Rägetag☔️ond Sonneschiin🌊☀️

Höt Morge, semer vomne fast scho fremde Gschrüsch verwached, womer de usem Fenster gluegt hei, heimer gwösst wases gsi esch, Räge😄. Nach dem mer de mal s Wetter agluegt heu, esch schnell klar gsi, dasmer eusi planti Wanderig ufe Nomi verschiebe. Gmüetli semer uf, hei eus warm agleit ond hei Zmörgelet. Doase hets chuttet ond grägnet aber ergendwie esch schön gsi wedet emol e so Wetter zha. Meteme warme Tee semer ufs Sofa kuschlet ond hei Bridgerton gluegt. Es esch so schön gsi sit 2 Mönet eifach au mal weder so chöne zäme i Tag starte, sone Kuschelmorge zmache🥰. Gege die 11ne hets de afo ufdue ond mer hei eus de scho au sehr gfreut dröber. Korz Onzieh, Sandwich mache ond Rocksack packe, de esches au scho losgange. Euses Ziel esch de Delphin Trail, de Parkplatz esch bere Lodge gsi, was eus zerst biz irritiert hed, selbstbewosst wiemer send, heimer de aber s Auto det abgstellt ond send los. D Sonne ond de blaui Himmel, heid Vorfreud uf die Wanderig grad no grösser gmacht. Nacheme korze Abschnitt öber Wald ond Feld, semer ine Dschungel inecho. Wonderschön ond weder ganz anderst als die letzte Wanderige. Es esch wörkli onglaubli wie vellfälltig Südafrika esch. I dem Dschungel semer sehr lang ontereegs gsi bis de Weg alles abe gange esch as Meer ond grosse Felsevorsprüng. Det onde heimer de au Zmettag gässe ond hei uf de warme Stei nochli gläge, bevors de alles weder deruf ond zrög gange esch. Ufem Heieeg, hets de weder afo zuedue ond de Wind hed weder afo azieh. Dehei acho, hets de e warmi Duschi geh ond warmi Kleider, dezue es warms Tee ond Apero. Dosse hets weder afo Störme ond s Meer onde a eus het dobet, trotz allem es e sehr e schöni Stemmig gsi. Ikuschlet heimer dem Spektakel zueluegt ond spöter de eusi Serie witergluegt. Am halbi 9ni heimer de Spaghetti koched😍 ond de Obe meteme Kaffi loh usklinge. Jetzt heits aber pfuse. Morn werds aber au e gmüetelche Start i Tag geh, wels Wetter erst weder abem Mettag kehrt. Guet Nacht🌟.Read more