Bakkaåno Camping🏕🪨

Hüt am Morge simer relativ spät uf u hei e ganz erhousame schlaf gha. Mir hei när, so wi fasch au Morge, zmörgelet, packt, u ufgruumt u di schöni Ungerkunft vor Beata verlah. Öpis isch gsi wi nid au Morge, mir hei nämmlech ume, so wi gester, d Wanderusrüstig ahgleit. Mir si i ds Outo u no schnäu i Spar gah Znacht für hinech u Zmorge für morn gah ihchouffe. Mir hei oh no grad e "zwüscheverpflegig" für hüt kouft. Womer die am Meer ufeme Rastplatz churz vor Brusand hei gässä, isch nämmlech scho fasch 12i gsi. Vorhär simer vo Stavanger us öppe 45min. eifach gredi gägä Süde gfahre u d Strass am Meer nah gwäut. Da isches gäng wi ländlecher worde u am Meer isches äuä veiechli wachsig, mi het ömu viu Miuchchüeh u Schaaf gseh. Nach Brusand isches aber när ume gäng wi steiniger u feusiger worde u d Strass gäng wi kurviger u mire Meinig nah oh schöner. Mir si oh no ufene Bousteu gstosse. Ds handhabesi da irgendwie chli komisch, es steit nid eifach e Ample, sondern es steit eine ufder Strass u het es rot lüüchtends Cheueli id luft. När wartetme öppe 10 min. u bevor dasme darf fahre chunnt no es Leaderfahrzüg vor dra wome när muess fouge. Mire meinig nah huere komplizert. Churz nachder Bousteu simer när ufe Parkplatz vome Museeum vore Titantröchnigsahlag ds hingerscht am "Føssingfjord" Ds isch ömu das wo itze dert isch, früecher weisi nid was dert aus isch gsi. Mir si ja schliesslech oh nid wägä dessi da, sondern wägem "Kolbolten". Eh iklemmte Stei zwüsche zwone Feuswäng u quasi e chliine Brüetsch vom "Kjeragbolten". Hie het nämmlech üsi Wanderig ahgfange. Zungerscht no miteme Wägwiiser beschribe wodüre simer gstartet u dürnes zimlech undütlechs Wägli cheibestotzig dr Hogur uf gloffe. Mir hei bau nid gwüsst wo düre, bismer du hei gmerkt das a Steine u böim gäng blaui tüpf drufgsprayt si. Aber oh di Tüpf si nid so dicht gsäit gsi u drumm heimernis einisch ömu oh no verloffe. Womer du när zumene Parkplatz si cho heimer du müesse ihgestah dasmer äuä gschider uf däm Parkplatz häti parkiert. Aber itze, isch ömu oh es Abentüür gsi. Witer isches när viu dütlecher gsi wo düre. 2km isches när no über Feuswäng, Sümpfli u Wäudli. D Ussicht u d Landschaft isch schön gsi, eifach di Titantröchnigsahlag am angere Hoger änä het di ganz Zit e huere lärme gmacht, dr Luft isch äuä oh grad drnah gange. Churz vorem Ändi vo denä 2km heimer när linggs ache abgha u no chli nidsi gloffe bismer när dä Chemp hei gseh. So cheibe ihdrücklech isches itz ouso scho nid grad gsi. Mi niem zwar scho wunger wi äch ds gange isch dases dä dert derewäh het chönne ichebissne. Mir si gschwind ou druuf u hei par Föteli knippset u när no chli abghöcklet. Es het oh es Büechli dert gha wosech äuä bau e jede ihschribt wo dert isch gsi, so heimer ds du oh gmacht. När simer de oh wider zrugg. Es gieb äuä oh irgendwie e Rundwäg aber ds isch weder irgendwie beschribe no ahdütet gsi u drumm heimer haut dr gliich wäg wider gnoh für zrugg. Womer du wider uf däm obere Parkplatz si gsi, heimernis no schnäu e Hotdog respektiv e Glace gönnt u si du när dr Strass nah ache zum Startpunkt. Dise Wäg nidsi ds louffe wär drumm migottseu bau gfährlech gsi. Am 13:00 Uhr simer öppe gstartet u öppe am 16:00 Uhr simer zrugg gsi. Ja, isch e schöni Wanderig gsi u sicher oh es Abentüür wärt gsi, aber viu meh de oh nid. Mtem Outo simer när ume chli chli retour gfahre u när chli näbäus zume Camping namens "Bakkaåno Camping" dert heimer ichecket u es Plätzli ame Fluss übercho. Mir hei aus erschts grad ds Zäut gsteut dases no chli cha trochne vom letschte mau bruuche nache. Mir si no gah Dusche bevormer när no es Steipiuzrisotto gchöcherlet hei. När wird öppe no chli gsi u ev. no chli Schutte gluegt u guet.Leggi altro