Kokrobite

Hüt hett da Wecker scho am 6i gschället. No schnell fertig packa und Zäh putza und am halbi sibni isch oh scho s Taxi parat gstanda. Mit dem simmer denn über die schlecht Stross a guati Stund lang wieder zrugg uf Takoradi gfahra. Döt simmer ina halb volls Trotro ihgstiega. I bi denn no schnell go Bofrut posta, dass mer no öppis anders als Krömli hond könna essa. S Trotro fahrt ersch ab wenns volla isch.  Somit hommer denn bis am 9i mössa warta. Zwüschetduri ischt no ona as Trotro cho und het üs a Predigt ghalta. Nochana is denn direktaweg Richtig Accra los ganga. Vor Accra hetts no a gfühlt ewigs langi Baustell. Und genau döt hommer denn oh üseri erst Trotro Panna erlebt. Denn hetts ghasa alli usstiega mür kond numma wieder fahra. Vorna isch irgend a Stanga brocha gse. D Sarah hett üs denn sofort a Taxi ahghalta und so simmer denn kli witer als geplant mit am Taxi gfahra. well mer aber eh nöd gwisst ka hond, ob er üs am richtiga Ort usaloh hetti, hetts nard gad oh so passt. Üsi hüttig Unterkunft isch für 1 Nacht im Kokrobite Garden. Ganz en schöna Ort. Schlussendlich simmer denn für dia 230 km 7.5 Stund unterwegs gse. Da hett oh kli Hunger geh und drum hommer üs a Pizza und Bruschetta als Zmittags Snack teilt. Danoch simmer denn no an Strand füri und hond no kli üsi schö Unterkunft gnossa. Zum Znacht simmer is Big Millys. Döt hommer no Kelewele (frittierti, starch gwürzti Kochbanan) probiert, well d Sarah gmonnt ka hett da mössemer mol no ka ha. Da isch oh mega fein gse. I ha denn wiedermol Palavasauca mit Yam (so öppis wia kli en trochna Hörpfel) ka. D Sauca hett aber kli en speziella Guu ka und isch überhopt nöd scharf gse. Mol loga eb dä Guu no en Ifluss uf mini Verdauig hett. Zum da Obet usklinga loh hommer noml kli glesa und sind ofach chli gsä.Weiterlesen