MIR HEI BÄRE GSEH...

... oder emu d Sandra. D Michelle het müesse Outofahre... aber eis nachem andere.

Da mir uf dem einte Camping z Valemoumt nid wohl si gsi, heimer beschlosse e Tag früecher abzreise. Mir si de die längi Strecki uf Clearwater gfahre u dert afa mau ines Kafi. Unterwegs hets nämlech nid so viu gha u drum simer gad düre gfahre. Ufem Weg dert here het d Sandra ir nechi vor Strass Bäre gseh. Mir hei ner no kehrt u si zrugg gfahre, aber leider sisi scho ume weg gsi. Drum ha ig nüt vo de Bäre gha, aber ja für aui wo iz immer gfragt hei: es het hie Bäre u ja öper vo üs het se endlech gseh (ohni Bewisfoto haut, sorry).

Vo Clearwater us simer när no im Wells Gray Provincial Park richtig Helmcken Falls gfahre. Ds hei üs dr David u dr Adi (womer z Jasper hei troffe) empfohle. Die Wasserfäll si praktisch nebem Parkplatz, aber würklech beidruckend. Mir hei dert no üses zMittag gässe u ner no mega lang d Ussicht gnosse u am tosende Wasser zuegluegt. När isches de oh scho Zit gsi zum Camping zfahre u mir hei dr Abe dert la usklinge.

Füre nächst Tag heimer nid viu plant gha, das wider dr ganz Tag het Räge gmäudet. Mir hei am Morge no mit üsne liebe Fründe telefoniert u ner afa e Wösch übertue. Ds coole a dem Camping isch, das es e Turnhaue het u für das mer üs no chli bewegt hei, simer de e Stund dert ine chli ga töggele, basketbäuele, fäderbäuele u hockeyle. Nachdem mer üs hei chönne ustobe simer uf Clearwater iz Städtli zu Tim Hortons öpis ga näh u ga ichoufe. Zwüsch düre het doch mau no d Sunne möge füre drücke, aber es isch sehr abwechsligsrich gsi u het immer wider grägnet. Iz höckle mer ume im Camper bereite üs uf ne läääängi Fahrt vor morn.Leggi altro