chill n' surf

Hüt hommer mol ganz gmüatlich usgschlofa und eigentli ger ko Programm plant ka ussert a kli z si. Noch am Zmorga hommers üs gmüatlich gmacht i üsem Garta unter da Palma mit Sicht ufs Meer. Kurz druff ab hetts denn aber ahgfanga schiffa. Zwor nöd mega lang aber scho no fest. Mür hond denn alli kli i üsna Büacher glesa und oh noml kli döset. Am 2 simmer denn noml an Strand und d Sarah und ih hond üs no a Surfboard gmiatet. Denn hani mi a mini ersta Surfversüach gwoget. 2, 3 Nasa- und Ohrspüaliga hetts scho geh. Insgesamt is scho no lustig gse. Als Snack hommer denn no Banana bi da Fruchtfrau kooft. Und a Oranga zum trinka/ussuga bimna andera Verkofsständli. D Sarah und ih sind denn noml is Meer go bada well mer da jo nöd so gnot macha chonnd. Zrugg im Hotel hetts denn noml a kalti duschi geh i da Tree Shower und i ha am 6i scho en rechta Hunger ka, ha aber gwisst dass es ersch am sibni Znacht git. Denn is oh scho sowit gse und i ha min ersta längera Stromusfall erläbt. Sü hond denn probiert zum da Generator starta hett aber nöd gad klappet. So honds denn halt i da Kuchi mit da Taschalampa kochet. Znacht hetts denn oh ersch am 20 vor Achti geh, aber besser spät als nie. Gad öppa denn isch da Generator oh z laufa cho und so hommer könna mit Liacht Znacht essa. I ha frischi Garnela ka. Lecker, lecker,... Noch am Essa hommer no paar Rundena Uno Flip gspielt und denn hommer no mössa üsers Züg packa well mer morn dä schöni Ort (Ahanta Eco Lodge, Busua) oh scho wieder verlond.Les mer