Tyhjennä haku
Meland s Afrikareis
  • Meland s Wältreis
  • Andrea Bischof
  • Meland s Wältreis
  • Andrea Bischof

Meland s Afrikareis

145-päiväinen seikkaillu — Meland s Wältreis & Andrea Lue lisää
SeuraaYhteenvetoYhteenvetoKalenteriKalenteriValokuvatValokuvatJaaJaaToivelista
Uusin ensin
  • Meland s Afrikareis
    Capetown / unsere neue Flizzer dr Ford
    Seebär in Capetown"Highway" to the HellHighway, und Teetime in the HellUnterwägs uff em HighwayUswäg uss dr Höll😉

    „Highway“ to Hell

    3. maaliskuuta 2021, Etelä-Afrikka ⋅ ☀️ 27 °C

    In Capetown hän mr nach südafrikanischem Deal :-) unser grosses 4WD Auto abgholt und hän no es paar Dääg d’Stadt gnosse.
    Deal dorum: Mir hän genau es Auto usgseucht ( E Toyota Fortuner) und zahlt.
    Wo mr im Depot am Flughafe ako sin hän sie uns s’Auto ganz genau erklärt, aber wie me s’4WD benutzt hän sie nit erwähnt. Wo denn d’Andrea sie druff agsproche het, hän sie gseit, ah 4WD het das Auto nit, es duet ihne sehr leid, aber hüt hän sie kei 4WD Auto zur Verfüegig.🙈😳 Thats South African.
    So hän mir abgmacht dass mr am nöggschte Daag dr 4WD bekömme. Das het au klappt, es isch zwar e Ford Everest, aber mir sin zfriede drmit.

    Unseri Reis goht wieder in Norde, s’Ziel öbbe inere Wuche isch Namibia.
    Eimol meh hän mr e Zwüschestop bi dr Renate und em Michi in Prince Albert gmacht. Es isch scho e bitz wie es Heicho.
    Do mr jetzt e Allradauto hän, hän mr dr „ Highway“ in the Hell könne woge😉.
    Via Swartbergpass isch dr Abzwieger links in „Die Hel“ abboge. D’Stroos isch vo Gravel über Stei, Sand, Wasser durch Täler und sehr steil über Päss gange. Es isch e rächtigi Useforferig gsi, d’Stroos isch amigs genau so breit gsi wies Auto, und für 37 km brucht me gueti 2h bis me hinde im Tal isch. S’Tal isch 20km lang und öbbe 600m breit, bekannt au als Gamkaskloof.
    D’Bewohner im 1840 hän dört hinde gläbt und Abaut. Mit ere Karavane vo Esel sin sie tagelang übere Pass nach Prince Albert gloffe, zum Rohmaterial zum bauen go hole.
    Vo dr Regierig hän sie denn e Stroos beatreit in ihres Tal, die hän sie im Johr 1962 au beko. Einestages wo e Tierinspektor het miesse ins Tal fahre het er bi Akunft gseit, dass sini Fahrt do hintere d’Höll gsi isch. Dorum het s’Tal dr Übername „the Hell“ beko.

    Als Fahrer goht me scho kli dur d’Höll und muess sich total uff d’Stroos konzentriere. Als Bifahrer ka me e wunderschöni Natur gniesse vo Blueme, Strücher bis zur karge Steilandschaft.
    E wahnsinns Witsicht über die Täler und Bärge.
    S’Gamkaskloof-Tal stoht hüt unter Denkmolschutz.    Lue lisää

    Katso käännös
  • Meland s Afrikareis
    Augrabiesfall
    1unsere Parkwächter uff em AutodachKokerboomLandschaft im AugrabiesparkStrooseabschnitt dure Parkan ihm hän mr au vrbi miese

    Augrabie und Kgalagadi

    8. maaliskuuta 2021, Etelä-Afrikka ⋅ ☀️ 28 °C

    Upington isch unsere nöggscht Stop gsi.
    Mir hän e schöni Lodge diräkt am Oranje River gfunde.
    Vo Upington us sin mr in Augrabies Falls National Park. S’Highlight isch dr bis zu 150m Breiti und 52m in d’Tiefi stürzendi Augrabies Wasserfall. Dr Fluss Oranje het sehr viel Wasser vom viele Räge und em Zyklon. Dämentsprächend isch dr Wasserfall gigantisch.
    Het viel Wasser und het die 150m Breiti fascht erreicht.
    Während däm mir z’Fuess sin go dr Wasserfall aluege, het e Monkey unsere Ford bewacht. Vom Autodach us het dä wo mr hän welle istiege unser Auto gege uns verteidigt 😂.
    Uffere Rundfahrt im Nationalpark begegnet me vielne verschiedene Landschafte. Sälbst d’Stroos durch dr Park isch zum Teil unter Wasser gstande.
    Do obe im Northern Cape findet me au dr spezielli Kokerboom, Köcherbaum. Dä gits nur do obe und in Namibia. Isch dr Nationalbaum vo Namibia. Dr Kokerboom ghört zu dr Gattig vo de Aloe Pflanze. Dr Name kunnt vo de Uriwohner, de Sans. Sie hän us em Geäst „ Köcher“ gmacht für ihri Pfil wo sie bruch hän zum jage.

    In Upington hän mir miese e Coronatest mache, damit mr über d’Gränze könne nach Namibia.
    Bis mr s’Resultat vom Test hän sin mr witer uffe zum Kgalagadi Nationalpark gfahre.
    Scho d Fahrt dört hi isch sehr idrücklig gsi.
    Luter roti hochi Sanddüne wo zur Zit dicht bewachse sin mit Gras, dank em viele Räge.
    Übernachtet hän mr imene Camp uff de Düne. Dr Sunneuffgang, Sunneuntergang und in dr Nacht dr Stärnehimmel sin unbeschrieblich schön.
    Dure Tag sin mr ins gränzüberschrittendi ( e Teil isch in Botswana) Naturschutzgebiet in dr Kalahariwüesti, dr Kgalagadi Transfrontier Nationalpark.
    Me muess e 4WD Auto ha, denn d’Stroose sin alli us Stei oder/und Sand. Mir hän im Park au kli Luft uss de Pneus miesse useloh, es sin nur 1,6 bar Reifedruck erlaubt. Einersits het me mit däm niedere Pneudruck e bessere Halt uff dr Stross und anderersits belaschtets d‘Sandpischte weniger, das hän si uns zumindescht verzellt.
    Aber ebbe, vo dr Wüesti hän mr nit viel gseh. S’Gras isch sehr hoch gsi und alles sehr grien.
    Mir hän wieder e huffe Tier könne beobachte und gniesse, stuuundelang!
    Jede Obe um die glichi Zit isch uns e Emu uff sinere Oberundi bi unserem Hüüsli ko e Bsuech abstatte. (Was e Emu in Südafrika macht, isch uns au es Rätsel). Dr Emu het e weneli vo unserem Gmies beko und het dr Andrea uss dr Hand gfrässe.    Lue lisää

    Katso käännös
  • Meland s Afrikareis
    GrünauKokerboomwald ( und e Köcher , links Obe)Dolerite HillsGepardeme ka au Musik mache uff de Dolorite.

    Welcome to Namibia

    14. maaliskuuta 2021, Namibia ⋅ ⛅ 30 °C

    Am 12. März hän mr Südafrika verloh und sin uff Namibia igreist.
    In Nakop, ere Grenzkontrolle vo Südafrika, hän mr miese x Formular ussfülle, wieso, wurum, wohi, wielang, mit wäm, wie, wo..... alles hän sie welle wüsse. Denn hän mr trotz em negative Coronatest miese x mol bestätige das mr gsund sin. Und das zum dr Stämpfel zum Usreise in Pass z’beko.
    Nach es paar Kilometer Fahrt sin mr denn an die Namibischi Gränze ko. Dört hän mr miese x Formular usfülle, wieso, wurum, wielang, wohi, mit wäm, wie , wo..... au do hän mr miese e Gsundheitscheck mache.
    Ändligg nach öbbe 2h hän mr könne über d’Gränze fahre und dä Stämpfel im Pass gha. Ah und mir hän niene miese ahstoh, die 2h sin also wenns keini Lüt het wo über Gränze wänn.🙈😳

    In Grünau hän mr e Overnight-Stop gmacht. E Farmhouse umegäh vo nüt. Es isch wunderschön gsi, dr Sunneuffgang und die Witti zgniesse. Namibia isch zur Zit sehr grien. Es het sit 9 Johr nümmi richtig grägnet, und jetzt hets ändligg Räge gäh.
    Witer nach Keetmanshoop wo mr dr Giel bsuecht hän. Er läbt uffere Farm wo me uff sim Land Mesosaurier Fossilie gfunde het. Sehr spannendi Gschichte wo er uns verzellt het.
    Er het au e huffe Kokerbooms uff sinere Farm und Steihüffe. Die Steihüffe nennt me „Dolerite Hills“ .
    Die gröschti Verbreitig isch im südliche Afrika, Südamerika und Antarktis. Die sin alli mol zämeghange als Gondwana. Wo denn Gondwana zerbroche isch hän die Teil e heftige Magmaastieg und Vulkanismus erläbt. Und stoh blibe sin die Dolerite.
    Es het ganzi Landschafte voll mit de Dolerite.
    Au in dr nöchi isch dr Kokerboomwald. Kokerbooms wachse meistens vereinzlet, aber es git au verinzelti Wälder. D Bäumä sin 200-300 Johr alt.
    Uff ere andere Farm läbe 2 Geparde. Sie sin als Baby ( Hän ihres Mami verlore) dört uffzoge worde und sin handzahm.
    Am Obe wärde sie gfuetteret und gniesse Stricheleinheite. E wunderschöni Katz!    Lue lisää

    Katso käännös
  • Meland s Afrikareis
    Sand wo über d Stroos fägt
    Lüderitz1Diaz Point, seehr windig

    Lüderitz

    16. maaliskuuta 2021, Namibia ⋅ ☀️ 22 °C

    Vo Keetmanshoop sin mr an d’Küste uff Lüderitz gfahre. Dr Name Lüderitz dütet wie so viel in Namibia uff die dütschi Kolonialzit hi.
    Scho dr Wäg dohi isch e Erläbnis gsi. Me fahrt eifach durch d’Wüesti. Dr Sand wird vom Wind nur so über d’Stroose gfägt.
    Me begenet wilde Ross und ab und zue mol emen Oryx.
    Vo Lüderitz us hän mr e Tagesusflug ind Geisterstadt „Kolmanskop“ in dr Wüesti gmacht.
    Wo me 1908 vo Aus nach Lüderitz e Isebahnstrecki baut het, isch me per Zuefall uff Diamante gstoose. Mit däm Richtum vo de Diamante isch e ganzi Bergstadt entstande mit ca. 400 Iwohner. Es het gar nüt gäh dört, weder Wasser, no Erde zum apflanze. Me het alles miese importiere vo Kapstadt und Europa.
    Die Stadt het alles gha, e Spital, mit em erschte Röntgeapparat vo ganz Afrika. (Dä het me jedoch nit brucht wäge Knochebrüch, sondern zum d’Mensche durchlüchte, damit sie keine Diamante stähle.)
    E Isfabrik, zu Herstellig vo Blockis, für Isschränk.
    e Elektrizitätswärk, e Casino, Schuel, Kegelbahn....
    Kolmanskop isch die richschti Stadt in Afrika gsi.
    Aber das het e End gha wo die noche Diamantfälder alli abbaut gsih sin und me im Delta vom Oranje River grösseri Diamante gfunde het. D’Diamantförderig het sich immer witer nach Süde verlageret wo au hüt no Diamante abbaut wärde. Dorum isch an dr Westküste vo Namibia so e grosses Sperrgebiet, wäge de Diamante. Kolmanskop isch verloh und vom Sand ignoh worde.
    Witer sin mr no gfahre zum „Diaz Point“ . Es isch e Zipefel vo dr Halbinsle vo Lüderitz.
    Dr portugiesischi Seefahrer und Weltentdecker Bartolomeu Dias isch do, nachdäm er s’Kap der guten Hoffnung umrundet het, an Land gange. Er isch dr erschti Europäer wo do dr afrikanisch Bode beträte het.
    Vo dört us het me e tolli Ussicht uff dr stürmischi Atlantik. Es het extrem fest gwindet.
    D’Gschicht vo und um d ä’Stadt Lüderitz sin sehr spannend gsi.    Lue lisää

    Katso käännös
  • Meland s Afrikareis
    Schloss Duwisib
    on the RoadSanddüne vo Sossusvlei1Death Valley (obe) Sossusvlei mit WasserSesriem Canyon

    Duwisib und Sossusvlei

    21. maaliskuuta 2021, Namibia ⋅ ☀️ 32 °C

    Uff em Wäg vo Keetmanshoop nach Sossusvlei hän mr e Zwüschestopp bim Jochen gmacht, bim Schloss Duwisib. Er isch dr Bsitzer vo dr Farm und em Guesthouse näbem Schloss. Es isch sehr schön dört, Natur pur und wit und breit nüt anders. Dr Jochen isch zwar Namibier aber sini Vorfahre sin Dütschi wo sich in Namibia niedergloh hän. Er ka perfäkt dütsch.
    Es sin 2 tolli Dääg gsi und dr Jochen het uns sehr viel über Namibia, d’Apardheit, s’Läbe do und viel anderi Gschicht verzellt. S’Nachtässe het er persönlig kocht, Landesspezialitäte. Sooo lecker.
    Er het au Fründe z’Bsuech gha, unteranderem es Ehepaar wo sie vo Basel kunnt und er vo Dütschland. Sin aber vor Johrzähnt usgwanderet uff Namibia. Es sin wirkligg sehr tolli und langi Öbe gsi, mit spannende Gschichte!
    Klar sin mr au s’Schloss Duwisib go aluege. Dass isch vom Baron Hansheinrich von Wolf baut worde. Er het dört inne mit sinere Frau vo 1909 a gläbt. Leider nit sehr lang. Im 1. Wältkrieg isch är izoge worde und isch gfalle. Zu sinere Läbzit het är sehr viel Tier gha und grossi Feschter gfiirt in däm Schloss.

    Witer sin mr zu de Sanddüne nach Sossusvlei. Isch zwar e Distanz vo nume 160km. Aber mehr wie 50-80km/h ka me uff dene Schotter, Stei und Sandstroose nit fahre. Aber macht nüt, denn d’Landschaft isch traumhaft schön.
    Wo mr ako sin, sin mr bitz überforderet gsi, denn mr hän e Lodge diräkt vorem Igang zum Park wo die riese Sanddüne sin. Do am 21. März Namibia dr Unabhängigkeitsdaag fiirt (sit em 21. März 1990 isch Namibia e eigens Land, trennt vo Südafrika) hets total viel Lüüt gha.
    Frieh am Morge sin mr zu de Düne gfahre und hän die riese rote Sandhüffe in dr Morgesunne könne bestuune und bestiege. Die höchsti Düne isch 320m hoch.
    Z’hinderst im Tal befindet sichs „ Death Valley“.
    In Sossuvlei sin mr uff Wasser gstoose. Das isch e totali Sälteheit und sit 10 Johr nieme dr Fall gsi.

    Dr Sesriem Canyon befindet sich am Afang vo de Düne. Isch öbbe 5 Millione Johr alt.
    Me ka im Canyon laufe und au do sin mr uff Wasser gstoose. So viel, dass es au für Namibier e Highlight isch, sit Johrzähnt hets nümi so vyyl Wasser kah, sie sin sogar go bade.

    Do no es paar Fakte zu Namibia:
    S’Land isch meh als dopplet so gross wie Dütschland und het nur grad 2,5 Mio. Iwohner. (Verglich zu Dütschland dört Läbe ca. 80 Mio. Ihwohner).
    Isch 1804 vo de Dütsche in Besitz gnoh worde. Nach em 1. Weltkrieg het Südwestafrika denn ofiziell zu Südafrika ghört und me het de Dütsche s’Mandat entzoge. In dr Übergangszit zur Unabhängigkeit het mes den Südwestafrika- Namibia gnennt. Und sit dr Unabhängigkeit isch es eifach nur no Namibia.
    Namibia isch abgleitet vo „the Namib Desert“ die ältischti Wüesti uff dr Wält.    Lue lisää

    Katso käännös
  • Meland s Afrikareis
    Gecko Camp/ die Junge Webervögel wo Fuetter bekömme.
    Namib GeckoZwergpuffottere, e bitz giftigS Wüestecameleond Wüesti mit em gälbe Sande Daag uff em Katamaran

    Swakopmund

    26. maaliskuuta 2021, Namibia ⋅ ⛅ 18 °C

    Vo de Düne sin mr witer richtig Küste. Hän e Stop gmacht im Camp Gecko. Es isch e wunderschöne Camp Platz, rundum nume Natur. Mir hän dört inere Art Huuszält übernachtet. Es het kei Elektrisch gäh, kei Telefonnetz....
    S’Wasser muess me mit Füür warm mache zum dusche. Fascht kli Alphütte-Feeling.
    Am Nomidaag hän mir is mit e paar Öpfel uff d’Suechi nach de Wilpfärd gmacht und hän si in dr Nöchi vom Wasserloch gfunde. Sie sin sehr schüch gsih, hän is denn die Öpfel aber doch zur Hand uss gfrässe. Sin so schöni Tier.
    Am Obe hän mir s’Znachtässe überem Füür kocht. In dr Nacht hän mr e wunderschöne Stärnehimmel gha und e huffe Tier ghört, wie Hyäne, Koyote, Warzeschwein und Wildpferd. Am Morge sin mr rächtzitig zur Dämmerig🙈 vo de kleine Wäbervögeli im Näscht (am Baum grad näbem Zält) vo ihrem Hungergequitsche gweckt worde.

    D’Fahrt an d’Küste isch wieder sehr abwächsligsriich gsi, vo Sanddüne über e Nationalpark mit viel Oryx und Zebras, über Mondlandschafte bis in d’Stadt.
    An dr Küste in Swakopmund isch es grad öbbe 15 Grad kälter und mir hän die lange Kleider uspackt. Swakopmund isch die 2. gröschti Stadt in Namibia, nach dr Hauptstadt Windhoek.
    Vo do us hän mr d’Wüesti genauer unter d’Lupe gnoh und sin uff e „Living Desert Tour“.
    Dr Sand do isch gälb, isch aber die glich Wüesti wie bi Sossusvlei. Dr Sand do isch weniger alt und mit weniger Hitz konfrontiert. Dä Sand in Sossusvlei isch Millione vo Johr alt und wird täglich mit über 40 Grad uffgwärmt. Dorum isch dä dört rot und dr Sand do gälb.
    Me stoht zmittst in de Sanddüne und het s’Gfühl do ka jo gar nüt läbe. Doch ca. jede 3. Meter läbt es Tier uff oder unterem Sand.
    Ernähre düen sich die kleine Tier wie Käfer vo Same und Gras wo dr Wind vom landesinnere über Düne wait. Die grössere Tier ernähre sich denn vo de Käfer..... e Kreislauf also. Durch dr vili Näbel wird Kondänswasser bildet wo Flüssigkeit git für die Läbewäse. Denn au do rägnets öbbe 3 Dääg in 9 Johr.
    dr Namib Gecko isch nachtaktiv und me seht dä Gecko so guet wie nie do er sich e Gang im Sand duet grabe und unterem Sand duet pfuuse.
    D’Zwärgpuffottere hätte mir au niemols gseh wenn me nit wüsst wo. Sie duet sich total im Sand vergrabe und nur d’Auge luege use. Sie isch perfäggt tarnt. Ihre Schwanz isch schwarz zum d’Eidechse alocke. Denn dä streckt d’Schlange zum Sand us und bewegt en hi und här. Ihri Beute meint so es sig e Wurm und renne zu dr Schlange ahne.
    Imene Busch uff dr Düne hän mr e Wüestecameleon entdeckt. Au das perfeggt tarnt und seht us wie e Ast. Ihri Auge könne sie 360 Grad dreihe und mit je eme Aug ine anderi Richtig luege.
    Näbe ganz viel Käfer und Insekte hän mr au sehr viel Spure im Sand kenneglernt. Es isch sooo spannend gsi!
    Am nöggschte Daag sin mr miteme Katamaran use uffs Meer. Begleitet vo Seebäre und Pelikane wo immer wieder uffs Boot ko sin. Nodürlig hän si au e paar Fisch zum frässe bikoh. Wenn me ihne dr Fisch Schwanz vorah ins Muul git dien sie ihn zerscht umdreie, sie schlugge d‘Fisch nur Kopf vora, damit sie guet dr Hals ab rutsche.
    Mir hän viel erfahre über d’Austerezucht, sige schins die Bescht do und sie wärde bis uff Europa glieferet. Natürligg häts au e Kostprob gäh, nur bekömme mir 2 so Austere nit dr Hals ab😳.    Lue lisää

    Katso käännös
  • Meland s Afrikareis
    Cape Cross
    am Körpertemperatur reguliere2wanderig im Flussbett zu dr White LadyUnterwägs, verkaufe sie verschieden Stei an sehr ifallsriche StändVingerklip und die mega tolli Wittiunseri kleine Mitbewohner, Felseratte.Giraffe näbem Vingerklip;-)1Amarula Song

    Cape Cross via White Lady zum Vingerklip

    31. maaliskuuta 2021, Namibia ⋅ ⛅ 26 °C

    Vo Swakopmund sin mr uff Hentjes Bay und von dört us zum Cape Cross.
    Dört läbe 250‘000 Seebäre. Die gröschti Bruet-Kolonie uff dr Wält. E riese Lärm wenn me zmittst inne stoht und dr Duft vo dene Seebäre isch sehr dominant, also s’stinkt. Die ganz Küste isch eifach voll. Es git dört e Stäg wo me könnt e Stück entlang laufe, aber dä hän d‘Seebäre inzwüsche ignoh.
    D’Seebäre hän 2 Schichte Hoor und e diggi Fettschicht wo se warm haltet im kalte Atlantik. Die üsseri Hoorschicht het e wasserdichti Beschichtig, so dass die unteri Hoorschicht nit nass wird. Wenn me se denn seht im Sand oder uff eme Stei flaniere und ihri kum bedeckte Flosse in Wind hebe, denn reguliere sie so ihri Körpertemperatur. Das isch also denn kei Winke.🙈
    Nach däm Bsuech hän mr also miese go dusche, mit Kleider😂.

    Witer sin mr ins Landersinnnere wos grad wieder
    15 Grad wärmer gsi isch. Bi dr White Lady hän mr unser Baumzelt bezoge und sin uff d’Spure vo de Bushmen. Mit eme Guide sin mr im Flussbett vom Ugab River (dr Fluss het aber sit 6 Johr kei Wasser me) entlang gloffe bis mr uff Felsmolereie vo de Bushmen gstosse sin. Die sin 2000 - 5000 Johr alt. Unter dene Molereie isch d’White Lady abbildet. Die Felse liege im Gebirge vom Brandberg und dr höchsti Gipfel isch dr Königstein mit 2573m.ü.M. Dr högschti Berg in Namibia.
    Bim Nachtässe hän uns die iheimische und Lodgemitarbeiter no iheimischi Lieder gsunge. Dass isch scho schön an däm Volk do, sie sin sehr ufgstellt, fründlich und singe und tanze.
    Am Obe hets denn grägnet und rächt gstürmt. E riese Abentüür in somene Baumzelt.😳🤪.

    Witer über Schotter, Sand und Stei sin mr zum Vingerklip.
    Das isch e vom Wind und Wetter gformte riesige Sandstei uffeme Hügeli, wo usseht wie e Finger. Dr bekanntischti Stei in Namibia. Es het sehr viel Stei und Felse wo do usem nüt rage und so tolli Forme hän. Es isch sehr imposant und idrücklig was unseri Natur z’biete het.
    Rund ume hets viel Büsch und Bäum, Zebras, Giraffe, Kudus und Antilope. Uff unserem Hiking Walk sin mr de Giraffe begegnet. Isch rächt toll wenn me eifach vor somene riese Tier stoht.
    Au innerhalb vo dr Lodge hets e hufe Tier. Bi uns uff dr Terasse in de Stei wohnt d‘Mame Felseratte mit ihre zwei Babies. Und am Pool isch immer vyyl Vogelbetrieb gsih. Sie sin koh dringge oder au koh e Bad näh, isch herrlig gsih zum zueluege.    Lue lisää

    Katso käännös
  • Meland s Afrikareis
    e GabelrackeSteppezebraKapgeier - nach em Bade am Lufttrockne

    Etosha

    5. huhtikuuta 2021, Namibia ⋅ ⛅ 30 °C

    Dr Etosha Nationalpark isch unser nöggscht Ziel.
    Dä Nationalpark isch 22’912 km2 gross. „Etosha“ heisst ‚Grosser Weisser Platz‘ und isch im Johr 1907 gründet worde. D’Etosha Pfanne mit ere Grössi vo 4’731 km2, isch e See gsi, wo vor Millione vo Johr ustrocknet isch.
    Dr Park isch zur Zit so grien und het so viel Wasser wie scho lang nüm. Sälbst Namibier hän dr Etosha sälte oder nie so grien erläbt. Gwüssi Stroose sin gsperrt will sie überfluetet sin. Uff de andere muess me durch riese Pfütze fahre. Es het so viel Gras und Büsch, dass es sehr schwierig isch d’Tier zgseh und zfinde, denn d’Wasserlöcher sin leer.
    Bitz Glück hän mr gha und es Nashorn isch uns übere Wäg gloffe, e Elefant het dr Verkehr total blockiert uff sim Obespaziergang uff dr Stroos. E huffe Antilope, Zebras, Ärdhörnli und Vögel hän mr könne beobachte. D‘Antilope und d’Zebras hän e hufe Jungi, die hän oft Seich im Kopf. Isch schön zum Gseh wie si d‘Zyt vom Überfluss gniesse und eifach Freud hän am umerenne und sich gegesitig z‘zickle.    Lue lisää

    Katso käännös
  • Meland s Afrikareis
    Hüttli us Stroh und Lehm, d Fraue trage alles uff em Kopf,E Bueb im Einbaumkanu am fische
    Mahangu: Wird in grosse gflochtene Körb ufbewahrt. Mörser zum drösche.Okanvango River, Kuehhärde,HippospureUff dr Bootsfahrt, mit dr BesatzigHippos an Land bim grase

    Sambesi- Streife (Caprivistreife)

    9. huhtikuuta 2021, Namibia ⋅ ☀️ 28 °C

    Unterwägs in Norde hän mr e Overnightstop in dr nöchi vo Rundu gmacht. Imene Zält am Fluss hän mr in dr Nacht einigi Hippos ghört.

    Mir sin ganz im Norde ako, bim Okavango River.
    Im sogenannte Sambesi oder Caprivi- Streife.
    Dr Okavango Fluss isch ca. 1’700km lang, fliesst vo Angola, durch Namibia uff Botswana.
    Dr Norde isch sehr grien und am dichtischte Besiedlet vom ganze Land. Es het ei Dörfli nachem andere, d’Mensch läbe sehr sehr eifach. Sie hän Hüttli us Stroh und Lehm oder Wällbläch. Me nennt die Bevölkerigsgruppe „Kavangos“ (git 12 verschiedeni Bevölkerigs-, Kulturgruppe).
    Wasser hole sie mit Kanister an Wasserstelle, wo zum Teil kilometerwit wäg sin. Elektrizität hän sie keini. Es wird mit Füür kocht und im Winter au gheizt. Denn es ka do im Winter bis zu Minustemperature gäh in dr Nacht.
    Es het e Huffe wo e Härde Rinder besitze, dass bedütet Wohlhabe. Zu Fiirlichkeite wird e Muni gschlachtet und zumene Festmohl verarbeitet.
    Es giht viel Mahangufälder, Getreide wo sie imene grosse Mörser vo Hand dräsche und zu Mehl verarbeite wo sie denn Brei drvo koche. Das isch d Hauptnahrig vo me als d Hälfti vo dr Bevölkerig in Namibia.
    D’Kinder göhn in d’Schuel, jedes Dorf het die eigene Schueluniforme.
    D’Arbet hän viel durch Covid verlore (78% Arbetsloosi). Die meiste schaffe für dr Tourismus und sin Monatelang wäg vo dr Familie.
    Es läbe wie mir uns das nit könne vorstelle!
    Trotz allem strahle die Mensch e Zfriedeheit uss, sind sehr mit ihrem Land und Natur verbunde und immer sehr fründlig und hilfsbereit.

    Mir hän uns diräkt am Fluss e Lodgezimmer igrichtet. Zum Zmorge sin mr mit em Floos uff em Fluss gsi. Hän e huffe Hippos könne beobachte, Krokodil und viel Vögel.
    Am andere Ufer hets e Salzstei gha, wo einigi Tier wie Elefante, Antilope und sogar Leue azoge het, und mir stundelang hän könne beobachte.
    Spöter am Daag sin denn d’Hippos au an Land go grase, direkt vor unserne Auge.
    Dure Bwabwata Nationalpark sin mr gfahre und hän wieder e huffe Zebras, Antilope, Warzeschwein und zahlrichi Vögel gseh.
    Am Obe uff em Dinnerfloos sin mr uffere Sandinsle gstrandet, hän dört es Füür gmacht, dr Sunneuntergang gnosse, dr Natur zuegloost und denn au dr mega schöni Sternehimmel beobachtet.    Lue lisää

    Katso käännös
  • Meland s Afrikareis
    Meteroit Hoba
    WaterbergWanderig im Tal, rächts dr Wanderwäg oder doch nur e Spur vomene Kudu?🤔Rhinosafari(hän dörfe usem Auto stiege;-)1dr BullUssicht vom Plateau uss, dr Wäg wo mr uffe klätteret sin

    Waterberg

    13. huhtikuuta 2021, Namibia ⋅ ☀️ 25 °C

    Unterwägs sin mr zum Hoba Meteroit. Isch dr gröscht uff dr Welt und 1920 entdeckt worde. Er bestoht us 82,4% Eisen, 16.4% Nickel und 0,76% us Kobalt und witeri Spureelemänt. Er isch ca. 50 Tonne schwer. Muess rächt knallt ha wo dä vor ca. 80’000 Joor uff dr Erde glandet isch.

    Witer sin mr gfahre zum Waterberg.
    Dr Waterberg isch e markante Tafelberg und am westliche Rand vo dr Kalahari.
    S’Waterberg Plateau isch 48 km lang und 15 km breit. Für namibischi Verhältnis rägnets oft, die 200m hoche Sandstei speicheret s’Rägewasser und schaffe mit ihrne Quelle e Paradies für Tier und Pflanze.
    Au schriebt die groosi Schlacht 1904 am Waterberg gschicht. E Kolonialkrieg zwüsche de Hereros und de Dütsche-Südwestafrikaner.

    S’Gebiet ume und uff emWaterberg isch e Nationalpark. Es het e huffe Tier und uff dr Rhino Safari hän mr d’White Rhinos (Breitmuulnashörner) vo nochem dörfe kennelerne. Sie wärde dört durch Ranger bewacht, damit Wilderer d ä’Tier wägem Horn nit töte. Was leider in ganz Afrika immer und immer wieder vorkunnt. Es sin riese Tier und könne trotz ihrne 1-2 Tonne Gwicht bis zu 35km/h renne. Sie sehn nit guet und ihr Horn isch bitz wie ihres Aug, mit däm taschte sie sich vora.

    Me ka sehr schöni Wanderige mache im Tal vom Waterberg. D’Wäg sin zwar bitz überwachse gsi mit Büsch und Gras und au nit immer eifach z’finde. Aber so e wildi Wanderig isch au e Abentüür, hän viel Antilope gseh, Paviane, Schlange, Vögel, Spinne und Mosquitos.

    Mitem Ranger sin mr au uffs Plateau uffe klätteret und hän die wahnsinns schöni Ussicht gnosse. Er het uns Spure vo de Rhinos zeigt und viel vo sim Volk de Hereros und sim Läbe do verzellt:
    Zum Bispiel, dass Kinder in sim Dorf und au suscht im Land d’Tier vo Afrika, also e Kudu, Giraff, Nashorn, Elefant, Leu.....nie wirkligg gsehn. Denn die Tier läbe alli in Wildreservat oder Nationalparks. In Private (wo Lodges stöhn für d’Touriste und Game Drives abote wärde) oder staatlichi wie dr Etosha Park. Do die Völker kei Geld hän, könne sie sich e Bsuche in die Reservats nit leiste und gsehn die Tier wo im eigene Land läbe nit. Er seit, er ka sich glücklich schätze het er e Job in der Lodge, so seht er die Tier, und ka sine Kinder wenigstens verzelle drvo.    Lue lisää

    Katso käännös
  • Meland s Afrikareis
    Windhoek
    Christuskirchedr Igang zur Arnhem HöhliFlädermüüssooo dräckig

    Windhoek

    17. huhtikuuta 2021, Namibia ⋅ ☀️ 25 °C

    Wiedermol inere Stadt, mir sin fascht bitz überforderet gsi mit so viel Mensche und Autos🙈.
    Windhoek isch d’Hauptstadt vo Namibia und het 323‘000 Ihwohner.
    Mir sin e bitz durch d’Stadt gschlenderet und sin go Italiänisch und Chinesisch ässe😂.
    Mir hän uns imene kleine Hostel iquartiert ( d’Bsitzer hän mr im Caprivi obe kenneglernt).
    Im Hostel hets no einigi anderi Reisendi gha uss dr ganze Wält. Es sin e paar luschtigi und spannendi Bekanntschafte gsi.
    Ei unvergässlichi Bekanntschaft isch dr 12 jährig Mikel gsi. Wo mir dur d’Stadt gschlenderet sin isch er uff uns zue ko. Er möcht kei Geld vo uns, er möcht nur Porrige. Mir hän ihm erklärt dass mr kei Porrige drbi hän. Do meint er, er würd mit uns in nöggscht Lade zum Porrige kaufe. Er wohnt 3h Fuessmarsch usserhalb vo dr Stadt mit sinere Grossmuetter und de 2 jüngere Gschwüsterte. Er
    goht ind Schuel, aber das ka er nit jede Tag, denn er muess luege dass si Familie öbbis zum Ässe het.
    Ich bi denn mit ihm in nöggscht Shoprite (e Supermarkt), dört het er es Wägeli gnoh und isch diräkt zum Abteil wo s‘Porrige isch. Er het e 5 kg Sagg in Wage do, ich ha denn gseit er ka nomol e Sagg näh. Mit däm 10 kg Sagg sin mr an d’Kasse, hän zahlt, er het die 10 Kg bugglet het zu mir gseit: „God bless you Mme and thank you“, und denn uff dr Stroos abboge, uff e 3h Fuessmarsch in sis Dorf.

    Es paar Kilometer usserhalb vo dr Stadt sin mr in d’Arnhem Höhli. Das isch die längsti Höhli in Namibia. D’Höhli isch 1930 entdeckt worde und isch 4,5 km lang. Wenn me in d’Höhli kunnt weiht eim dr starki und penedranti Gschmack vo Fledermuuskake entgege. In dr Höhli läbe 5 verschiedeni Arte, unter anderem d’Blattnaseflädermuus, die grössti insektefrässendi Flädermuus uff dr Welt.
    Es isch rächt warm und fiecht gsih in dr Höhli, dr Abstieg isch rächt steil gsih, e Iseleitere durab, sehr schmali Gäng und stockdunkel. Mir sin ca. 1,5 km in d’Höhli abe. Die andere 3 km sin zue gsi.
    Wo mr wieder useko sin, sin mr total dräckig gsi, voll Staub, Sand und Flädermuuskake. Isch aber e tolls Erläbnis gsi😜.    Lue lisää

    Katso käännös
  • Meland s Afrikareis
    Kalahari Landschaft....
    Uff dr SafariSafari. E jungs Ärdhörnli wo sie ufziehn.2Cheetah UffangsationUsritt in de Düne🥰Wahnsinns Tier

    Nomol Kalahariwüesti bi Mariental

    20. huhtikuuta 2021, Namibia ⋅ ☀️ 25 °C

    Witer richtig Süde sin mr nomol an Rand vo dr Kalahari-Wüesti bi Mariental. D’Wüesti hets uns bitz ado. D’Landschaft isch so wunderschön do.
    D‘Kalahari foht im Norde vo Südafrika a und erstreckt sich über die ganzi Längi vo Namibia und Botswana bis uffe nach Angola und Sambia. D‘Gsamtflächi bedreit ca. 1,2 Mio. km3. Isch also fascht 29x grösser als die kleini Schwiz. Sie bestoht nit nur us Sand, grossi Teil sin Busch- und Dornesavanne.
    Mir sin uff e privati Game Ranch. Sin do bitz go wandere und hän e Game Drive gmacht. Mir hän wieder e huffe Tier entdeckt.
    Sie hän au e Cheetah (Geparde) Uffangstation. Geparde lerne 2 Johr lang s’Jage und s’Läbe in dr Wildniss vo ihrer Muetter. Wenn dr Muetter öbbis zuestoost überläbe die kleine Geparde dusse in dr Wildniss nit. Dorum gits einig Uffangstatione in Namibia.
    Es isch e wunderschöns Tier.
    Am Tag druff hän mr uff de Ross e Düne Safari gmacht. Es isch e Traum durch die Landschaft und über Düne z’galopiere. Die Rueh und dä Friede und das bimene schöne Sunneuntergang.    Lue lisää

    Katso käännös
  • Meland s Afrikareis
    Thats Namibia
    s Roadhouse bim Canyondr Fishriver Canyon

    Fish River Canyon

    23. huhtikuuta 2021, Namibia ⋅ ☀️ 28 °C

    Unsere letschte Stop in Namibia isch dr Fish River Canyon. Dr Fish River Canyon isch dr längst in Afrika und dr 2. längsti uff dr Wält (nach em Grand Canyon in de USA.) Er isch 160 km lang, bis zu 550m tief und öbbe 650 Millione Joor alt. Eifach nume Wow wenn me obe stoht und in dä Canyon luegt. Es het no Wasser im Canyon vom viele Räge.
    Mir sin inere tolle Lodge gsi, im 70ger Stil.

    Unseri Zit in Namibia isch scho verbi, und mr fahre wieder uff Südafrika zrugg.
    Namibia isch e fantasischs Land.
    D’Landschaft isch so abwächsligsriich, vo Steihüffe, über Wüesti, Flusslandschaft und soo viel Gras und Grien, dangg em viele Räge wie sie en do scho sit Johrzähnt nüm gha hän.
    Mir hän so viel Sache erläbt, gseh und erfahre. Sehr schöni Erläbnis aber au viel Erfahre vo me sich Gedanke macht.
    Gschichte vo Iheimische vo unter d’Huut göhn und e Läbe wie mir s’uns nit könne vorstelle.
    Die Wahnsinnigi vielfalt an Tier, wo me in dr Wildnis ka beobachte und vo nochem erläbe.
    Die Tier läbe zwar do imene Paradies, aber doch het immer dr Mensch sini Hand im Spiel. Muess d’Azahl vo de verschiedene Arte kontrolliere, will sie z’viel Platz ihnähme oder uns dr Fisch wägässe.
    S’Volk isch sehr vielsittig, sehr fründlich, zuvorkommend und alli gäbe sehr viel für ihres wunderschöne Land.    Lue lisää

    Katso käännös
  • Meland s Afrikareis
    Kokerboom mit Blüete (in Springbok)
    Gordon's Bay / Township (unde)d'Pinguineam brüete und Jungi1i chummeeee

    Back to South Africa

    27. huhtikuuta 2021, Etelä-Afrikka ⋅ ⛅ 18 °C

    Dr Gränzübergang wieder zrugg nach Südafrika isch ribligslos und no schnäll gange. Klar hän mr wieder x Formular miese usfülle und e Coronaschnälltest mache.
    Aber was hätte mr gmacht wär dä Test positiv usgfalle? Denn in Namibia sin mr scho usgreist und in Südafrika nonig igreist gsih. Und do mir weder Staatsbürger vo Namibia no vo Südafrika sin, isch kei Land verpflichtet uns ihne zloh. 😳Au die Beamte an dr Gränze hän kei Lösig gha uff die Frog. Alles guet dure dänkt an dene Gränze, aber wär rächnet scho mit Touris bi dene Umständ. 🙈

    In Südafrika hän mr e Overnight-Stop in Springbok gmacht und sin am nöggschte Daag wieder ganz abe an d’Küste gfahre. In Gordon‘s Bay hän mr uns inere Wohnig am Meer iquartiert.
    Es isch Herbst in Südafrika, oft bewölkt und kalt.

    Gordon’s Bay isch e Gmeind vo Kapstadt. Es isch e Hafestadt und liegt am Meer, öbbe 58km vo Kapstadt entfärnt. Näbe viele wohlhabende Ihwohner hets au e grossi Township wo sich zwüsche Kapstadt und Gordon’s Bay erstreckt. Es läbe über 600‘000 farbigi Mensche, Blächhuus an Blächhuus und Armut. Sehr viel sin Arbetslos. Sie läbe dört mit ihrer ganze Familie und wänn zum Teil au wenn sie könnte die Townships nit verloh.

    Vo do us hän mr Tagesusflüg gmacht.
    Mr sin nach Simons Town gfahre, dört an dr Küste läbe die Afrikanische Pinguins ( Brillenpinguine).
    E ganzi Kolonie kunnt do zäme. Es git nüm viel vo dene und sie stöhn überall unter strängem Naturschutz.
    Es het viel Jungi gha, Babies und Tennies. Erwachseni am brüete und anderi no am Näscht baue. Sie lege 2 Eier pro Gelege. In de erschte 4 Johr sin Pinguine nonig gschlächtsriiff, sie verlöhn während dere Zit d d’Kolonie und läbe im offene Meer. Nach 4 Johr kehre sie wieder in ihri Kolonie zrugg zum sich z‘Paare.

    D Wanderig über dr Hügel isch mitere Ussicht uff die ganz Küste belohnt worde.
    Und dr wunderschöni Sunneuntergang am Meer isch s’Highlight gsi.    Lue lisää

    Katso käännös
  • Meland s Afrikareis
    3Touribus fahrt durch d Stadt (elei im Bus🙈)
    e Teil vo Joburgdr Busbahnhofs Füür vo dr Demokratie, brennt sit 2011Township Sowetoe Wellbechhuus

    Joburg

    1. toukokuuta 2021, Etelä-Afrikka ⋅ ⛅ 13 °C

    Es isch richtigs Herbstwätter worde an dr Küste, so hän mr beschlosse wieder bitz in Norde in wärmeri Gebiet z’reise.
    In Joburg (Johannesburg) hän mr e Stop gmacht und d’Stadt agluegt.

    1886 isch d’Stadt gründet worde nachdäm me Gold gfunde het.
    Me het afo d’Arbeiter asiedle bi de Goldmine, so isch die Stadt immer witer gwachse.
    Hüt isch es die gröschti Stadt in Südafrika. Und die gröschti Stadt wältwit wo nit amene Gwässer ligt. Denn friehner, also vor erscht 130 Johr isch do e Savanne gsi mit viele Tier.
    S’ökonimische Rückgrad isch au hüt no noch wie vor s’Gold.
    Joburg liegt uff 1700m.ü.M. und het ca. 4 Mio. Ihwohner.
    S’berühemte Township Soweto ( Southwest Township) wo dr Nelson Mandela gläbt het isch entstande zu Beginn vo dr Apartheit wo me die schwarzi Bevölkerig uss dr Stadt deportiert het.
    Dört läbe ca. 2 Mio Mensche und es isch s’gröschte Township in Südafrika.    Lue lisää

    Katso käännös
  • Meland s Afrikareis
    Johannesburg vo obeüber den Wolken ...Sunneuffgang

    Back to Switzerland

    2. toukokuuta 2021, Sveitsi ⋅ ☁️ 23 °C

    Tja do sin mr wieder.
    Immerhin hän mr uff unserer plante Reis rund um d’Wält 2% vo dr Wält gseh😊🙈
    Es isch uns leider nit möglich in Afrika sälber witer zreise. In gwüsse Länder isch alles total zämebroche, es herrscht Bürgerkrieg und isch z’gföhrlich zum Reise. Und uff e andere Kontinänt und Länder isch sooo kompliziert und me weiss nit was kunnt. So hän mr beschlosse nach dere wunderschöne Zit in Südafrika und Namibia kei Risiko izgoh und ind Heimat zrugg zko.
    Wo mr vo Namibi uff Südafrika zrugg sin, hän mr leider nur no e Uffenthaltsbewilligung vo 7 Daag in Südafrika beko. Dä am Zoll het gmeint do mr usgreist sin und scho 3 Monet im Land gsi sin, mien mr s’Land nach 7 Dääg verloh.
    Naja mit däm hän mr nit grächnet und hän miesse umplane. So hän mr uns e Wohnig in Gordon’ Bay gmietet und s’Meer und d’Umgäbig no bitz gnosse.
    Mir hän dr Rückflug in d’Schwiz für am 30.4 . (exakt nach 7 Dääg) mit dr Lufthansa via Frankfurt buecht. Doch wo mr uns denn schlau gmacht hän isch usko, dass mir als Schwizer nit dörfe in Frankfurt ireise und witerreise. (Corona und Schenge) So hän mr dr Flug umbuecht uff e Daag spöter mit dr Swiss diräkt nach Züri. Nur sin mr jetzt e Daag zlang in Südafrika und die sin schiins sehr sträng und büesse mit eme Landesireiseverbot vo 1-5 Johr.
    So sin mr am 29.4. vo Kapstadt uff Johannesburg gfloge und hän alles klärt am Flughafe. Hän uns eimol meh e Wattestäbli ins Hirni stegge loh (Covid Test) und sin uffs Amt vo dr Immigration wäge däm Daag zlang im Land. Dä het gmeint do mir e „Grund“ hän e Daag zspot uszreise, könne mr e Schriebe mache und das am Zoll bim Ussreise zeige. Gesagt, getan.
    Bim Usreise am Zoll het das aber keine interessiert mir hän ohni Problem dr Stämpel in Pass beko. Also e huffe Ufwand für nüt ....
    In dr Schwiz sin mr 7 Dääg in Quarantäne, hän s’Tanti verwöhnt bim Huushalte😂 und uns aklimatisiert.

    Mir hän e sehr tolli Zit gha uff dere Reis, hän viel gseh, erläbt, tolli Mensche kenneglernt.
    Mir sin in 49 verschiedene Unterkünft gsi.
    Sin mit 3 Autos 20‘855 km gfahre und so au öbbe 2,5 Monet vo dene 5 Sitzend verbrocht😂.

    Schön dass ihr mit uns mitgreist sin und mir
    euch hän könne verzelle vo unserne Erläbnis!Südafrika und Namibia sin 2 sehr sehenswärti Länder und mir hän e huffe Tipps 😉.    Lue lisää

    Katso käännös
    Matkan lopetus
    2. toukokuuta 2021
  • 2025© FindPenguins
  • Koti
  • Tietoa meistä
  • Ryhmän seuranta
  • Lehdistö
  • Ehdot
  • Yksityisyys & Cookies
  • Ohjekeskus
  • Merkintä