii dert no ga Käffelä, dür div. Ladä & hi hiä & da öpis iikuft. Äs het überau so schöni Sachä gha.🙈 Im speterä Nami sii mir no i diä Bar wo mir scho am Samschtig si gsii & hi dert äs Apero gno & drzue sehr lang zämä plöiderlet.
Zrugg ufem Camping hii mir no kochet & dr nächscht Tag planet.
Igentlech hättä mir früech söuä ga liigä, da mir am nächschtä Tag am 6ii hi uf müessä.😅🫣
Mir hi när no d‘Idee gha ä Fiumabä z‘machä & so hi mir üs so guuet wiä‘s giit iikuschlet & dr Abä gmüetlech mit Twilight lah usklingä. 😁 Us däm Grund siimer när sehr spät ga liigä & isch ä sehr churzi Nacht wordä..😅Baca selengkapnya