schöni Ussicht uf Banff

Gester si mir rächt spät vom Camping ufbrochä. Üses erschtä Ziel isch d‘Banff Gondola gsii. Mir hi dert ä Momänt müessä ahstah für uf d’Gondlä, abr d‘Zyt isch schnäu verbi gangä, da mir no is Souvenirlädeli sii. Mir si sehr fründlech bedient wordä u hii när i näs 4er Gondeli dörfä iistiigä. Dobä ufem Bärg achoo, Mount Sulphur 2451 Meter über Meer, hi mir ä wunderschöni Ussicht uf Banff chönä gniessä.🤩 Äs het sehr viu Lüt dobä gha. Ufem Gipfu git no ä Wäg (Houzstäg mit Gländer) zurä Hüttä uechä, diä Hüttä isch früecher aus Wätterbeobachtigspunkt bruucht wordä. Mir hi no äs Momäntli dä schön Usblick gnossä u si du när gli wiedr mit dr Gondlä achä. Mit em Camper hii mir när ä Parkplatz gsuecht, für ids Stedtli öpis ga z‘ässä. Isch nämlech mängisch gar nid so iifach, i däm grossä Dorf ä Parkplatz für üses Gfährt z‘fingä.😆
Nach Poutine, (Pommes arä Bratäsauce mit Chäs überbachä) Milchshake & Süesshärdöpfu ässä sii mir mit em Camper ca. 30 Minute wiiters gfahrä zum Johnston Canyon. Dert si mir när 1h am Fluss nah dürä Waud glofä & hii dä schön Canyon chönä ahluegä & bestuunä. Oh hiä hets sehr viu Lüt gha. Dr Wäg isch rächt eifach gsi zum loufä. Ungerwägs si mir no Züügä wordä, wiä ä sehr trocheni Tannä um isch & zersplitteret isch, hi zersch gd nid so gwüsst was da itz gnau passiert isch.🙈
Nach därä Wanderig si mir umä zrugg nach Banff no ga iichufä für diä nächschtä 2-3 Täg. Mir si sehr spät ufem Camping achoo & hi drum eifach no äs Müesli gässä, nach däm defftigä Z‘mittag.😅Leggi altro