Nakuru und Naivasha

Ir Nacht hets grägnet u das obwou das Trochezyt isch, aber hie i dere Region isch eh aues viu grüener, wüus im Rift Valley ligt. Ide letzte Jahr rägnets immer meh drum wärde d See hie immer grösser und ganzi Wälder oder haut oh Teile vo Dörfer si am versinke. Leider het das drzue gfüert dases im Lake Nakuru fasch keni Flamingos meh het. Di rästleche Wasservögu si aber bliibe. Zudem hets i däm umzünte Nationalpark viili Nashörner, Giraffe, Leoparde, Löie und Hyäne. Und natürlech die Tier wos überau giit, Büffle, Zebras, Antilope, Gazelle, Gnus,...
Am Mittag simer näre ufem Lake Naivasha ufne Bootssafari. Üsi Erwartige womer d Nussschale hei gseh si töif gsi, aber mir si nid enttüscht worde. Ganz ganz viu Vögu und ufere Insle (wägem stigende Wasser ke Landzuegang meh) hets ganz viu Zebras, Antilope und Gazelle gha wosech dert vor kene Raubtier müesse fürchte, d Tier si dütlech ruhiger gsi aus aui womer bishär hei gseh. Dr Nami isch när ganz gmüetlech gsi, so heimer üsi Erkältige chli chönne uskuriere. Am nächste Morge simer mit Velos düre Hells Gate Nationalpark gfahre. Leider heisech d Tier wägem Räge ide letzte Tage i höcherglägnigi Gebiet zrüggzoge und mir hei nur wenigi gseh. Drfür si aber die Steile Felsklippe sehr beidruckend gsi. Wider z Nairobi ahcho isch üs die hektischi Stadt viu entspannter vorcho und mir hei üs direkt zimlech wou gfüeut, wasmer vode erste zwöi Täg hie nid chöi bhoupte.Read more