Wae Ntinjor

Hüt Morge hemmer euse neu Fahrer für die kommend Wuche troffe: Agus (short for Augustinus) isch eus vum Hotel empfohle worde. Nachere churze Route-Besprechig hemmer denn au grad sini ganz Family kenneglernt - sin 12-jährige Sohn Adrian het grad Schuelferie und wird eus begleite, zum au chli was vu Flores zgseh und vilicht selber mal ind Fuessstapfe vu sim Vater ztrete. Fun Fact: sSchuelsystem isch glich wie bi eus ufbaut: 6 Jahr Primar und 3 Jahr Sek. Doch im Underschied zu eus isch dUni sehr tür und fascht niemert chan sich en akademische Werdegang leischte.
De Agus isch nid nur Driver, sondern au Guide - und het eus scho a dem erschte Tag sehr vil verzellt. Zum Bispil heter erchlärt, as Fischer vu Sulawesi sich ufere Insle - Labuan - in Komodo niedergla hend, erst später sind sie uf Flores cho und hend der Ort Labuan Bajo, also Hafe vu Labuan, gnennt. Die meischte Fischer sind nach wie vor Moslems, während de Rescht vu dr Insle inkl. Agus Katholike sind.
Flores het 10 Regione, wo all en unterschiedlichi Sprach reded - somit rededs underenand dKunstsprach Bahasa Indonesia. De Agus het eus au chli was vu dr Politik verzellt, offebar sind grad geschter dWahle vum Governor und Local Represenatives gsi. V.a. dWahl vum Governor sig interessant gsi, wel de Favorit vor emene Monet inen Korruptionsfall verwicklet gsi isch. Für eus ganz ungwohnt isches hie au aschinend üblich, uf so Wahlergebnis zwette - gemäss Agus hend geschter einigi Familiene mehreri Millione Rupie verlore wel dWahle nach dem Skandal völlig offe gsi sind.
Vu Labuan Bajo simmer ufem Trans-Flores Highway dBerge deruf... wobi Highway chli übertribe isch :) dStrass windet sich in Serpentine steil deruf, isch nid immer breit gnueg für zwei Autos und überall gseht mer "HATI HATI" Schilder (hati = Herz und hati hati = Vorsicht). So isch de Agus nur selte schneller als 50 km/h gfahre und het so Zit gha zum eus nu was überd Vegetation zverzelle. Nebed Banane-Stude und Kaffee-Plantage gits hie au grosse Candlelight Trees, wovo die tröchnete Frücht als Fleisch-Gwürz verwendet werded, oder "Cloth" (?) wo als Zigarette-Parfüm verarbeitet wird. Am Strasserand hemmer denn au "zeruk manish" (?) kauft, sogenannti "süessi Orange", wo genau glich wie eusi Mandarine schmöcked. Ab Lembor gseht mer au ganz vil und teilwis recht grossi Riisfelder, wobi die meischte dervo erscht grad chürzlich gerntet worde sind. Trotzdem gseht mer nebed schlammig-brune Felder au immer wieder hellgrüeni Patches: das isch die neu Saat wo scho mal i eim Rice Paddie anezüchtet wird. Bevor mer die Saat denn uf wiiteri Felder cha verteile, laht mer Büffel la drüber laufe, damit de Bode schön schlammig wird, salte Grüenzügs abstirbt und de Bode für de neu Saat parat isch. So chamer hie Riis drü Mal pro Jahr ernte!
Euses hütige Ziel isch de Startpunkt fürd Wanderig zu Wae Rebo, es traditionells Dorf südlich vu Ruteng. Womer churz vor Ruteng vom Trans-Flores Highway abboge sind, hemmer sGfühl gha mer siged sicher gli scho da... doch da het dFahrt erscht so richtig agfange! Ca. 4 Stund simmer uf sehr schmale und relativ desolate Strasse underwegs gsi - meischtens es Patchwork us Teer-Reschte, Stei und Schlamm! Bi mängne Brugge het mer scho dBewehrigs-Ise gseh, teilwis hends au scho regelrechti Löcher gha :o doch de Agus het eus sicher durch und über all Hindernis gfahre - und plötzlich gsemmer vor eus zMeer! Durch das ganze Gerumpel hemmer nid gmerkt, asmer die schwarz Südküste vu Flores vor eus hend gha! Etz sitzemer inere eifache Lodge mit Blick ufs Meer und Riisfelder, lueged am Nieselrege und de Buure zue und freued eus uf chli Arak hüt Abig :)*Leia mais