Lem's Bungalows, Sogndal☕️🏔🍜🍹

Hüt am Morge simer zimmlech erhout öppe am 9ni ufgstange. Mir hei afe eis es Kafi, respektiv es Schwarztee, dusse ufder Houzterrasse zuenis gnoh. När heimer afah ds Zmorge zwägmache. Es Hammerzmorge, Rüerei, Späck, Chäs, Ufschnitt, Cherrytomätli, Nutella etc. etc., haut aus wos bruucht. Es isch haut scho schön... irgendwo ds Norwege ufere Terrasse mit Blick ufe Fjord mit dim Schätzeli ds säuber zwäggmachte Zmorge näh. Es isch zwar när no chli cho lufte, aber ds isch üs gloub grad gliich gsi.
Nachem Abwasch heimer när no chli plegeret u beredt wasmer itz mit däm ahbrochne hütige Tag wei ahfah. Ds Wätter het nid grad so wunderprächtig wöue, u mir si beidi grad nid bereit gsi e u längi Wanderig ds mache, so heimernis beschlosse zum "Nigardsbreen" (e Zunge vom grösste Gletscher vo Europa) ds gah. Ouso grad ganz drahärä chame scho nid fahre. Aber immerhin chame dürnes chliises Mautsträssli bis uf ca. 3km drahäräfahre. Mi louft ca. 2km am Gletscherseeli entlang, wome ds Ändi vom Gletscher afe so chli erblickt. När geitz über Steine u Felse dürne ahzeichneti Route ueche bis fasch ah Gletscher härä. Sehr ihdrücklech u mau öppis Angers. Mi chönnt oh ufe Gletscher, aber nume miteme Füehrer u ehrläch gseit het ds oh chli blöd usgseh di lüt uf däm Gletscher obe. Passt irgendwie nid. Mi hät oh wunger gnoh wi wit ache das äch dä Gletscher mau isch cho...
No bim zrugglouffe düre gliich wäg hetme irgendwie ds gfüeu gha, ufeme anger planet ds si, wüu ds Tau eifach wine Krater vome Meteoritihschlag oder so usgseht. Am Gletscherbach heimer no es churzes Pöiseli gmacht u när simer ume zrugg gfahre i ds Hüsli u när no i ds "Malins Steakhouse/Chinahouse" ds Sogndal gah ganz fein Chinesich ässä. Würklech ganz fein gsi. I däm Restu hets sogar oh Cocktails gäh, drumm heimernis das natüürlech nid lah entgah. Zrugg im Hüsli heimer pünktlech no chönne dr 9ni Mätsch Italie-Spanie luege u ahschlissend simer fridlech ihpfuset.Läs mer