Vo Zugwracks zu schöne Wasserfäll

Mir hei wider mau z Bedürfnis gha üs zbewege u drum dUmgäbig vo Whistler mit üsne Füess afa entdecke. Am Morge simer richtig Function Junction gfahre u hei dert dr Train Wreck Trail gmacht. Dä füehrt zu so alte Isebahnwäge wosi dert hei la si nachdem si vor paar Jahrzehnt si verunfallt. Me louft es paar Minute häre, gseht Isebahnwäge u viu meh eigentlech nid. D Wäge si aber vou versprayt mit Graffiti u gseh drum recht cool us. Nachdem mer dert üsi Föteli hei gmacht simer no am Fluss entlang ufem Wanderweg ufegloffe. Dä Wäg muess me mängisch chli sueche u füehrt über Stock u Stei. Irgendwenn simer zum Cheakamus River Wasserfall cho, was recht cool isch gsi. Dr Wäg womer druf si gloffe wird oh vo Biker brucht u drum heimer öpe die no Bikes oder Wanderer atroffe.

Da mer schneller si gsi mit dere Wanderig aus gmeint, heimer üses Sandwich bim Camper gässe u ner no d Mittagssunne gnosse vorus. Nachem Mittag isch z obligatorische Kafi nache gsi u de simer am Nami oh scho ume zrugg uf Whistler gfahre.

In Whistler heimer no zum Lost Lake wöue. Am Afang hei mer üs e chli schwer tah mit Parkplätz, wiu mir hei ersch dert gmerkt das me gar nid darf parkiere bim See, obwous e Parkplatz het. Mir hei dr Camper de ir Stadt häregsteut u si vo dert zum Lost Lake gloffe u hei dRueh gnosse, gläse und üs ab ere Gruppe Asiate amüsiert, wo hei es Fotoshooting gmacht.

Zrugg ufem Camping heimer dr Abe mit Läse ar Sunne u ner eme guete zNacht la usklinge. Morn isch scho üse letscht Tag zWhistler u oh dr letscht mitem Camper...Leggi altro