Whistler mit em Bike erchundä

Mir si hüt vorem Wecker wach gsi & si när gmüetlech i Tag gstartet. Bim Ufstah hii mir no dr Liveticker vor Schwiizer Hockey Mannschaft mitverfougt, da mir ds Kanada sii, chü mir leidr dr Match nid live luegä…
Nachdäm mir üses Z‘morgä (isch hüt erspärlech usgfauä, da mir morn dr Camper müessä ab gäh) & Sandwich gmacht hii, si mir ds Fuess bi wunderschönem Wätter zur Bushautsteu glofä. Ds Whistler hii mir när ä Bikevermietstation ufgsuecht & zwü Bike‘s gmietet. Mir si hüt am Valley Trail gfougt & hii so Whistler chönä entdeckä. Dr Trail isch sehr abwächsligsrich gsii, mau dürä Waud, mau ufem Highway, uf Grien & natürlech immer wiedr chli obsi & nitzig..😉
Am Green Lake hii mir de bi Sunnäschyn üses Sandwich ghabberet & si när wiedr zrugg id Stadt ga d‘Bikes zrugg gä.
Da mir mau nid mit em Camper hiä sii & niemer vo üs het müessä fahrä, siimer no äs Bier ga ha & hi üs no ä Portion Poutine gönnt.
Gli druf abä si mir mit em Bus wiedr zrugg ufä Camping. Da mir morn dr Camper spetischtens am haubi 12i in Vancouver müessä abgäh, hii mir de afa packä & üser Sachä im Camper afa zämä packä. Mir hi no d‘Routä vo morn besprochä & si de gli mau ga pfuusä, das morn Morgä früeh tagwach giit, damit mir no müglechscht viu chü gseh ungerwägs & hiä & da no chü stiiu ha, bevor mir de schwärendshärzä üses Daheim (nach 3.5 Wuchä isch üs ds Camperläbä scho chli ads Härz gwachsä) müessä abgäh.
Drum fröiiä mir üs sehr, morn no mau ä Strecki vo guuet 150km mit em Camper dörfä z‘fahrä.😁Leer más