Stadtbesichtigung Lima

Hüt Morge simmer am nüüni im Hotel abgholt worde für e Stadtbesichtigung. Zäme miteme andere Päärli simmer vo oisere Reiseleiteri, de Beatrix und em Pedro, oisem Chauffeur umegfahre worde. Nachem Bsuech vo de Katakombe i de Basilica San Francisco (kei Fotis erlaubt) simmer in e Jesus-Prozession innechoo. Es hät unglaublich vill Lüüt ghaa, wo uf die Prozession gwarted händ. Die mega friedlichi Atmosphäre mit Gsang und Füürwerk isch ois recht iigfahre und isch sehr faszinierend gsii. Zum Abschluss simmer no is Larco Museum gange, wo oisi Reiseleiteri recht vill vode Gschicht vo Peru verzellt hät (quint Essenz: Inkas sind di Böse gsii!). Nei, sie häts guet gmacht, es isch eifach am Schluss chli lang gange.
Jetzt sammled mir ois schnäll, denn gömmer no uf eigeni Fuscht go e Archeologischi Site go aagüxle. Am Abig gömmer mit de Diana und em Holger (em dütsche Päärli) go Znacht ässe...

Nachtrag: mir sind etz tatsächlich no bim Mateo Salado gsii. Das isch e Pyramide us Lehmklötzli. Die händ sicher lang Lehmklötzli gformt ghaa 🙈
Es hät sich aber sehr glohnt....

Im Aaschluss hämmer ois mit de Diana und em Holger zum Nachtässe troffe. Wow. So fein hämmer gässe und de Abig isch würkli lässig gsii.
Morn gahts ganz früeh uf de Flughafe Richtig Arequipa, mir sind gspannt, wie mir die Höhedifferenz verträged (2300 m)... Scho mal es erschts aaklimatisiere...
Und natürlich nähmed mir oisi noiä dütsche Fründe au mit (oder sie ois...)!Читать далее