Shai Hills

Zum Znacht simmer gester im authentischa Asanka gse. I ha Ris mit Palavasauce gha. Isch fein aber scho recht scharf gse. Wells do am guat sechsi dunkel wird simmer denn mit ma Taxi zrugg. Bevor mer is Bett sind hommer no da Dok vum SRF über d "second hand" Kleider wo uf Ghana brocht werid gluaget. https://www.srf.ch/play/tv/rec-/video/abfallber… Isch sehr ihdrücklich gse, vor allem well gad paar Ort vor cho sind wo mer gest oh gse sind. Danoch simmer denn go pfuusa. Hüt Morga hond sich denn d Mama und d Sarah zersch uf da Weg gmacht zum go Zmorga posta. Zrugg cho sinds mit ma Stuck Toastbrot wo Butter inagschmiert wora isch, a Stuck bärigs Toastbrot umd so öppis Nutella ähnlichs dazua, 3 Päckli Schoggipulver für heissi Schoggi, a Dösli Kondensmilch und a Päckli Cornflakes. Zemma mit da Ananas hett da denn an tiptopa Zmorga geh. Mür hond denn uf di 10ni a Uber vorbuacht ka zum id Shai Hills go. Dä hommer denn no mössa überreda, dass er döt uf üs wartet und üs wieder zrugg uf Accra fahrt. Sprich er hett denn uf zmol en 7 stündiga Uftrag ka statt nu 1 Fahrt. Er hetts aber gern gmacht und spötestens wo d Sarah gset hett dass üsi Mama dabi isch ischer überglücklich gse. I da Shai Hills hommer denn a Füarig kah. Döt hommer importierti Zebras, en Strauss, Antilopa und Pavian gsecha. Ahschlüssend simmer no uf en Hügel ufi und hond kli Föteli gmacht. Am spötera Nomittag simmer wieder zrugg i üsem Airbnb gse und sind zersch mol a Rundi unter d Duschi. Spöter simmer denn no is Buka go Znacht essa. Groundnutsoup, bean stew (redred), kontemere stew (palawasauce), Ris, fried Yam und fried Plantain hommer g essa. Abgsecha vu da Erdnusssuppa isch nünt scharf gse, en puura Gnuss. Zrugg mit ma Taxi tommer etz no üsers Züg packa und denn gohts morn witer uf Cape Coast.Baca lagi