Nanyuki

D reis uf Nanyuki isch eidütig es kenianisches Erläbnis gsi. Eine vo de Tourguides womer hend kenneglehrt het üs z Nairobi gholfe es Matatu z finde. Die chosted zwar fasch nüt, fahred aber natürlech ersch wenns voll sind. Üses het leider 2 Stund defür brucht... Nach ere witere stund im stau und ere holprige Fahrt hemmers denn aber doch gschafft. Ade 2 täg druf simmer mit Kim und Don go wandere, einisch e agnähmi Wanderig zude Mau Mau Caves. Und einisch het Kim en 8km wanderig zwüsche 3300 und 3800 Höhemeter am Mount Kenya akündigt, woner denn spontan uf 17km bis 4150m het erwiteret. Leider isches nid strahlend schön gsi und mir sind mehrheitlech ide Wolke gwanderet. Drum hemmer de dritt tag z Nanyuki brucht zum Chopfweh und müedi bei uskuriere... Defür simmer no d Nanyuki Spinners & Weavers go bsueche. Mir hend spontan e churzi Füehrig übercho, wo üs d Härstellig vo Teppiche und Schals isch zeigt worde. D Fraue wo do schaffed si alli alleierziehend und chönd dank dem Projekt Gäld verdiene, sogar im Homeoffice. Morn nämemer (vilich es schnällers) Matatu zrügg uf Nairobi, damit mer am Fritig richtig Amboseli Nationalpark und Tansania witerchönd.Read more