Lem's Bungalows, Sogndal🇧🇻🏞

Hüt simer widermau am haubi 8i uf u hei üs grad zwäg gmacht für los ds fahre. Mir si no veiechli lang düre Jotunheimen Nationalpark gfahre bismer de mitem erreiche vom Vågåvetnet dr nördlechscht Punkt vo üsere Reis hei erreicht. Mir wüsse, Norwege gieng no viiiiu witer i Norde, aber mir wei i Zuekunft ja oh no öppis dstüe ha. A däm See simer när linggs abboge u uf Lom ichegfahre, womer schnäu öppis ds biisse hei kouft u bir "Lom Stavkyrkje", uf Dütsch "Stabkirche", (ds si Houzchiuchene, wo usem 13. Jahrhundert si, e setegi wimer im Norskfolkemueseum hei gseh) hei stiu gha u üses koufte Ässe hei gässe. Es isch no lustig gsi, wüu i derä Zit womer gässä hei isch grad e Car vou Chinese zuechegfahre, u mir heinis nume gfragt wi äch die so mit Spicherplatz etc. e sach hei... jede duurhaft am fiume gsi...
Ufder witerfahrt simer när ume stetig obsi gfahre bis uf 1428m.ü.M. Ds isch dr höchscht Punkt vor Passstrass Sognefjellsvegen. Dert obe si sogar no Seee gfrore gsi u si hei no glanglöiflet. D Strass isch sehr cool zum fahre gsi. Nid nume linggs u rächts sondern oh viu obsi u nidsi u zwüschiche hets oh no Schaf ufder Strass gha.
Äne ache simer du zum Ändi vom Sognefjord cho, em lengste Fjord vo Norwege (ja, ds Grönland söus no e lengere gäh). U genau dä Fjord söu üs no chli lenger begleite. Hamer ds Ändi aber chli spektakulärer vorgsteut, es isch nume e gruusig roti Skulptur dert gstange u fertig. Mir hei du glich no par Föteli gmacht. Witer ischs gange, äbä an Sognefjord entlang, zur Chiuche vo Nes, es einsams Chiuchli wo im hingergrund ufder angere Site vom Fjord dr "Feigumvossen" (e grosse Wasserfau) achedonneret. Het par schöni Föteli gäh.
När simer witer bis uf "Sogndal" linggs über d Brügg zum "Kjørnes Camping" chli gah i Rase plegere bismer am 3 Uhr när üsi Kabine vode "Lem Bungalows" hei chönne i Empfang näh. Richtig schöön!
Nach e chli desumefuuschte hanis sogar ds Stang brunge dasmer de dr Schwiz-Schottland Mätsch ufem Fernseh chöi luege. Zersch simer aber no uf Sogndal für morn gah ds Zmorge ichouffe u fein gah ässä. Zum einte "Smashed Burger" für mi u "Fish & Chips" für Ami. No schnäu ine Bar gahnes Bierli schnappe u ueche i ds Hüttli gah Schutte luege. Herrlech isch das gsi, bi somene Panorama hani nidemau bi Schübi e Schuttmätsch gluegt! (#WM2018)
1:1 steits ds letscht, mi steit fasch sicher im Achtufinau u i ha sogar no Unentschide Tippet gha, oh nid schlächt. So itz ab i ds Näscht, für morn heimer hüüffe Plän, aber no keh fixe.... ussert ds Zmorge.Читать далее