Neua Bundesstaat (Queensland) und ah neui Ziitzona homer hüt zügig erreicht. Aktuell sind mür da Schwiiz ziitlich (nur) no 9 Stund vorrus. Di hütige Etappa sind rund 350 Kilometer komplett gega Norda gsä.
Noch rund 30 Minuta fahrt ab Byron Bay homer da Highway churz verloh und sind ih Tropical Fruit World. Na ja, es isch eigentlich an Verkofsstand mit exotischa Frücht gsä. Es het zwor no Besichtigunga vo da Felder gä, aber es isch meh ah biz d’Erklärig gsä wia z.B., dass d‘Milch nöd vo da Migros chunt für d‘Städter.
Epa 100 Kilometer oder ah Stund Fahrziit wiiter simer dänn uf Brisbane cho. Epa 6 mol sövel Ihwohner wia Züri, aber 100 mol da entspannter Verkehr wia Züri. Do sind Städt sehr ahgnähm zum dadur fahra. Mür hond üs an Parkplatz ergateret und hond ah chlini Rundi dur d‘Innastadt gmacht. Rund zwo Stund Touri Programm ih da City mit 10000 Schritt.
Wiiter isches dänn über da Steve Irwin Drive dur da Glass House Mountains Naturpark ih Richtig Sunshine Coast und Noosa ganga. S’chline Städtli Noosa hät für d‘Aussies epa so an Staus wias Ticino für Dütschschwiizer. Es hät ah rächts Volk uma.
Mür hond s‘erscht mol nöd ima Backpacker (wo epa 35.- für bedi pro Nacht choschtet), ima noblera Ressort mit Pool buachet (70.- für bedi pro Nacht). Es isch da Hammer, sogär ah eiges WC und Brünneli im Zimmet (nöd üblich do). Da Obet homer gmüatlich mit ama feina Znacht im Bettys Burger, am Sunnauntergang ih da Everglades und ama Ginger Beer im Pool verbrocht.
An Gheimtipp homer hüt no mösa usprobiera. Tim Tam Chrömli (2 Chröm mit ara Cremefüllig und Schoggiüberzug). Sü sind offach da Hammer und sehr guat. Dia hond do so an richtiga Kultstatus und bedütet epa da, wa Ragusa für d‘Schwiz bedüdtet: NationalstolzRead more
Travelergits bi da RhB sooo lang Feria?? Gruas und guati Reis
Traveler3 Wucha häts gä👌🏼👌🏼 Eu oh ah guati Reis
TravelerHaha top hoffentli hond üseri Essens-Tipps passt 👍😜
TravelerUnd wia👌🏼👌🏼