Sarawak
May 22, 2025 in Malaysia ⋅ ☁️ 30 °C
Hellöu hellöu oder besser Salamat :)
Mir si acho in Kuching, nord borneo nach däm mir öppe 24std greist si 🌏✈️
Mir si eifach chli dür dStadt gschländeret u am Abe hei mir de no ä Sunset-cruise ufem Sarawak river gmacht ⛵️ dReis, dwermi u di gfüeuti 200% Luftfüechtigkeit hänkt de irgendwenn glich ah u dä Tag beände mir relativ früeh mitemne Bierli im Hotel.
Am nächste Tag wärde mir vo Berek abghout. Ds isch dr Taxi fahrer vom Tag vorhär wo mir wüur so fair isch gsi gad agsteut hei für üs hüt a Hafe vom Bako Nationalpark zbringe. Berek isch wi es schwizer uhrwärch pünktlech ufd minute bim Hotel, het üs scho organisiert ds mir de üses grosse Gepäck chöi abgäh, ä Fahrer für am Sunnti ume hei u äs privat boot für i Bako nationalpark - aues ohni üs zfrage aber mir nämes gärn ah oh we er jtz sicher a däm Päckli chli öppis verdient. Aber mir si dankbar u froh u es spart sehr viu ziit we mir ds jtz nid aues müesse organisiere 😅
Mitem Boot geits los i dä wunderschön Park wo so grüen isch u so riiiise böim het u Feuse bis iz Meer use 🥰✨️ im Meer hets äbä oh no angeri Sache - krokis, qualle u angeri läbäwäse wo ke fröid hei a üs Mönsche drum isch ds Bade hie verbote... was hätte mir gä fürnes Bad im Meer 🥵 aber ja üses läbä ischnis lieb drum lö mir ds la si u gö statt dessi uf di verschidnige Trails hie immer uf dr suechi nache de big 5 of Borneo...
Krokodil, Naseaff, Oranguthan, Hornbilli, mini Elefant...
I üsem Zimmer hei mir de afä mau umboue wüu ds Borneo hets nid nume dbig 5 sondern oh small mosquitos... aber i dere Gipsdilli het ds züg nid gha drum hei mir müesse umdisponiere.... mir hei ä AC u bruche drum dr Fänti gar nid....
Es het hie so trails wo mä nähr säuber cha mache... Am erste Tag hei mir ömu de dä Naseaff scho gseh 🐒 u no paar Schlange... u paar Spinnele u wiudsöi 😅 am zwöite Tag hei mir üs de fasch chli überta mit dere Wandererei - u si beidi todkabutt acho aber es het sich glohnt einsami wunderschöni Stränd, purs Jungel erläbnis u am schluss no ä Waran wo auso würklech fasch chli het usgseh wines Kroki... nachemne äxtra grosse Shot Magnesium, hei mir bimne Bierli uf üsem Baukon dä Makake zuegluegt bim gangle u hei so dr Tag la usklinge 🥰🥰
Am mächste Tag si mir uf, u hei nomau ä Trail gmacht - ja mir heis gspührt ide chnoche ds mir dr ganz Tag über Würzle gwanderet si dr letschd Tag... 😅 u si de nähr gmüetlech ir caffeteria chli ga si bis üs dr captain widr het abghout u zrüg bracht het uf Kuching... dert hei mir afä mau richtig duschet, u aues umpackt u si de am Abe uf empfählig vo Berek i ,,Top spot,, ga ässe - es isch super gsi so richtig Asiatisch es het aues ga u aues früsch - mir hei üs richtig wou gfüeut aus einzegi Touris uf dene Plastik stüeu 😅 i ha mi würklech i gläse über Kuching u ha auso weder imne Reisefüehrer no imne Blog jemaus öppis vo däm tolle Ort hie gläse 🥰 mir si begeisteret 😅 zum Abschluss vo üsere Sarawak tour si mir de no im Shereton ir Roof top bar zum sunset gane Mojito trinke - es isch soooo schön gsi hie mir würde am liebste no chli blibe aber .... znächste Abetür wartet scho uf üsRead more
Kinabatangriver ✨️✨️
May 27, 2025 in Malaysia ⋅ ☁️ 30 °C
Kinabatangriver - oder we eim dSchittstöck chaubere 🥰✨️✨️
Nach üsem letschde Itrag si mir ganz i Oste vo Borneo uf Sandakan - vo dert us si mir mir mit ,,SI Borneo,, ufne 5 tägegi Tour.
Agfange hei mir zsandakan säuber dert si mir ir my nature lodge gsi u hei afä mau ä Tag am pool igleit... vom pool us het mä i urwaud gseh u gli bi ig dert im kühlen Nass ghocket mitem Fäudstächer - mä gseht immer widr nöii sache 🥰
Am abe hei mir de dä Flughörndli chönne zue luege - ach wi schön u wi impossant si die de bitte 😍🐿
Am nächste Morge ischs de richtig los gange zersch iz rehabilitations center für Oranguthans u für Borneo sunbears... ja auso di Oranguthans si ja mau so härzig mir si shockverliebt 😍 leidr si di Primate vom usstärbe bedroht 😕 Obwou si mitemne IQ vo 85-95 sicher sogar schleuer si aus teu möschlechi Wäse 😎 Mir hei jtz ufaufäu eine adoptiert wosi dert hei ufgno u wärde iz immer per mail benachrichtiget wisim so geit - ,,Napagang,, isch mit 2Jährig gflüchtet us dr gfangeschaft - obwou er gar nüt angers het kennt... er isch ä chliine Rebell u ds gfaut üs 😍
Vo Sepilok si mir witr ufe Kinabatang river ufe zwöit grösst Fluss vo Borneo. Mits ine i Urwaud si mir bis zur Abai Lodge. Die Lodge isch nume über zwasser erreichbar. Mir hei afä ä ersti Safari ufem Fluss gmacht u am Abe de no ä Nightwalk 😊 widr hei mir Schlange gseh u Naseaffä u viu insekte u das mau jtz oh Krokis 🐊 bim einte pleger hei mir nume dr Chopf gseh u dr Guide het gmeint dä wär ca 3m läng.... überlegt euch mau z'Rili hät zwöi mau i däm Vich inne platz 😬😵
Mir hei du de befunde mini Händ müesse da nid so über dReling use hange vom Boot... 😅
Am nächste Tag ischs früeh los gange u mir si ufne ,,Morgesafari,, dHornbillis heisich jtz hie la blicke 😍 di si ihres läbälang zzwöit ungerwägs u we eis stirbt blibt zangere allei bises oh stirbt....
Uf dr Nami Pirschbootfahrt hei mir de dä erst gross Oranguthan gse winer höch obe im Boum sis näst bout - u er het üs sicher oh gseh het ömu immer widr gäg üs Grüsch gmacht u so Handbewgige... ufaufäu ä Ougeblick für Hüenerhut u mir si beidi eifach ganz stiu da ghocket u hei dä Momänt inezoge ✨️✨️✨️
Nach ere witere Nacht i dere Troumlodge si mir Flussufwärts bis uf Sukau id Kinabatanang Riverside lodge... hie härä chönntmä anschiinend oh fahre - aber dStrass sig sehr sehr schlächt drum spiut sich oh hie zLäbä vo dä Dorfbewohner am Fluss ab. Hie si mir de oh no bi dene Lüt ga ässe einisch - wük sehr fein gsi 😊 u irgendwie oh interessant mau chönne so ine Hütte ine zluege 😊
Zum ässe het mä hie geng ä Sarong agleit u buttifüess gha - ds ghört sich hie anschinend so u mir heis auso oh no guet gfunde - da het mä sich ömu nie müesse überlege wasme wott alege 😅
Bir nächste Pirschfahrt hets so chli dunkli wuuche gha am Himmu - wi ds haut so isch im Rägäwaud u wi ja oh dr Name seit pissts hie mängisch wi us chüble 😅 u was wär ds oh fürne Tour we mir nid mindestens einisch so riiichtig wäre verschifet worde pflotsch nass si mir gsi 😅😅
Uf dr Morgesafari het sich dr Fluss im beste Liecht präsentiert - mir si sowieso scho begeisteret gsi aber nähr si mir a drü so pygmäe Elefante häregfahre wo grad hei es Morgebad gno 😍 wow, mir si scho ungloublechi Glückspiuze 😍
A däm Morge si mir de nach dere ungloubleche Begägnig no so ine Sitearm vom Houptfluss gfahre u was gseh mir dert? Zwöi usgwachsnegi Orangutans wo grad dr Fluss überquere... ja jtz het auso sogar üse Guide ä Freudesprung gmacht 🥳 Apropoz Guide: Rejam isch super gsi er het genau gwüsst wo härä luege u het es riise Wüsse gha über di Fauna u Flora wi oh über dRiverpeople auso dLocals hie. Am Orangutan hetr tschüss gwunke u gseit: ,,goodbye my friend sleep well we wont disturbe you anyomore...,, 🥰
Ja üsi Härz hetr gwunne ❣️
Mir hei de no ä säutnige Hornbill gseh (er het üs chli ane Punk erinneret mit sim Iro) u zu gueter letschd nomau äs pleger kroki .... 🤩🤩
zäck iz heimirse di big 5 u geng no 3Wuche too go 😍😍
Mau luege was da no aues uf nis wartet ... 🥰🌍Read more
Kota Kinabalu 🇲🇾
May 31, 2025 in Malaysia ⋅ ☁️ 31 °C
Kota Kinabalu - great things happen to those how ask ✨️
Mir si zrügg usem Urwaud widr ir Zivilisation - diräkt id Grossstadt Kota Kinabalu.
Mir hei gwüsst ds Friti bis Sunnti hie ä berüehmte Märit isch v.a dr Nachtmatkt / Foodmarkt sig mega, lutem Reise füehrer.
Zersch si mir aber afä mau i üsi Feriewohnig - im 9Stock wo mir diräkt i Hafe abe hei gseh 🥰 wär ja aues schön u guet we mir nid jedesmau ä gfüeuti Ewigkeit ufe Lift müesste warte u we mir de no päch hei dä wo chunnt öppe no vou isch 🙈🙄
Nachdäm mir acho si u üs igrichtet hei ischs los gange uf dä Nightmarkt u es isch eifach Bombastisch gsi 🥰 - so viu Grüch, Grüsch, Farbe u Gschmäck 😍 mir si einisch meh begeisteret! Mir hei üs drdür probiert eifach gfragt: ,,whats that?,, ,,can i try?,, u dLüt hei mega freud gha 🥰 u meistens heisi üs no gad chli vo däm u no gad chli vo eim i packt... mir sägä nume: great things happen to those how ask... ✨️
Wemä öppis zässe het hockt mä eifach dert ufem grosse Platz ä Bode u issts ds gmüetlech 😅 auso mir si ja eh erstuunt wi suber u wi wenig küder dses hie augemein het gha 👍
Am nächste Tag het sich de dä Nightmarkt zum shopping paradies für üs Suvenirjäger entwicklet u mir hei haut nomau müesse ga Gäut wächsle 😂
Näbst au dene schnäppli, ischs eifach oh sehr interessant zgseh wie dses hie so funktioniert so heisi zum bispiu Näier wo ar Strass mit ihrere Maschine hocke u wo dLüt ihri kabutte sache bringe oder Hose zum umenäh u di mache ds hurti - uf dene aute dinger 😳
Am Nami si mir de a Tanjung Aru Beach - dr Stadtstrand. Strand u Wise mit Böim zum drunger chille, dLüt hei ihri Campingusrüstig drbi u machesechs öppe so gmüetlech wi mirs üs aube ar Seewise - teu hei sogar dr eiget Grill mitgno. Mir chilles hie chli u warte ufe Sunset.
Wos de isch zit worde, hei mit üs ir erste Reihe es Tischli gmietet u si mau ufd Suechi nachemne Bier - gar nid so eifach 🙈 i ha nähr eifach di Frou aghoue wo isch cho abkassiere für zTischli, di het ghändlet u grüeft u dr nächst het oh grüeft u ufzmau isch Mike the Draw (??was oh immer das söu heisse) da gsi - u dä het nähr für das kühle nass gluegt für üs dr ganz Abe 😅👍 äbä: great things happen .... 🍾
Si stöh hie so uf grossi verchleideti Lüt auso so trickfiumfigure irgendwie 😅 ufaufäu isch Dävu no chli atanzt worde vo somne rote Frösch 😂😅
oh hie het mä vo Stang zu stang chönne u eifach chli verschidnig ds ässe näh 🤩
Zum Sunset chunnt gfüeut di ganzi Stadt a Strand.. päärli, familys, gruppe vo fründe eifach aues tummletsech hie. Es wird gseifeplätterlet, gsandelet, Bäuellet u musig gmacht 🥰😍 ds tribe u di Stimmig het üs fasziniert... Mit öppe 100 verschidnige Farbe het sich hüt di Sunne bimne sagehafte touchdown verabschidet 🌅
Am nächste Tag si mir de no ga zmörgele i eim vo dene vilne Strasse beizli hei packt u si de nach gschlagnige 15!!!! Minute Wartezit füre Lift ines Grab-Taxi i gstige u zum Flughafe gfahre.... Ds Rili het 3kg meh i mim Rucksack... u Dävu 4kg😎😵 hoffentlech ligts am umpacke u nid ade Suvenirs🙈🙈
Üses Fazit vo Nordborneo:
- Grab, ds asiatische Uber isch mega gäbig
- Es isch mega suber
- dLüt si aui u fründlech u härzlech
- Es isch eifach zum reise
- Es het ä ungloublechi Tierwäut
- Ä Jagge bruchtmä nume im 7/11 ,,düü düü, düü düü,, (jede wo schomau i somne Lade isch gsi ghörts gad lüte😅)
- Kulinarisch ischs dr wahnsinn
- es isch wük günstig
- Irgendwi fähle chli d superlativ's zum ds würklech chönne zbeschribe
- Mir würde sofort widr ga!
bye bye Malaysia hello Indonesia 😍Read more
Tanjung Puting - Klotoktour ✨️
June 2, 2025 in Indonesia ⋅ ☁️ 30 °C
🌿🌳✨️in the jungle✨️🌿🌳
Da mir ja vo au dene Flüss u Seeä azoge wärde wi dFlöige vom Liecht, isch oh üse nächst Stopp widr amne Fluss - gneuer dr Sekonyer River im Tanjung Puting Nationalpark uf dr indonesische Site vo Borneo. Er verspricht üs es nächsts highlight ✨️🌍
Mir hei di Tour hie über Orangutanhouseboat-tour buechet bi Pardi. Zersch si mir mit ihm ids Office ga ä bewilligung mache für üsi Drohne 🛸 u de ischs scho los gange ufds Boot. WOW es isch besser aus erwartet! 🤩 i däm Boot wärde mir
jtz 4 Täg läbä es het Solarzelle füre Strom üses eigete Bett, üse Baukon mit ligistüu, chuchitisch, sogar ä duschi u wc hets 👍⛵️
Husni isch üse Guide für di Täg er isch vo afang ah grad sympatisch gsi. Er hets verstande wenn ds er üs mau chli muess la si u wenn dser meh aus wiukomme isch 🥰 er weiss genau wo härä stah für di perfekte Fotos u het Dävu chli im züg ume gjagt ,,Daaafu!! come come here is best place for photo,, 😂
Idr erste Stund hei mir de scho di erste drü freie Orangutans gseh u paar Naseaffe. Di si wük oh lustig u weme dene zueluegt geit ömu geng öppis 🐒
Dä Park wird oh gnützt zum uswildere vo Orangutans wo si hei ufpäppelet u pflegt. Es git hie ei Plattform wosi einisch am Tag no zwöi riise Jurteseck zässe häräbringe. Ds ,,feeding,, irgendwo im nirgendwo isch beidruckend - dOrangutans wüsses ja genau ds jtz de dr Ranger chunnt u wener chunnt de faht sich dr ganz Jungel um üs ume afa bewege u afa rüefe u di chöme vo überau - hüenerhuut pur 🥰✨️ mir hei 6Jungi zeut 2 bebe 4 toddler 😅 si si üs Mönsche würklech scho nach 😊 es isch sooo spannend däm Verhaute zue zluege. Lut Husni si di 6 aui im Nationalpark ufd Wäut cho u es heig no meh... es chöme nie aui au Tag. Im ganze Nationalpark hets ca 4000 Primate. U ds die so früschfröhlech Bebes mache, laht doch irgendwie la hoffe ds di Art s'schafft u cha erhaute blibe....
Aber zum ehrlech si si di würklech schöne Begägnige die womä nid vorusgseht ufzmau am Flussufer es jungs Mändli am schiuf ussuge oder we sich dWägä chrüze mitemne Wibli u irem Junge ufem Jungelhike 🥰
Wüu ja we dir zgfüu hei mir sige jtz da eifach paar Täg uf dr fule Hut glägä liget dir fautsch 😅 mir si au Tag abem Boot u ga ,,wandere,, da oh hie ä gfüeuti 300%egi Luftfüechtigjeit herrscht us drzue no über 30C isch si di Spaziergäng scho meh aus gnue asträngend u im wahrste Sinn vom Wort schweisstribend 😅
Dävu het sich de hie no ir praxis vom Fische mit dr Handleine chönne üebe u het auso sogar ä Sneakhead useghout - dCrew het üs dä am nächste Tag grillet 🎣
Vo üser Crew wärde mir sowieso geng mega bechocht ❣️ u si chöis ja chum fasse ds mir bim Tisch abruume häufe 😅 am Abe gits es Candellight diner in the middle of nowhere - es chönnt doch romantischer gar nid si 🥰😍🍾
Am Abe heisi üs de aube zMoskitonetz ufgmacht u mir si nachere chaute Duschi so richtig müed iz Bett gheit - Mit dene unändlech vile Grüsch wo dr Urwaud isech treit si mir de jewils igschlafe u am Morge ume erwachet ✨️
A eim vo dene Täg i däm Nationalpark hei mir de no mitemen angere chline Mönscheaff dörfe Bekanntschafft mache... mitem Gibbon 🥰
Öppis wo dMönscheaffe vo dä normale Affe abhet isch dr fählend Schwanz näbst no ganz viu angerne Sache... so het dr Oranguthan z.B 97% identischs erbguet mitem Mönsch 😳
Bim einmalige Stündli Rägä hei mir de üs chli ignuschet u chli gläse u es mittagsschläfli gmacht - wüu Natelele isch nüt da usse im Jungel - ds internet het hie no siner überschoubare Gränze u mir si eigendlech fasch geng offline gsi ☺️
Ufem Nighthike hei mir de lüüchtendi Skorpione, riise Ameisi schlafendi Vögu, widr mau ä Vipere, glowing mushrums u last but not least ,,la Tarantula,, gse 🤩😍
Am Abe im Bett het de Dävu so gseit: He gäu ds si scho so richtig richtig gueti Ferie 🥰 i ha nähr gseit ja würklech so richtig guet u weisch ds Beste isch es isch ja no nid fertig ✨️🥰🌍 u so hei mir mitemne Lächle im Gsicht ungerem Moskitonetz, bi liechtem buutele vo dä Wäue chönne ipfuse 🥰Read more
Komodonationalpark 🐲🦖
June 9, 2025 in Indonesia ⋅ ☁️ 29 °C
Di letschde Drache vo dr Wäut 🐲
Bi üsem nächste Stopp ziehts üs - wie chönnts oh anders si - widr az u ufds Wasser, gneuer ufnes Säguboot ir Floressee auso im Meer umä Kommodonationalpark 🐲🐢🐠🦇
Ahfange het aues zLabuam Bajo ir ,,Houptstadt,, vor Insle Flores. Mir si sehr positiv überrascht gsi wüu mir hei dänkt ja es isch ,,busy saison,, u es isch de sicher gstoosse vou aber es hetsech i Gränze gha u mir heis gnosse widr mau chli Bars, lädeli Pool mit Poolbar u haut so ds Ferieflair☺️
Am Tag X het üs de Obi üse Guide abghout u uf Gandiva auso uf ds Säguboot bracht - wunderschön u üses Zimmer - dr Wahnsinn 😍🤩 Mir hei ds scho im Dez buechet wo mir hei gwüsst ds mir ds mache - mir hei dänkt ja chum im Prehoneymoon chame sich ja oh mau öppis gönne 😎😍 Mir hei denn eigendlech wöue ä Privattourbueche aber ds isch de bi wiitem ztür gsi 🙈
Üsi befürchtig ds se da nume so influencer u Partygäst aus Gruppe si het sich nid bestätiget u mir hei veiechli ä zfridnegi Gseuschauft verwütscht - U glich hei i dene Täg dr eint oder anger ä übernahme übercho ds mir unghinderet hei chönne rede so isch zB us Matt nähr dr ,,Dräiverschluss, worde wüu mir sicher si er cha ke Zapfe usere Fläsche zie u muess haut dräi verschluss Fläsche choufe mit sine zwe lingge Händ 🤷♀️
Mir hei scho gmerkt ds mir eifach glich lieber allei ungerwägs si u chöi sägä ,,hie lenger blibe , hie wiitr ga ....usw,,
nach däm gmüetleche im Urwals ume tingele mit wük nume weni angere Mönsche, u wenn de eig geng Lüt wo haut ändlech druf si wi mir, hei mir chlinä Kulturshok gha wos nach 25min Schnorchle het gheisse ,,ok come on guys were going we dont have a lot of time...,, oder wo mä bim Mantapoint mit 100te vo angerne Lüt hät söue schnorchle (u Schnorchle chöi ja di nid aui gliich guet 🤨)
Würklech es isch gmeckeret ufme höche niveau wüu es isch eigendlech ä wunderschöni Tour gsi mit Schiudchröt, Delfine, 1000 egi vo Flughünd, dä letschde Drache vo dr Wäut dä Kommodowarane, Mantas, ä ungloublech wunderschöne Sunneufgäng amne würklech ungloublech schöne Ort, guetem food, iiisch chautem rose u wiiswii für zRili😎 chautem Bier für Dävu uf üsem private Baukon bi schöne Stärnenächt 🍻🥰✨️ u haut däm wahnsinns Zimmer 🤩🤩 Poo dä wo gfötelet het u di angere vor Crew hei sich oh aui Müeh gä wiverruckt - es isch eifach aues sehr düretacktet wases ja oh muess si mit 12Lüt. - Mir si üs das nach dene Superlative vo dä letschde 2Wuche eifach nid so gwahnet....
Was mä aber oh no muess erwähne, am letschde Tag vo dere Tour si mir ane Strand bimene Miniinseli u hei dert nähr mau chli ziit gha zum ad Sunne lige, kanule, standup paddle u schnorchle für üs - auso dUngerwasserwäut hie isch de scho grandios sooo viu Farbe! Sooo viu Fische - mir hei üs ganz vergässe im Wasser 🥰✨️
Drum es isch schön gsi u mir heis gnosse aber mir freue üs jtz no uf di letschdi Ettape widr für üs uf eigeti Fuscht ga d Wäut zentdecke öppis ganz anders ohni soviu Wasser 😅🛵🤩Read more
Rollertour
June 10, 2025 in Indonesia ⋅ ☀️ 26 °C
Nasigoreng - geit geng 🍲
Mir si z Labuan Bajo acho nach üser Komodotour u diräkt zum Roller verleih wo mir scho vorhär hei usfindig hmacht. Dä Verleih isch drum eine vo dä zwe einzige wo dRoller one way vermietet (die zfinde isch de no so challenging gsi 😅)
Mir hei dänkt nach au dene Tier wärs kuuhl ohno chli mit dä Lüt i Kontakt zcho - u das si mir so richtig wi no fasch niene vorhär 🥰
Auso los geits dRuckseck hinge druf bune u ab geits richtig Oste üses Ziu: i 10 Täg über di ganzi Insle chessle 🤩🛵 im ganze ca 640km.
Mir verzeue jtz nid vo jedem Stopp, aber mir si öppe bi dene Strasse - & dä Wätterverhäutnis u mit aune Stopps für esse, fötele, füdle usschüttle, bisle usw mitere durchschnittsgschwindigkeit vo 35kmh unherwägs gsi 🛵🌪️⚡
DInsle isch soooo grüen 🤩 Mir hei nid drmit grächnet ds mir da wük nomau dürne Jungel fahre soo soo schön! Aber ja es isch widr ä Rägäwaud, was bedütet zwüschine giessts wi us Chüble - mir hei aber ja ä Poncho drbi gha.
Wemä jtz au die lachende Gsichter, au die ,,Hellöu Miss,, & ,,Hellöu Mister,, rüef, au di afrage für Föteli, au die Chind wo eim hinhernache seckle für nes high five, au die Kusshänd wo eim zuegschosse wärde plus no dr Poncho wo hingerusechutet wines Cape zämä nimmt - de chunntmä sich chli vor wi Superman u Superwomen 🤩🦸♀️🦸♂️
Übernachtet hei mir i Homestays, wunderschöne Bungalows & Bed & Breakfests. Gässe hei mir entweder ds wo dGastfamiliene hei gchochet oder de si mir ufd Suechi nach emne Restaurant. Ds isch nid ganz eifach gsi mängisch wüu mä muess sägä weme us Labuab use fahrt steut dZiit zrügg... dr Tourist auso mir si ä Säuteheit 😅 Aber so es Nasigoreng chöi si auso oh sehr fein i dene Strassebeizli... drum we mir nüt gfunde hei hets Nasigoreng gä 😅🤷♀️
Am einte Ort hei mir zGfüeu gha, jtz hinech ischs de scho chli grösser 🫢🫣 ja nix da es het eifach 2 Restaurant gha mit Musig aber schüsch ischs wük es verschlaafnigs Fischerdörfli - u dä Boattrip wo mir dert hei gmacht drfür einzigartig u wunderschön mit zwe Fischer vom Ort wo sich hölle Müeh hei gä 🥰 - hidden paradise -
Für dHomestays hei mir so +/- 12.- inkl zmorge zaut für di meiste Bungalows +/- 20.- geng inkl. Zmorge 🥰
Znacht hei mir für Nasigoreng mit Spieguei u Wasser für beidi 3.- zaut u ds Bier je 2.50.- für ä grossi Fläsche. 🍻
Üsi Rollere - Hans u Willu - si im Härz eigendlech Crosstöffe 🏍 mit vore u hinge ärä super Fäderig... wüu ds würds eigendlech bruche bi dene Wägä hie 🤣
Ds Fahrerläbnis darfme hie nid vergässe ds erwähne... düre Jungel dür chlini mini Dörfli uf Serpetinestrasse uf Bachbetter bi Sunne u Rägä - aues isch drbi gsi 😅 Der Weg ist das Ziel!
Dävu fragt ja di Lüt geng ob er si darf fötele - (ehresach wi er meint) u hie wirdmä nähr grad zum Kaffi iglade u de chunnt no dr Ungle u dr Cusin cho luege 😅 da mir nid grad fliessend si i Indonesisch u ihri Englischkenntnis oh sehr bescheide si, isch dkommunination eher erschwärt. Aber Dävu het ihne nähr uf indonesisch bis 10 vorzeut (ds hei mir am Abe vorhär bi gnue Bier zämä glehrt 😂) u zRili het neui Tier glehrt:
Ular schlange, Gambing Geiss, Labalaba spinnele Tikus Muus 😅
nähr hei mir ihne no es Mood Stümpli aus Diräktimport vom Züriflughafe abotte hei sogseit ä Fridenspfiiffe groukt - bi ihne dahei ir Chuchi hei föteli gmacht u si de ume gange 😅😍
DKraterseeä vom Kelimutu hei üs am Sunrise begeisteret - wüu aus hätte mirs bsteut genau denn wo mir si dert gsi isch dSunne cho 🌤 ud Magie am morgefrüeh ufem Vulkan het üs widrmau umghoue ✨️
Üses Bungalow am schluss - so richtig honeymoon - het oh gha wases versproche het u öppis i dere Art hei mir beidi no nie gha 😍
Ja mir hei nähr no es Fürwärch der extra Klasse übercho vo däm Vulkan hie uf dr Insle. Dr Laki-laki het kilometer wiit gspöit u dr Flugverchehr lahm gleit.... ja jtz hocke mir hie üse Flug cancled... mir hei üs jtz es Taxi organisiert ds mir afä uf lebuan Bajo chöme (16h fahrt) .... Mir hoffe ds mir de üse hei Flug überchöme.... im Momänt steit ds jtz aber no ide Stärne ob de da überhoupt öppis flügt 🙈
Üsi Drohne isch gfloge u mir hei oh schüsch chlo gfiumet u ds mau zämä gschnitte für euch u üs müessts luege mit Ton!😉
Mit no ungwüsser Rückreis verabschide mir üs us dere Reis 🥰 einisch meh hei mir dPinguine nid gfunde aber mir si widr um einiges richer a Erfahrige u Erinnerige wo üsi Härz füuä ✨️✨️ Mir si so gärn ungerwägs u hei widrmau gmerkt ds mir eifach oh am liebste zämä ungerwägs si... wüu mir zwöi heis eifach überau schön zämä ✨️🥰😍Read more
TravelerWunderschöön 😍 u di letschte Wort si doch genau die wo mä bire Honeymoon wot schribe 🥰😍 viu Liebi für öich zwöi ❤️ u gueti Heireis 🙏🏻
