dr ganz Tag ungerwägs

Gester Morgä het üsä Wecker sehr früeh glütet & mir si när pünktlech am 8i abgfahrä. Mir hii hüt ä wiiti Reis vor üs. Mir wii hüt über Kamloops nach Whistler fahrä, ds si ca. 440km & 6Std. reini Fahrzyt. Äs isch wiedr ä sehr abwächsligsriichi Strecki gsii & hiiä und da mau ä Haut gmacht für öpis ah z‘luegä. Üsi erschti Pousä hii mir ds Kamloops gmacht & si dert hurti i näs Kaffi.
Mir sii när wiiters gfahrä. Dr Highway isch sehr kurvig gsii & äs isch immer wiedr obsi & nidsii gangä. D‘Landschaft isch zum Teil rächt karg & steiinig gsii & när wiedr sehr grüüen. Mir hii ungerwägs wättertechnisch wiedr aues gseh gha. Ds Lillooet si mir de i näs Pub ga z‘mittag ässä. Mir hii mit fahrä immer chli abgwächslet, so das jedes Landschaft o chli het chönä gniessä.
Mi hets mega fasziniert gha, ds mir mau o ä chlini Iiblick i diä kanadischi Landwirtschaft hii gseh. Hiä mau ä Farm, da mau ä Traktor, hiä mau chli Tier…abr leidr hiimer hüt ke Bär gseh🙈
Nachärä längä & kurväriichä Strecki hii mir nach 9h dr Campingplatz in Whistler erreicht.
Mir sii üs dert ga ahmäudä & si zu üsem Platz gfahrä. Ds hiä isch scho üsä letscht Campingplatz uf üserä Reis, bevor dases am Firitgmorgä mit em Camper umä zrugg nach Vancouver giit.
Da mir zimlech müed si gsii, simer ändlech wiedr mau ga Duschä & hii üs no Räschtä vom Vorabä gwermt & si när gli mau ga pfuusä..

Hüt Morgä hii mir uspfuuset, das immer no am rägnä isch gsi. D‘Sandra het vorem ufstah no mit dä Euterä telefoniert. Mir hi när üses z‘morgä gmacht & ufs Mau het dr Rägä chli nah glah & d‘Sünneli het chli afa schiinä.
Hüt sii mir mit em Camper ids Stedtli gfahrä & si üs ga informierä was aus offä het & was nid. Ds Whistler het nämlech gester d‘Skisaison gändet & drum hii no nid aui Gondlä offä. Mir si no chli dür ds schönä Stedtli glofä & si chli ga lädelä. Ufs mau isches wiedr mega cho Rägnä & so si mir fein ga Käffelä. Mir hi üsä Rundgang no fertig gmacht & hi no zwü drü Sachä fürs chochä müessä ga iichufä. Mir müessä langsam üsi Läbensmittu ufbruchä & müessä ufpassä ds mir nüme z‘viu iichufä..😅
D‘Sandra isch vo däm Supermarkt hin & weg gsii, da dr Ladä mega schön iigrichtet isch gsii.
Nach üsem Iichuf siimer zrugg uf üsä Camping & hi dr Mittwuch & Donnschtig afa planä. Am Abä hii mir öpis feins köcherlet & si no chli überä Campingplatz spatziert.Baca lagi