Entdeckungstour durch Accra

noch ma erholsama Nacht homer hüt no kli usgschlofa und sind denn ersch so um di 9i ufbrocha zum go Zmorga Essa. imna mega touristischa Resti hommer üs Pancake mit Nutella und Banana gönnt. Ahschlüssend simmer mit ma Uber zum Kaneshi Markt gfahra. döt hetts ofach alles ka vu fisch über Kuafüass, Hennafüass, en Kuakopf wo am boda glega isch, Gmüas und Frücht und no vieles zum Essa meh und oh sus alls möglich wia Stöff, Pfanna, Schmuck wa mer so alls brucha ka oder oh nöd. Grundsätzlich sind d Fraua d Verköferinna gse ussert bi da lebtiga Tier, döt sind d Manna am Werk gse. Danoch simmer denn Richtig Jamestown ganga. Da isch dia Gegend wo d Sarah vor 10 Johr im Praktikum gse isch. Zuafällig simmer denn no a da Korle Lagoon (oh als shit lagoon bekannt) verbi gfahra. Da isch ofach a riiiiesegi Müllhalda, wo oh en Slum isch. Da Fluss flüsst dur Accra und bevor er is Meer mündet flüsst er no dur dia Müllhalda und wird no meh verschmutzt als er davor scho isch. Danoch simmer no kli dur Jamestown gschlenderet und sind i Küstanöchi imna Beiz öppis go trinka zum kli abküahla. Kum isch d Sunna do is nemli scho recht warm umd schwüal. Uf am Weg zum Makola Markt hommer üs denn no a Fanice gönnt. Da isch a Glace wo im Bütel isch und mer ofach 1 Ecka abbisst umd si denn so trinka cha. Uf dem Markt hetts nard oh wieder alls geh. Völlig durigschwitzt und beihdruckt wia do alles lauft hommer üs denn uf da zruggweg zu üsra Unterkunft gmacht. Noch ma kurza Fuassweg dur da Stau hommer denn sogär könna a Uber bstella und sind so recht ahgnehm zrugg cho. Zersch mol a Duschi neh zum da Schweiss abwäscha und denn no kli usruaba bevor mer go Znacht essa gond.Weiterlesen