Lützelflüh🥲🐈‍⬛🏠🛌

So, dr Momänt isch cho. Sobaud mir öppe am 9i erwachet si isch grad sofort Ufbruchstimmig da gsi. Mir hei üs zwäggmacht u när afah üses Züg packe u verrume. So häbchläb het grad aus Platz gha. Gwichtstechnisch weisi no nid... Mir hei planet gha am 11i ds fahre aber mir si scho am 10ni nache gsi. Womer er Brita no schnäu hei tschüss gseit hetsi no 150DKK wöue für d Bettwösch... ds het si äuä chli vergässä gha u mir ehrläch gseit oh. Natüürlech hei mir keh Bargäud. Aber macht ja nüt, mir hei sowiso no i ds Städtli füre wöue gah ds Zmorge chouffe u de chöimer ds Gäut oh no grad uselah. Ds erstä mau übrigens! In Skandinavie chunntme ouso ganz guet miteme Chärtli düre, äuä sogar no besser aus ir Schwiz. Mir hei Zmorge es Bröötli u wider eis e ganz feine Zimtschnägg (nid ganz so fein wi dä gester) kouft u hei ds am Strand vore gässä. Mir sy no hurti ines chlises charmants Souvenirlädeli gahne Schlüssuahhänger vo Dänemark choufe (so wie das traditionell gmacht wird vo üs. Vo jedem Land/ Ort wo mir zäme id Ferie gö nähme mir ä Schlüssuahhänger mit hei).
Ds Gäut für d Brita heimer, wi abgmacht ines Couvert tah u i ihrem Garage ines Schäftli gleit, i hoffe si vergäss de ds Gäut nid dert. U när göhmer los. Über Aalborg u Aarhus i Mc Donalds ir nechi vo Vejle. Dert heimer schnäu öppis gässä, uf ds WC, ds treiche kouft u Fahrerwächsu gmacht. När witer über d "Lillebaeltsbrügg" uf Odense, när über di Mautpflichtegi "Storebæltbrügg" uf Kopenhagen. Insgsamt öppe 5h u fasch 600km. Am viertu vor 5i simer bim Car Rental Centre ahcho, nachdäm mir vorhär dr Chare dür d Wäschahlag hei glah, usegsugt u tanket hei. De gähmer itz ds Outo ouso ab. Nach 3700km u 59h fahre. Isch ganz es gäbigs Outöli gsi, ds hybrid isch äuä oh nid e schlächti sach. Mit 5.5l/100km heimer pro Person usgrächnet ca. 195Fr. Bänzin dürekuttet. Da chiemi mit mim Focüssli gloub niene härä. Ds Outomatikgetriebe u di Assistänte si natüürli oh gäbig wemesech mau drah gwahnet het. Ussert dr Spurhauteassistänt isch ganz müehsam gsi, zum Glück hetme ja dä oh chönne usenäh. D abgab isch öppe 1 Min. gange ouso isch äuä aus guet gsi. Schnäu e Chribu gäh u witer mitem Shuttle ah Flughafe. Wüu aus so ribigslos gange isch müessemer itz haut 4h ufe Flug warte. Gepäck ihcheckä chöimer ersch 2.5h vorem Flug. So heisst afe mau 1.5h warte. Bim Gepäck ufgäh si beid Täschä chli ds schwär gsi. Mini 27kg u Amis gar 28kg. Het aber irgendwie niemmer gstört. So simer när oh grad düre Zou u wüu ds Gate no nid isch ahzeigt worde no schnäu öppis gah ässä. Gate F8 isches du när worde. Dert heimer nomau chli gwartet bis ds Flugi du oh afe ändlech isch ahcho. Schnäu Guferi uslade u ume ihlade, Lüt uselah u dr Vogu tanke u scho chöi mir ihstiige. Meh u minger pünktlech flügimer 21:15 Uhr los u lande ca. 22:30 Uhr ds Basu. Dert isch migottseu bim Gebäckbang di erschti Täschä Amis Täschä gsi u mini isch oh öppe d Nr. 5 gsi. Bim Usgang warte Percy u Anja scho ufnis. Mir dörfe nämmlech mit ihne hei rite. Merci viu mau! Daheime ahcho chöimer ändlech ume eis Filun hallo sägä u ufem Tisch isch no e Überraschig zwäg. Lee u Nicole hei für üs es Zmorge zwäggmacht womer morn sicherlech wärdä gniesse. Merci viu mau! Oh für zum rächtä ds luege Dahimme u Filu fuere. So, itz nähmimer no schnäu es Schlössli u när heissts ab i ds Näscht u afe eis realisiere was mir grad für geili 3 Wuche erläbt hei!Читать далее