Rano Kau

Etz simmer ja doch scho paar Täg uf Rapa Nui, hend aber bis etz relativ wenig Moais gseh. Sogar a dr Martina ihres Mami het scho nachegfragt, wo denn die ganze Steimänner bliibed... Es sell ja bekanntlich fascht 900 hie gä, so hemmer eus hüt ufd Suechi gmacht! Passend zum 4. Usflug hemmer hüt euses 4. Fortbewegigsmittel gwählt: en Quad :) Sogar de Petrus isch eus hold gsi, so hemmer hüt de schönscht und wärmst Tag mit Sonne pur derfe gniesse!
Vu Hanga Roa simmer and Süd-Ost-Küste und hend die erschte paar Sights abklapperet. Da hets immer wieder paar Moais, die meischte sind aber währendem Paradigma-Wechsel vu Moai zu Make-Make Glaube vu de Uriwohner umkippt worde. Da hemmer au en rekonstruierti Kanu-Hütte und (vermuetlich) typischi Gärte gseh: das sind mit Stei uskleideti und gmuurti Beet, wo seled sRegewasser besser speichere. Dernach het de Sämy (erfolglos) probiert, euses alte Brot an die halb-wilde Pferd zverfüettere... doch die sindem immer dervo gluffe :)
Zmittag hemmer uf Gischt-besprüehte schwarze Klippe gesse - mer hend nu nie so grossi und chraftvolli Welle wie da gseh! Sie sind sicher mind. 3-4m höch gsi, und dGischt isch nu um einiges höcher ufegsprüeht... Doch gmäss em Rodrigo womer später zuefälligerwis numal troffe hend, sind das nur chlini Welle :o wie gsehnd de ächt hie grossi Welle us?!?
Am Nami simmer zum Rano Rarako, am Steibruch wo so guet wie all Moais produziert worde sind... und da hemmer endlich gseh, wo sich die ganze Moais vu eus versteckt gha hend :) da hets sicher über 100 Figure, in allne Grösse und Lage - aber all hend sklassische Duck Face :) Bim Kratersee hemmer eus numal es churzes Noni gleischtet, unter strenger Beobachtig vu de Pferd ufem Kraterrand.
Grad underhalb vum Rano Raraku lit Ahu Tongariki, da gseht mer 15 schöni und relativ guet erhaltni Moais in Reih und Glied. Füre Rückweg simmer überd Nordküste gfahre und hend numal in Anakena zumne Bierli ikehrt. Pünktlich zum Sunneundergang simmer zrugg in Hanga Roa zu de ortseigne Moais (womer eus bis etz ufgspart hend), zum Ahu Tahai. Hie hemmer nid nur am zwüschet Steimännli sinkende Fürball chenne zueluege, sondern au de wagemuetige Surfer und Bodyboarder in mächtige Welle. Leider simmer nid die einzige mit dere grandios Idee gsi, sicher über 100 Lüt hend eus ufem Rase Gsellschaft gleistet :)
Zum Tagesabschluss simmer nu inen Tanzshow - es het gheisse das derfi mer sich uf kei Fall entga la. Und tatsächlich, s"Kari Kari Ballett" het eus begeischteret! Die Akademie setzt sich sit über 20 Jahr für ganzheitlichi Rapa Nui Kulturförderig i und dIdee stosst uf vil Begeisterig. Voller Insbrunst, sehr fröhlich und asteckend hend eus dArtiste meh als zwei Stund in Trance ghalte, mer isch teilwis gar nüm nachecho mit luege! Ufem Heiweg hemmer eus au im Hüftschwung probiert... aber das brucht wohl nu chli Üebig :)Okumaya devam et