Plaza de Chamberí

Ons is baie rustig met die opstaan en regmaak, want ons free walking tour begin eers 10:45. Ek lees toe bietjie op oor die walking tour en sien dat alhoewel dit ingesluit is by die bustoer, verwag hulle darem dat 'n mens die gids beloon met 'n fooitjie. Ons besluit dat indien dit die geval is, gaan ons maar bly by ons staatmakers van baie jare - New Europe Tours oftewel Sandeman's. Hulle toer begin 11:00 ook van die Plaza Mayor. (Moet nie fout maak, soos ek, om te dink dit verwys na die burgemeester nie. Dit is eintlik "major".)

Ons stap rustig al met Calle de Atocha af en by meer as een pleintjie wonder ons, maar Google Maps beduie net heeltyd voorwaarts mars. Toe ons by die regte plein kom, besef ons dít moet die een wees. Dit is 'n groot plein omsingel met geboue en 'n man op 'n perd in die middel en baie mense wat rondbeweeg.

Die man op die perd is toe Felipe III, een van die vorige konings van Spanje. As ek reg onthou is hy die een wat 'n paar Spaanse kolonies gevestig het.

Ons gids op die staptoer is 'n Spanjaard, Sebastian. Hy praat lekker vinnig en deel 'n klomp inligting. Partykeer so bietjie onsamehangend vir my, maar ek dink ek het darem die hooftrekke gehoor. Hy eindig met 'n opsomming van 7 opeenvolgende konings en die belangrikste gebeure van hul regeringstyd. Hy gebruik lede van die groep om die konings voor te stel en sketse van die regte koning ook. Die rollespel help baie om die info te verstaan en (soort van) te onthou.

Na die staptoer stap ons terug in die hostel se rigting. Die strate is regtig omtrent soos 'n doolhof, maar ons zig-zag tot ons in ons, nou reeds bekende Calle de Atocha kom. Ons stap verby 'n taverne wat meer lyk soos die locals se plek as 'n tourist trap en besluit op die plek om middagete daar te eet.
Bier en focaccias met 2 verskillende vulsels is min of meer wat ons kan bekostig. Dit was heerlik en 'n baie goeie keuse, al moet ek dit nou self sê!

Ons moet verby ons hostel, so ons gaan in en Truda gaan knip 'n klein uiltjie en ek gaan ontspan in die gemeenskaplike area. Na koffietyd val ons weer in die pad om die 2de roete van die bustoer te doen. Hierdie keer is daar darem meer inligting oor die areas waarby ons verby ry. Daar is egter baie mooi en indrukwekkende geboue waaroor geen woord gerep word nie. Foto's neem is basies onmoontlik.

Ons stap rustig af met die wandellaan en uiteindelik terug hostel toe. Ons maak 'n draai in die supermark en koop 'n pizza wat ons kan gaarmaak by die hostel.

Na 'n paar dae op die pad het ons 'n klompie wasgoed. Ons maak gebruik van die hostel se wasmasjien en tuimeldroër. Dis 'n baie oulike masjien - hy voeg self die waspoeier by. Ons gaan drink koffie en lees nuus in die sitkamer terwyl ons wag vir die wasmasjien.

Nadat Truda die wasgoed oorgesit het in die droeër, sit ons die pizza in die "oond" wat soggens gebruik word om brood te rooster. Na net paar minute is aandete gereed - pizza, wortelstukkies vir slaai en yoghurt en druiwe vir poeding.

Terwyl ons eet, is daar 'n jong man met wie ons begin gesels. Hy het moeite om te antwoord toe ons vra waarvandaan hy is. Sy pa is van Tunisië en sy ma van Italië. Hy het nou vir 'n jaar of wat in Milan studeer, maar studeer nou in Madrid. Klink my darem hy het in Tunisië groot geword. Hy praat 5 tale - Arabies, Italiaans, Spaans, Frans en natuurlik Engels. Sy ouers is ook nog Duits magtig! Hy studeer "fashion".

Later sluit 'n Portugese dame ook by die gesprek aan. Hulle begin praat hoe veilig Madrid is in teenstelling met Lissabon wat deesdae nie meer so is nie, volgens die Portugese vrou, agv die baie immigrante. Ek kom tot die gevolgtrekking soos baie keer vantevore ook al - elke land het maar sy eie moeilikheid. Jy ontsnap dalk een probleem wanneer jy emigreer, maar loop weer 'n ander een raak in jou nuwe land.

Na ete is ons wasgoed net mooi droog. Ons gaan maak sommer klaar om bed toe te gaan sodat ons goed uitgerus kan wees vir die hoogtepunt Donderdag - tenniskyk by die Madrid Ope!Read more