Arequipa 🤩

So e scharmanti Stadt uf 2400 Meter obe. Di ganzi Atmosphäre isch eifach chillt, schön und sehr suuber. Imene authentische Patio hämmer es Lokals Bier 🍻 und Causa Limeña (öppis Härdöpfeligs) ghaa.

Jetzt gahts uf e Stadtrundfahrt. Leider hämmer nume ein Tag daa...

Die Stadt isch ächt superschön. Mir händ no es paar Chile gseh, aber am interessantischte isch definitiv "Monasterio Santa Catalyna", es Kloster zmitzt ide Stadt. Und zwar so uufbaut wie e Stadt im Kloster. Wunder, wunder, wunderschön! Zum Glück hät ois de Holger chli zwunge, zum das go aaluege. Mir andere wäred nämli parat für es Aperöli gsii und händ welle di letschti Station vode Stadtfüehrig skippe. Aaaaber: mir händs de ganzi Abig no müesse ghöre vom Holger (und wahrschinlich au no de Rescht vode Reis), dass mir das nume ihm z'verdankä händ!
Am Abig simmer i dere schöne Stadt no umegspatziert und händ fein Znacht gässe.
Definitiv e faszinierendi Stadt. Morn morge gahts wiiter is Colca Tal. Chli lang Bus fahre (4 Stund), aber es isch en bequeme Bus... händs gseit!Leia mais