Flores & Tikal

Nach paar Wuche eher im Süde vo Guatemala si mir iz no ganz im Norde vom Land ahcho. Es isch üse letscht Ort wo mir bsuecht hei bevor mir über d’Grenze uf Belize gö😄
Flores isch ganz es härzigs, chliises Dörfli mit viune farbige Hüsli. 🏡 Süsch würkts eher chli verschlafe und es isch wieder heiss, aso mir si da definitiv wieder im tropische Gebiet 😅

Mir hei da houptsächlech ä Stopp gmacht wäge dä bekannte Maya Ruine vo Tikal (Weltkultur- und Weltnaturerbe). Für die z gseh hei mir ä Tour buechet u hei wieder zimmli früäch uf müesse. Si am Morge am 2:15 Uhr ufgstange u si när am 3 losgfahre, damit mir der Sunneufgang im Park nid verpasse.
Dert ahcho hei mir nid schlecht gstuunet wie wunderschöön, ihdrücklech und gross Temple vo dä Mayas si🛕 Di meischte Temple si zwüsche 800 und 600 vor Christus erbout worde. D Gründer si aus Chünige gsi us dere Zit. Rund 80% vo aune Temple vo Tikal si no ungerem dichte Jungle verdeckt und wärde o nid ufdeckt. Obwou mir sehr viu vo dene Pyramide hei chönne gseh, gäbs no viu meh z entdecke.

Näbscht dene Maya Ruine isch natürli der Jungle sehr schön gsi. Mir hei paar Tierli gseh und vorauem ghört. 🙉👂es isch würkli sehr luut am Morge am 5fi und wär denn no chli schläfrig isch gsi, isch sicher wach worde dür z Gebrüll vo dä Brüllaffe 😅

Mir hei die Tour mit der Lucy und der Dymphy gmacht. Mir hei mit ihne abgmacht, das mir üs in Flores wieder träffe. Si hei drum wägem Hundi no ä chline Umweg müesse mache. Si hei ä Tipp übercho, das ä guatemaltekischi Familie Interesse het das Hundi ufznä. Wosi hei gseh wie schön dases bi dere Familie isch, heisi entschiedä, dä Welpe geit nid uf England sondern blibt bi dere nätte Familie 🐶
Am Abe si mir aui zäme no mau ga ässe u när hei mir üs definitiv verabschidet😄 Si reise beidi när i verschidni richtige witers.Read more