Koh Samui - sabaii maag (gefällt sehr)

Hoi Lionel, Hoi Nico
Uui, han oi viel zverzelle! Tuet mir leid händer es wiili uf Bricht vo ois müese warte. Schriebe oi us Chiang Dao, das liit oberhalb vo Chiang Mai. Ich zeig oi das dänn snöchscht mal uf de Charte.

Wott oi aber vor allem vo Koh Samui verzelle. De Götti hät s'erschtmal vom Sumai und Supapi vo dere Insle erfahre. Die sind nämlich scho vor langer Zit s'erschtmal dete gsi und sind es paar mal gange. Au de Götti isch jetzt zum 4.mal dete gsi. Und ich säge oi, ich weiss jetzt wieso! Sabaii maag!

Mir sind vo Phuket mit em Flüger nur ca. 45min gfloge. Cools Flugi gsi mit Propeller. Die erschte beide Nächt hämmer in Lamai imene chline, herzige Resort verbracht. Hät glaub 23.- koschtet pro Nacht. Aber em Götti passts dete sehr. Händ dänn au de Jamie troffe, en guete Fründ vom Götti. Mit ihm und spöter au sinere Frau werdemer no es wiili unterwägs si. Zerscht sind aber no gmeinsami Kollege us Singapur in Samui gsi. Sind mit dene unterwägs gsi; unter anderem simmer inere Bar gsi, wo mer sälber mit de Band hät chöne singe. Sie händ aber Schwiizergoofe nöd chöne, drum han ichs si lah.

Nach zwei Täg sind die dänn hei uf Singapore und de Göttti, de Jaime und ich sind uf Bo Phut in es sehr edles Resort. De Jaime hät ois dete für 5 Täg iglade. Mega schöni Doppelzimmersuite. Händ dete viel guets gässe und sind chli uf de Insle unterwägs gsi. A eim Abig bini mit em Götti no in Chaweng gsi. Dete hämmer en Fründ vom Götti us Züri troffe, wo au i de Ferie isch. Mit em Wätter hämmer au ziemlich Glück gha und es hät nur sälte mal churz grägnet. Es isch würklich en tolli Ziit gsi uf enere tolle Insle.

Soviel zu Samui. Mir verabschieded ois vom Meer und es folgt bald en Bricht zu 'one night in BKK' und erschti Idrück us em Norde vo Thailand. Vorerscht wünsch ich oi aber alles Gueti und froi mich uf es Fötteli vo oi.

Liebe Gruess ...RickRead more