Gautam Buddha Nagar

Nach em Usschlafe, wo simmer ächt hi? Natürli wieder it d Mall🤣
Mir händ grad chli en overload vo indischem ässe gha, drum simer ines westlichs Resti, wo de Bsitzer vo de Unterkunft eus empfohle het.
De Adi het wiedermal Poulet gässe, wills meiste da Veggi isch.
D Marion het ein Mezze-Teller gha und Jeannine Pasta.

Wieder zrug i de Unterkunft hämer es Powernap gmacht. Mir hend den nonig wüsst, wie froh mir um das no werdet si😂

D Marion und Jeannine parat imene Saari und de Adi ebefalls im indische Style simer uf die 10 am Abig wieder zu de Location gfahre.

Wo mer acho sind, hämer de Bräutigam inere Kutsche mit enere riiise Ketti voller Gäld entdeckt. Trummler sind au scho i ihrem Elemänt gsi und hend vollgas ge🥳 D Lüüt händ eus grad wiedererchännt und hend eus grad empfange.

Wo den de Brütigam in Saal ine het wele, het er sich zerst bi de Familie vo de Bruut müsse ichaufe. Es isch es lustigs Schauspiel gsi, wie d Schwöster vo de Bruut immer meh Geld het wele. Irgendwenn ischs Geld vo de Ketti ufbrucht gsi und mir händ alli ine chönne😂
Es isch en andere Saal gsi, wie Gester. Alles nomal grösser und pompöser, wie au alli Gäst. Sie hend nomal e Schippe drufgleit. Au zum innelaufe isch en Teppich usgleit gsi. Mir sind us em Stuune nüme use cho.

Mir händ en Bueb, um die 14i känne glernt. Er het eus den I das ganze Ässe ifgüert und eus soviel zum probiere ge🤤🤤🤤 Er isch en riise Fan vom Adi gsi und isch den de ganz Abig mit eus gsi.
Irgendwenn isch den d Brut cho. Sie het sooooo umwerfend schön usgse, mir sind usem stuune gar nüm use chl. Ihre Uftritt isch au super inszeniert gsi, unter emene Bluemedach, viel Rauch (gmacht mit Trocheiss) und Fürwerk.
Den ischs grösse Fötele losgange. S Brutpaar allei uf de Bühni, im Saal, Vorusse und s Brutpaar mit allne Gäst.

Es sind immer wieder gwundrigi Lüüt zu eus cho und hend es Schwätzli mit eus ghalte. Würklich so herzlich und fründlich gsi vo allne. Mir händ eus scho fast wie en Teil vo de Familie gfühlt.
Ussert ein Kellner. De isch zum Adi cho und het ihn uf hindi öpis gfrägt. Natürli het er nüt verstande, drum isch de Bueb cho. Es het sich usegstellt, dass de Kellner de Adi um Gäld bäte het. Das isch echt chli schräg gsi. Es mag für de Kellner viellicht so vor cho si, de Adi als Inder (kein Scherz, alli meinet er isch Inder) mit zwei wiise Fraue muess Geld ha... wer weiss...

Den isch lang nüt passiert und irgendwenn isch 3 i de Nacht gsi. Den hets Brutpaar und d Familie zerst mal gässe. D Kellner hend eus nonstop scho Sache bracht und mir händ eus suscht scho dureprobiert, dass mer kein Bisse meh händ chöne ässe, jänuu😂😂😂

Sie hend eus gseit gha, mir sölled nonig hei ga, will d Zeremonie erst no chömed.
Wos fertig gässe hend, simer I sones Zwüscherümli, wo isschalt gsi isch. Dete hets 2 Priester gha, wo den Sache gmumlet hend und es Füürli azündet hend. Zeremonie isch drum gange, wie d Brut vo de eigene Familie gat und vo de neue Familie ufgno wird. D Eltere vo de Brut hend zerst beidi gsägnet und no einiges gmacht, wo mer nöd verstande hend. Denn het s Bruutpaar 7x um das Füür müsse laufe, zerst sie vorus und den er. Nach no andere Sache isch eifach mal wieder nüt passiert und es isch scho 5i gsi😂😂😂 alli händ kei Lust me gha, weder d Gäst, S Brutpaar und au mir sind langsam müed worde. Mir händs eus nöd chöne erchläre, uf was all die Mänsche warted😂😂😂😂 es isch so e absurdi Situation gsi, aber mir händs unheimlich spannend gfunde😊
Irgendwenn isch es gälbs Tuech uftaucht und es isch wieder bewegig I das ganze cho. De Brütigam het de Brut mit roter Farb en Strich uft Haarscheitel und d Stirn gmalt, s Zeiche, das d Frau verhürated isch. Nachher hend all Fraue us de Familie vom Brütigam au Farb uf ihre Stirn gmacht. Uf das Abe, isch d Bruut mit Gold und emene Tuech beschänkt wurde. Das söll als ihri Absicherig diene, falls em Ma öpis passiert.
Irgendwenn het de Brütigam sini Schue zrugerchauft vo de Familie vo de Brut. Die händ sie nämlich versteckt😂 und es isch fertig gsi. D Handyuhr het tatsächlich 6.30 azeiget. Fix und fertig, aber überglücklich mit all dene neue Idrück und neue Bekanntschafte, simer mit em Uber is Hotel und sofort in Tüüfschlaf gheit😴Read more