ä Bootsfahrt nach Juneau 🐋

Eigentlech hei mir nur zwöi Nächt in Haines wöue blibe, wäg üsem Usflug am Suntig sis de total vier worde.

Am Samstig hei mir drum bi nid so guetem Wätter chli müesse Zyt vertribe u si am Vormittag ah Farmers Market. Dä isch winzig gsi, mir hei dert aber ono äs guets Kafi entdeckt. Mir hei de ono usegfunge, dass es in Haines ä auti Filmkulisse git, wo i dä 90er Jahr fürne Disney Fium isch brucht worde.

Nachdäm Usflügli simer no churz id Bibliothek fürs Wifi u hei derna ä chlini Wanderig zumne Ussichtspunkt (Battery Point) gmacht. Aschliessend heimer üs nomau ufe Camping vor erste Nacht ine gschliche zum ga dusche, sägets niemerem… 😉 D‘Nacht heimer de wieder am gliche Plätzli verbracht wie die vorhärigi Nacht.

Am Suntig simer när mit de Alaska Fjordlines uf Juneau gfahre und hei ungerwägs sicher 7 Buckelwale gseh - es het sech auso definitiv glohnt. 😍 Mi Troum wäre zwar Orkas gsi, aber sooo viu Glück hani äuä glich nid.. 😉 D‘Fahrt isch knapp 3h gange u mir hei näbst de Wale ono Seehüng, Wisschopfseeadler, Delfine u imposanti Gletscher gseh und ä feine Muffin serviert übercho.

In Juneau heimer de ungfähr 3h Zyt gha zum chli dürs Städtli schlendere. Es isch nid mega spektakulär gsi, aber glich cool us Teil vo däm Usflug u de ischme ömu mau ir Houptstadt vo Alaska gsi.. 😉 Us kulinarische Höheflug heimer üs ä Salmon Corndog gönnt.

Funfact: nach Juneau füehrt ke Strass, die Stadt isch auso nur per Boot oder Flugzüg erreichbar!

Ufem Rückwäg heimer nomau (ohni übertribe!!) öpe 15 Buckelwale gseh und sogar eine dervo usem Wasser gumpe - es hät auso nid besser chönne si! 😍 Ufem Boot heimer de oh die öpe einzige 5 Minute Sunneschiin sitmer in Alaska si chönne gniesse. 😉
Es het de ono Znacht gäh (ä Lachs Suppe) u somit heimer iz immerhin Lachs i 3 Variatione gässe i de letste 3 Täg.

Mir hei üs derna wieder es schöns Plätzli für üse Van gsuecht zum d‘Nacht verbringe und fahre morn wieder zrüg nach Kanada.Read more