Kristianssand🌊☀️

Di Nacht isch ganz müehsam gsi. Ds erschte mau erwachet bini wüus dusse häu isch worde, u ds isch haut scho am 3 Uhr gsi... när bini gfüut au 5 Min. erwachet. Ersch öppe vo 6i bis 8i hani no hurti chli gschlafe. Ouso, am 8i uf u da heimer afe mau ds Zäut usgruumt u ds Innezäut entfernt, so das ds vom Dampf nasse Ussezäut cha trochne. Mir hei no fein Zmorge gässä, amene Tisch näbädranne u nis när zwäg gmacht für d Witerfahrt. Ds Zäut isch zwar no nid ganz trochen gsi, aber da hätimer vilech no lang gwartet. Mir si när witer richtig Südoste uf Åna Sira zumene Parkplatz. Vo dert us startet üsi letschti Wanderig vo Norwege u überhoupt vo üsne Ferie. Mir wei zude "Brufjellhålene" zu dütsch "Brufjellhöhlen". Ds si Höhline im Feus ar Küste wos schiins vo Gletscher u Steine ganz früecher usegwäschä het. Für dasmer aber zu denä chunnt, wär häts oh angers däicht, muesme gliich ca. 1.5h louffe u sogar no chli chlättere. Es geit am afah zimmlech tou dr hoger zdüruf wüu mi muess ja natüürlech no über Feuse ih u änä ache. Dr wäg isch zum Tiu rächt schwirig gsi wüu di ganzi Wanderig eigentlech dürne Schaafweid geit u rächt viu wägli het gha. Zwüschiche hets zwar ume blaui Pünkt u Wägwiisere gha, dasme när ömu ume gwüsst het dasme richtig isch. Einisch druffobe isches huere schöön gsi, da s eifach vode Feuse zimlech ache isch bis i ds offene Meer, u ds git haut scho es schööns Ambiente. Dr Nachtiu isch, da di höhline am Meer si, dasme haut dür ds Stotzige oh irgendwie ache muess. Ds wird hie miteme Chromstahlseili u ihbohrte Hänkle glöst, wome ds dürab muess. Dunger ahcho geits no öppe 100m übernes Felsplateu när simer bide Höhline. Schono speziu di löcher i dä Feus. U ds Ambiente isch würklech eifach sehr schöön gsi. Bir Höhli heimer oh no e Basler troffe wome scho ufem Parkplatz hei gseh drvo Hasne. Dä isch 6 Wuche aleini u itz de no 4 Wuche miter Familie ds Norwege. Da mögi mir nid ganz gfahre, aber mir si gliich überglücklech mit üsere Reis. Es het guet da ume eis mitere frömde Person Schwizerdütsch ds rede. Dr Rückwäg heimer dr erscht Tiu gliich wi dr Häräwäg müesse näh aber dasmau natüürlech obsi chlätere. Drufobe heimer no schnäu e Abstächer ufe "Brufjell" gnoh, ds höchschte Püpi dert usse u si när e angere wäg zrugg richtig Parkplatz. U wider isches veiechli e stotzegi Sach gsi. Womer du dunger ufem Strässli si gsi heimer es ganz gmüetlechs Cafe gseh, so simer dert no schnäu gah ihcheerä. Mitem Outo simer när meh u minger ar Küste nah witer richtig Südoste u när es Sackgasssträssli ache uf "Lindesnes". Für a ds Nordkapp hetsnis zwar nid glängt aber drfür nähmimer no dr Südlechscht Punkt vo Norweges Festland mit. U ds isch äbä ds Lindesnes oder gneuer gseit "Lindesnes Fyr", dr Lüchtturm vo Lindesnes. Es Lüchtürmli wo scho sit 1915 dert steit u Rundherum hets no auti Stelige vo früecher nache. Natüürlech heimer no par Föteli gschosse u witer zu üsem letschte Stopp vo Norwege, Kristianssand. Mir heinis drzue entschide zume Parkplatz nach vom Fährehafe am Meer ds fahre u när im Outo ds lige, da üsi Fähre scho am 6:30 Uhr losfahrt u mir spetischtens e Stung vorhär müesse dert si. Rändiert ouso bau nid es Zäut ds steue verschwige no öppis ds bueche. So simer nacheme e chliine ichouf uf däm Parkplatz ahcho, no schnäu zahle wüu oh dä Parkplatz isch nid gratis u när Teigware are Pestosauce choche. Mir hei schliesslech Hunger! Itz gniesse mir no de letscht abe ds Norwege!
Bimene verdouigs-Abespatziergängli hei mir no äs reh miteme junge rehbock gseh... schön gsi bi dere abestimmig, wo doch gäng no vou begleitet wird miter sunne ( 22:00 Uhr)Läs mer