Canada & Alaska Roadtrip

The roadtrip made it out of the chat!
Mis 2026 het sech bishär chli angers entwicklet aus ds ursprünglich isch dänkt gsi. Derfür hani ize d‘Chance, mit dr Maylea und ihrem Van dür Kanada z‘reise und nime euch gärn mit.
Off I go! ✈️🐻 Read more

Follow Insights Calendar Photos Share

Trip start
July 24, 2026
Canada & Alaska Roadtrip
Off to Calgary ✈️
July 24 in Canada ⋅ ⛅ 30 °C
Mini Reis het mau wieder turbulent gstartet - irgendwie hani da chli äs Händli derfür…

Das Ganze het scho 2 Tag vorem Flug agfange, woni gmerkt ha, dass mis ETA no nid bewilligt isch worde und uf dere Bestätigung nid die richtigi Passnummere steit. Ig has de zum Glück nomau chönne beatrage und es isch no am gliche Tag bewilligt worde.

Ä Tag vor Abreis isch de no mi Flug vo Züri uf Amsterdam cancelled worde… ig ha zum Glück rächt unkompliziert chönne umbueche u statt via Amsterdam när via Paris chönne flüge. Woni z‘Züri mis Gepäck ha wöue ufgäh hani aber de gmerkt, dass im neue Tarif ke Ufgabegepäck inklusive isch und ha no 70 Stutz müesse zahle. Wes ja nume das isch…

Wonis de ändlech uf Paris ha gschafft bini natürlech wieder im Scheiss gsi, da ig ha müesse Terminal wächsle und sech mis Gate am hingerletste Egge vom ganze Flughafe het befunde. Churz vor knapp hanis de no gschafft (es isch scho „final call“ agschribe gsi..) und hoffe iz schwär, dass es mis Gepäck ou i dä Flüger het gschafft. Ig ha da drum chli schlächti Erinnerige ah mi letst knapp Aschluss in Charles-de-Gaulle…
Zu allem übel bini när ou no imne Mittelsitz ghockt. 😂 Aber mä söu ja schliesslech positiv blibe.

Dr Flug isch zügig verbi gange und d‘Immigration het problemlos klappt.

Iz stahni grad am Gepäckband und warte uf mi Rucksack, bevori när d‘Maylea und dr Ethan triffe.

See you soon! 🇨🇦Read more
See translation
8 likes
Canada & Alaska Roadtrip
Calgary - Jasper 🚐
July 25 in Canada ⋅ ⛅ 22 °C
Mis Gepäck isch auso tatsächlech ahcho (juhuu!) und d‘Maylea het mi am Flughafe ufgablet.

Da dr Ethan am Tag derna zrüg uf Australie isch gfloge hei sie es Airbnb gha wo ig nätterwis ou no ä Nacht ha dörfe verbringe. Mir si de am Aabe no uf Calgary id Stadt gah Znacht ässe und när bi Zyte gah pfuuse - ig wägem Jetlag und d‘Maylea het dr Ethan am Morge am 2 ah Flughafe müesse bringe.

Hüt Morge heimer de no dr Van fürne Ölwächsu id Garage bracht, da ds Ganze lenger het duuret aus dänkt simer nomau id Stadt is Kafi. Dert heimer de afang ä Campingplatz in Jasper buecht, dasmer de sicher ä Schlafplatz hei für hüt Aabe. Dr Plan isches, relativ zügig i Norde (i Yukon) z‘fahre.

Ufem Wäg uf Jasper heimer no öpe ä Stung verbrate fürne Benzinkanister ufem Dach vom Van z‘befestige.. 😂 aber lieber so aus ä usgläärte Kanister im oder ufem Van.

Mir hei üs när via Icefields Parkway ufe Wäg nach Jasper gmacht und ungerwägs no 2-3 Fotostopps igleit, eine dervo am Peyto Lake.

Rundum Jasper heimer de när no d‘Uswürkige vo de Waudbränd vo vor 2 Jahr gseh, es het seeehr vieli abbrönnti Böim gha. Us ersts Wildlife heimer hüt afang es paar ä Hirsch und sone Art Geisse (?) gseh, d‘Bäre und Elche löh auso no uf sech lah warte.

Mir si relativ spät ufem Camping ahcho u chum heimer z Vorzäut ufgsteut u Wasser ghout hets numeno einisch gschiffet… d‘Maylea het üs im Dunkle und im Räge no ä gueti Pasta zouberet und iz simer ready fürs Bett u hoffe uf bessers Wätter morn.Read more
See translation
7 likes
Canada & Alaska Roadtrip
1 2
Rain, Rocks & Canadian Wildlife
July 27 in Canada ⋅ ☀️ 19 °C
Mini ersti Nacht im Van hani guet überstange und mir si bi Sunneschiin erwacht. Dr Campingplatz isch aber so semi gsi, es het 1. ke Duschi gha u wägeme Stromusfau schlussändlech ou ke fliessends Wasser meh. Zum Glück heimer üse Wassertank am Vorabe scho ufgfüut gha.

Nachemne gmüetleche Zmorge heimer üs de am Vormittag ufe Wäg i Richtig Norde gmacht und leider het üs z‘Wätterglück när wieder verlah u es het fasch dr ganz Tag grägnet. Z‘einzige (aber grosse!) Highlight ah däm Tag isch gsi, dasmer am Strasserand ä Schwarzbär hei gseh! 😍

Schlussändlech simer gäge Aabe in Grande Prairie glandet und hei üs entschide imne Hotel z‘übernachte da mir 1. nid so Lust hei gha im Räge z‘campe und üse retro Van (dä isch 25i) leider nid meeeega wasserdicht isch (es rünnt bir Hingertüre ine wes fest rägnet u mir hei dr Spaut müesse abchläbe.. 😂).

Nachemne guete Fastfood Znacht miteme kanadische Nationalgetränk für d‘Maylea (Ceaser heisst ds, isch ähnlech wiene Bloody Mary) heimer troche u gäbig gschlafe im Hotel.

Hüt Morge heimer üs entschide in Richtig Hudson‘s Hope z‘fahre, wo d‘Maylea im Summer 2024 im Williston Lake Resort ä Saison het gschaffet.

Ufem Wäg dert häre heimer ir Nechi vo Tumbler Ridge planet ä churzi Wanderig z‘mache und hei ungerwägs vom Van us ä Elch miteme Baby gsichtet! 😍

D‘Wanderig isch relativ churz aber ussichtsriich gsi und äs het guet tah sech mau wieder chli lenger z‘bewege. Nachdäm Usflug heimer die 2.5h Fahrt uf Hudson‘s Hope i Agriff gno und verbringe hie die nächste 2 Nächt ufem Camping wo mir üse Van nätterwis gratis dörfe absteue und ono Rabatt ufs Steak Dinner hei übercho.Read more
See translation
Traveler Hesch das Schiud grad i Packt??😂😂
7/28/26ReplyTranslate
Travelernei leider nid.. 😂
7/28/26ReplyTranslate
Traveler Wooow
4wReply
6 likes
Canada & Alaska Roadtrip
2
vo Hudson‘s Hope nordwärts
July 29 in Canada ⋅ ☁️ 13 °C
In Hudson‘s Hope heimers rächt gmüetlech gno und nid mega viu gmacht. Es het ir Nacht und am Morge gschiffet und darum heimer nid gross ä Aktivität plant gha.

Mir si de nachem Zmorge is Stedtli gfahre u hei dert ines Kafi wöue wo aber leider zue het gha. Mir hei derfür äs angers Lädeli entdeckt u hei dert erfahre, dass es no ä Farmers Market git. Es het sech aber de usegsteut, dass dä us total 5 Ständ bestande isch, auso nid ultra sehenswert. Es het aber immerhin äs feins Kafi und äs Brownie gäh.

Zrüg ir Lodge hei mir Nutze vom Wlan und vor Wöschmaschine gmacht, bevor mir am Aabe ufem Campingplatz bi trochenem Wätter u schöner Seesicht gueti Burger hei brate. Am nächste Morge si mir bi Zyte uf und hei über 500km i Norde zrüg gleit, dass mir müglechst gli dr Yukon erreiche (und wöu die Strecki nid soo spektakulär isch). Aktuell simer iz übrigens ufem Alaska Highway ungerwägs, wo bis i Yukon ufe geit.

Üse Van heimer ufem Tetsa River Campground abgsteut, nomau feini Burger gmacht, Gurke ahand vomne Insta Rezept igleit und üs bettfertig gmacht zum am nächste Tag hie d‘Gägend z‘erkunde. Ah Campingplätz ohni fliessends Wasser muessi mi no gwöhne und z‘fählende Netz verbuechemr optimistisch unger „Digital Detox“.. 😉

Je witer nördlich dasmer chöme, desto weniger Mönsche u Netz gits. Derfür viu Mugge, kanadischi Tier, Wäuder und unberüehrti Natur.Read more
See translation
Traveler Dä Usblick chunt mir doch irgendwie sehr bekannt vor. 😁 I gloube mir si o genau uf däm Platz gstande…
4wReplyTranslate
Travelerso lustig! das hätti nümme gwüsst
4wReplyTranslate
3 likes
Canada & Alaska Roadtrip
Digital Detox, Pit Toilets & Hotsprings
July 31 in Canada ⋅ ☁️ 20 °C
Mir si ufem Alaska Highway witer i Norde gfahre und d‘Infrastruktur isch hie nid unbedingt uf viu Mönsche usgleit. Es vergöh drum guet und gärn mau 72h ohni fliessends Wasser und ohni Handyempfang… Dr Digital Detox duet mir sicher guet, aber ig truure ou chli mine Snapchat Flämmli nache. 😂

Item, vom Tetsa River simer zum Stone Mountain Provincal Park gfahre und hei ufem Campground bim Summit Lake d‘Nacht verbracht. Z‘Wätter isch wieder mau so semi gsi, aber äs het ömu glängt für ufne Hoger ufe z‘wandere und d‘Ussicht z‘gniesse ohni komplett verrägnet z‘wärde. Ig würd uf jedefau gärn paar Grad und chli Sunne vor Schwiz da übere beame! 😊 Hie bim Summit Lake heimer ou dr höchst Punkt vom Alaska Highway erreicht.

Da‘s hie nume Pit Toilets (Plumpsklos) und ke fliessends Wasser git, heimer üs de fürne „Duschi“ im See entschide. D‘Luft und oh z‘Wasser si eher früsch gsi aber es het guet tah sech wenigstens chliii chönne z‘wäsche.

Am nächste Morge simer früeh los, wöumer zum Campingplatz bi de Liard River Hotsprings hei wöue u dä gemäss Reisefüehrer und Iheimische immer früeh usbuecht isch. Mir si da drum scho vor de 11i ufkrüzt und hei problemlos äs Plätzli für üse Van gfunge. Ufem Wäg heimer viu kanadischs Wildlife gseh (ä Bär, Bisons, Karibus, Geissli und Häsli).

Dr Namitag heimer de hie i de natürleche Hotsprings (heissi Quelle) verbracht (leider mau wieder bi Räge..) und fröie üs drüber, dass es ufem Campingplatz näbedranne ä Duschi het wo mir chöi bruche (wo mä aber 1 Dollar pro Minute zaut.. 😂).

Morn gömer witer i Richtig Watson Lake u we dir dä Post läset de heimer sicher Internet gfunge und dämentsprächend Zivilisation und hoffentlech ou ä Supermarkt für Ässe und irgendwo subers Trinkwasser zum dr Wassertank im Van uffüue.

We mir in Watson Lake si ahcho, heimers de ou ändlech i Yukon und somit ganz i Norde vo Kanada gschafft.Read more
See translation
3 likes
Canada & Alaska Roadtrip
Welcome to the Yukon!
August 1 in Canada ⋅ ☁️ 21 °C
Mir si hüt Namitag guet in Watson Lake und somit wieder ir Zivilisation und im Yukon ahcho. Ungerwägs hei mir no d‘Smith River Falls und dr Whirlpool Canyon besichtigt und ä Bison Familie am Strasserand atroffe.

Watson Lake het 800 Iwohner und isch aber die 3. grössti (!) Stadt vom Yukon. Hie hei mir dr Sign Post Forest besichtigt. Ds ische Schilderwald mit verschiedene Ortsschilder wo eine vo dä Arbeiter vom Alaska Highway äs Schiud vo sire Heimat het ufgsteut wöuer Heiweh het gha und vieli angeri Lüt heinim ds när nache gmacht. Mir hei leider kes Schiud gha aber hei sogar äs Thun Schiud gfunge.

Aschliessend hei mir üs im Tourist Center über üsi Müglechkeite im Yukon informiert, dr Wassertank ufgfüut und no ä gratis Sticker übercho. Die Dame dert het sech richtig gfröit, dass mir üs derzue entschide hei, dr Yukon z‘bsueche.

Usserdäm hei mir per Zuefau ou no äs Walliser Päärli troffe, wo ihre VW hei da übere lah verschiffe, zum Kanada z‘bereise. Sie hei leider französisch gredt aber mir hei glich Fröid gha, angeri Schwizer z‘träffe.

Mir hei üs de när no mit Ässe u Benzin ideckt und zur Feier des Tages es Raclette gmacht. Dr Chääs het nid viu mit richtigem Raclette z‘düe gha aber äs het dr Zwäck erfüllt.

Hüt Aabe simer am wildcampe, was im Yukon aber erloubt isch, solang niene öpis angers agschribe isch. Nachem Znacht heimer ä grobe Plan für üsi Witerreis zämegsteut. Spoiler; mir wärde ou no Alaska bereise. 🇺🇸Read more
See translation
3 likes
Canada & Alaska Roadtrip
Morley Lake & Atlin
August 3 in Canada ⋅ ⛅ 17 °C
Da mir gester am Morge üse Platz mit gfüut 7‘000 Mugge hei teilt heimer üs derzue entschiede im „Städtli“ öpis z‘ässe statt üsi Campingchuchi füre z‘schrisse.

I „Andrea‘s Restaurant“ heimer semi guete Kafi trunke aber gueti Pancakes mit Rüehrei und Speck gässe und si när nomau is Visitor Center für üsi letste Frage zu üsere Route z‘steue.

Mir si de ufem Alaska Highway witer gfahre und hei am Morley Lake ä wunderschöni „Recreation Site“ gfunge. Ds si keni offizielle Campingplätz und drum gratis, hei aber glich Pit Toilets, si guet pflegt und mä darf maximal 14 Nächt am Stück dert campe. Da me uf däm Abschnitt vom Highway öpe 6x vom Yukon uf British Columbia u wieder zrüg wächslet simer die Nacht wieder in BC gsi.

Wo mir si ahcho hets mau wieder abeglah aber d‘Maylea het rächt gha und äs het nach ca. 30 Minute wieder uftah und mir hei die herrlechi Ussicht bi schönstem Wätter und langem Tagesliecht (bis ca. 23:00) gnosse. Mir hei de ono dr Wecker uf die 04:00 gsteut und ufene schöne Sunneufgang ghofft aber es isch leider rächt bewölkt gsi u drum simer wieder zrüg is Bett.

Am Morge heimer ä churze Boxestopp in Teslin igleit und si witer uf Atlin gfahre, ds wird hie ou „Switzerland of the North“ gnennt und scho nume d‘Strass dert häre isch sehr sehenswärt gsi - mir wärde ändlech ou mit Sunne und blauem Himmu verwöhnt. ☀️

Hie heimer ufne vou usgstattete Campingplatz wöue dasmer wieder mau ä Duschi hei aber dr einzig offiziell Campingplatz wos het chostet 45$ (!) u auess wos het isch es Toitoi aber ke Duschi.. mir hei drum de dr Van eifach ufere Wiese abgsteut wo isch gstange dass me bitte 20$ söu ah „any local business“ gah zahle. Säget bitte niemerem, dass mir ds nid gmacht hei… 😉

Mir si de när chli dürs Städtli gschlendert und hei aschliessend wieder sone „1$ per minute“ Duschi gfunge. Z‘Städtli isch wunderschön u mega härzig, aber leider het anschinend am Mäntig u Zistig fasch auess zue u drum heimer weder ds härzige Käfeli (wos Matcha Latte Strawberry gäb 😍) no eis vo de härzige Lädeli chönne ga bsueche. Es het fasch chli auess so usgseh, aus wärs ä Filmkulisse und ke richtige Ort. Mir hei när dänkt, dass sech so äuä aui Touris füehle, wo Luterbrunne bsueche.. 😂

Z‘dusche isch de oh wieder ä Herusforderig gsi wöu mir hei müesse Münz gah wächsle u die im Supermarkt het ds nid wöue chönne u gfüut auess angere het zue gha aber ire sketchy Bar heimer när ä nätti Dame gfunge, wo üs doch no ä 10er Note het chönne wächsle.

Ize hocke mir ir Abesunne miteme Glas Wyy ufem Camping resp. uf dere Wiese u gniesse dr Aabe, bevors morn witer geit richtig Carcross.Read more
See translation
4 likes
Canada & Alaska Roadtrip
Emerald Lake, Carcross Desert & Bennett Beach
August 4 in Canada ⋅ ☁️ 18 °C
Hüt Morge simer vo Atlin uf Carcross gfahre - Carcross steit für Caribou Crossing. Mir hei dänkt, ds sig es ähnlechs „verlassnigs“ Städtli wie Watson Lake aber hei relativ schnäu gmerkt, dass sechs umne beliebte Tourispot handlet.

Ufem Parkplatz si mehreri Cars gstange wo schinbar die viele Chrüzfahrt Touriste vo Skagway (Alaska) fürne Tagesusflug dahäre transportiere. Usserdäm füehrt ä bekannti und wahrschinlech sehenswärti Zugstrecki vo hie nach Skagway und umgekehrt. Dämentsprächend isch oh ds Örtli uf Touris usgleit und äs het äs Visitor Center, äs Kafi u paar Souvenier Shops.

Mir si dür d‘Strass gschlendert, wo üs plötzlech ä Amerikanerin usemne Pickup use het aquatscht. Schinbar het sie erkennt, dass mir Schwizerdütsch rede und het üs gfragt, wohär mir chöme. Ihre Maa isch haube Schwizer u sie het Fröid gha z‘ghöre, dass mir vo Thun si, da sie oh scho dert isch gsi und d‘Stadt liebt (wie chame dä Ort nid liebe! 😍).

Mir si scho fasch am Tschüss säge gsi so à la ja cool kennet dir Thun u bis nieme wieder 😂 u de hei sie gseit „I really need to tell this Tim and Olivia“ und äs het sech de usegsteut, dass dä Tim ar Maylea ihre Cousin (!) isch. Mir hei auso random zwöi Lüt (Michael & Taylor) us Las Vegas troffe, wo ar Maylea ihre Cousin vo Thun kenne. Dr Tim und dr Michael hei ir Schwiz zäme Baseball gspiut. We de d‘Wäut nid eifach äs Dorf isch de weissi oh nid..

Mir hei de mit ihne no dr Emerald Lake besichtigt bis sie sech wieder ufe Wäg nach Skagway hei gmacht, zum pünktlech wieder uf ihrem Schiff z‘si. Mir si de när no ga d‘Carcross Desert besichtige, wo bekannt isch us „die chlinsti Wüesti vor Wäut“. Es handlet sech aber faktisch nid umne Wüesti (für dass isch z‘Klima zwenig troche) sondern umne Sanddüne wo isch entstande, wöu dr Gletschersee isch uströchnet. Mir si de nochli uf die Düne ufe gwandert was sech mega glohnt het, wöu d‘Ussicht mega isch gsi!

Aschliessend hei mir no dr Bennett Beach bsuecht, ä chline Strand mitts im Dörfli am Bennett Lake. Oh dert isch d‘Landschaft würklech idrücklech gsi.

Nachdäm ufregende Tag mit viune schöne Ussichte hei mir üs es Plätzli für üse Van gsuecht u mache üs morn ufe Wäg nach Alaska. 🇺🇸Read more
See translation
3 likes
Canada & Alaska Roadtrip
Welcome to Alaska!
August 6 in the United States ⋅ ⛅ 16 °C
Gester am Morge hei mir zämepackt und si übere White Pass vo Carcross nach Skagway gfahre - d‘Ussicht isch spektakulär gsi und mir hei langsam verstange, wieso die Lüt aui dr Wäg uf Carcross hei uf sech gno. I däm schöne aute Zügli isch d‘Fahrt vermuetlech no schöner.

Zimlech uf dr Passhöchi simer när über d‘Gränze gfahre und hei no müesse usstige zum dr Pass zeige, Fingerabdrück gäh und 30$ pro Person zahle - welcome to the U.S. I guess.. zäme mitem ESTA hani iz auso quasi 70$ „Itritt“ id USA zaut.. 😂 immerhin heimer no ä Stämpu i Pass übercho, oh wenns nur sone Touri Stämpu isch gsi wo nid würklech offiziell het usgseh.

In Skagway simer de chli dürs Städtli gschlendert, si zumne Ussichtspunkt gwandert und hei d‘Fähretickets kouft, zum am Tag derna uf Haines z‘fahre. Dä Ort het nur ca. 1‘000 Iwohner, wird aber täglech vo ca. 14‘000 (!) Chrüzfahrt Passagiere überseklet und dämentsprächend hets ou usgseh und dr Ort isch no meh uf Touris usgleit gsi aus Carcross. Zum Verglich: ig ha im einte Kafi fürnes Cappuccino und es Gebäck öpe 18 Dollar zaut… 😂 Mir hei aber glich es paar härzigi Egge entdeckt, es berüehmts „Fry Bread“ gässe (wo mir grad ä guete Momänt hei verwütscht u nid so lang hei müesse ahstah) und üs über die Chrüzfahrt Touriste amüsiert.

Am Aabe heimer äs schöns Plätzli fernab vom Massetourismus gfunge und d‘Nacht verbracht, bevor mir üs hüt nomau is Getümmel hei gstürzt und ä feini Cinnamon Roll hei gässe.

Ize warte mir uf üsi Fähre, wo üs i ca. 1h nach Haines bringt. ⛴️Read more
See translation
4 likes
Canada & Alaska Roadtrip
1 1 1
Haines & GRIZZLIES! 🐻
August 7 in the United States ⋅ ☁️ 15 °C
D‘Fähre vo Skagway isch schnäu und ribigslos gange und mir si nach ca. 1h guet uf dr angere Site vom Kanal ahcho.

In Haines heimer üs ä vollusgstattete RV Park für guets Gäud gönnt, dass mir hei chönne Gebruch mache vor Duschi & Wöschmaschine.

Vo Haines heimer vor ca. 2 Wuche imne Reisefüehrer gläse, wöu dä Ort bekannt isch für Grizzlies. Denn heimer no dänkt, dass mir eh nid uf Alaska göh. Wo mir de im Yukon hei gmerkt, dass aui schlaue Route dür Alaska füehre, heimer üs rächt schnäu für die entschide, wo via Haines geit.

Uf dr Suechi nachemne guete Restaurant wo Lachs serviert simer de chli ire Spelunke glandet, da‘s irgendwie nid so eifach isch, in Alaska oder de USA generell äs guets Resti z‘finge. D’Bedienig isch semi gsi, aber d’Salmon Fish & Chips si guet gsi - oh wenn relativ tüür für das wos het gäh.

Mir si de zimlech spät no zu däm Chilkoot River hingere gfahre, wo mä schiins d‘Bäre söt gseh. Es isch aber scho rächt dunku gsi, drum heimer oh nümme viu gseh (obwou d‘Maylea bhouptet, sie heig vo witem ä Bär gseh, vilech ischs aber ou ä Stei gsi…).

Am nächste Tag simer chli dür ds Örtli gschlendert und hei gmerkt, dass hie iz nid würklech d‘Post abgeit. Mir si aber de per Zuefau amne Büro verbigloffe, wo ä Tagesusflug mitem Boot uf Juneau abiete und garantiere, dass me uf dere Fahrt Orkas und Buckelwale gseht.
Mir hei chli hin und här studiert, ob mir ds Gäud würklech wei investiere u hei üs aber de gli derzue entschide, dass sech ds lohnt. Da d‘Tour für am Samstig aber usbuecht isch gsi, chöi mir ersch am Suntig gah und „müesse“ drum chli lenger in Haines blibe aus plant.

Nachdäm mir ds buecht hei simer gah ichoufe und hei üs nomau ufe Wäg zum Chilkoot River gmacht. Dert heimer üses Outo bire Brügg parkiert und si öpe 200m gloffe woni gfunge ha, ig muess ize ds „Achtung Bäre“ Schiud fötele. Glichzitig het üs ä Frou gfragt, ob mir scho Bäre heige gseh u GENAU i däm Momänt chöme 2 Baby Grizzlies usem Waud use und churz drufabe no d‘Mama mit 2 witere Babies.. mir hei üsne Ouge nid trout, was mir da ize grad gseh hei.

D‘Bäre si richtig Brügg gloffe und mir (langsam und mit viu Sicherheitsabstand) hingernache. Dert heimer ne no chönne zueluege, wie si im und ums Wasser am spiele und fische si gsi. Plötzlech hei sie sech de derze entschide, 3m vo üs entfernt d‘Brügg z‘überquere und ds isch äuä z‘krassiste Wildlife Erläbnis i üsem ganze Läbe gsi - mir hei üs geng no nid erhout drvo! 😁

Nach däm Erläbnis heimer üse Van direkt am Meer abgsteut, mitemne Bier druf agstosse und ä feini Sushi Bowl kredänzt.

D‘Wisschopfseeadler und Seehüng wo mir de när no vo de Campingstüu us hei gseh, si ufs mau nümme sooo spannend gsi…Read more
See translation
Traveler Nice
3wReply
Traveler Scho cool
3wReply
Traveler Oz
3wReply
4 likes
Canada & Alaska Roadtrip
ä Bootsfahrt nach Juneau 🐋
August 9 ⋅ ☁️ 14 °C
Eigentlech hei mir nur zwöi Nächt in Haines wöue blibe, wäg üsem Usflug am Suntig sis de total vier worde.

Am Samstig hei mir drum bi nid so guetem Wätter chli müesse Zyt vertribe u si am Vormittag ah Farmers Market. Dä isch winzig gsi, mir hei dert aber ono äs guets Kafi entdeckt. Mir hei de ono usegfunge, dass es in Haines ä auti Filmkulisse git, wo i dä 90er Jahr fürne Disney Fium isch brucht worde.

Nachdäm Usflügli simer no churz id Bibliothek fürs Wifi u hei derna ä chlini Wanderig zumne Ussichtspunkt (Battery Point) gmacht. Aschliessend heimer üs nomau ufe Camping vor erste Nacht ine gschliche zum ga dusche, sägets niemerem… 😉 D‘Nacht heimer de wieder am gliche Plätzli verbracht wie die vorhärigi Nacht.

Am Suntig simer när mit de Alaska Fjordlines uf Juneau gfahre und hei ungerwägs sicher 7 Buckelwale gseh - es het sech auso definitiv glohnt. 😍 Mi Troum wäre zwar Orkas gsi, aber sooo viu Glück hani äuä glich nid.. 😉 D‘Fahrt isch knapp 3h gange u mir hei näbst de Wale ono Seehüng, Wisschopfseeadler, Delfine u imposanti Gletscher gseh und ä feine Muffin serviert übercho.

In Juneau heimer de ungfähr 3h Zyt gha zum chli dürs Städtli schlendere. Es isch nid mega spektakulär gsi, aber glich cool us Teil vo däm Usflug u de ischme ömu mau ir Houptstadt vo Alaska gsi.. 😉 Us kulinarische Höheflug heimer üs ä Salmon Corndog gönnt.

Funfact: nach Juneau füehrt ke Strass, die Stadt isch auso nur per Boot oder Flugzüg erreichbar!

Ufem Rückwäg heimer nomau (ohni übertribe!!) öpe 15 Buckelwale gseh und sogar eine dervo usem Wasser gumpe - es hät auso nid besser chönne si! 😍 Ufem Boot heimer de oh die öpe einzige 5 Minute Sunneschiin sitmer in Alaska si chönne gniesse. 😉
Es het de ono Znacht gäh (ä Lachs Suppe) u somit heimer iz immerhin Lachs i 3 Variatione gässe i de letste 3 Täg.

Mir hei üs derna wieder es schöns Plätzli für üse Van gsuecht zum d‘Nacht verbringe und fahre morn wieder zrüg nach Kanada.Read more
See translation
3 likes
Canada & Alaska Roadtrip
3 3 2 1 1
Kluane Nationalpark 🏔️
August 11 in Canada ⋅ ☁️ 19 °C
Gester si mir vo Alaska wieder zrüg uf Kanada gfahre. Mir hei üs scho uf die nätte Kanadier*inne gfröit, aber dr Herr ar Gränze isch eher unfründlech gsi.

Üses Ziel isch Haines Junction gsi und d‘Fahrt dert häre isch wieder sehr sehenswärt und ussichtsriich gsi. Mir hei ungerwägs no bim Kathleen Lake gstoppt und bir Asicht vo däm See dänkt „okay ja, haut ä See“.. är isch de glich no spektakulär worde, aber ersch speter.

In Haines Junction heimer üs über d‘Wanderige im Kluane Nationalpark informiert und ä Wanderig gseh, wo mega schön het usgseh aber anschiinend 6-10h duret. Es isch aber gstange, dass me oh nur ä Teil dervo cha mache bis zu somne Plateau wo 4-6h duret u de heimer üs glich für die entschide.

Nachdäm simer ga ichoufe u Wasser uffülle und hei üs äs Plätzli für d‘Nacht gsuecht. Mir hei üs vorgno am 7i ufzstah für die Wanderig.

Am Morge am 7i simer ufgwacht u es het grägnet.. drum simer nochli blibe lige und wos de het ufghört heimer üs irgendwenn glich ufgrafft und üs entschide ga z‘wandere. Mir hei auso die Wanderig schlussändlech ersch am 10:30h gstartet und üs ufe Wäg richtig „King‘s Throne Summit“ gmacht. Dr ganz Ufstieg geit nur ca. 6.7km, het aber total 1‘300 Höhemeter, es isch auso entsprechend steil.

Mir si nach ca. 2h bi däm Plateau acho u hei de gfunge de chöimer ja grad so guet bis zum Gipfel.. 😂 es isch relativ guet gange, aber scho sehr steil gsi. Mir si oh rächt lang düre Näbu gloffe u si aber sicher gsi, dass es wird ufdue und ds isch de när oh passiert. Für die Ussicht het sechs auso definitiv glohnt u mir si nach ca. 4h happy ufem Summit gsi. Vo da us hetme de dä Kathleen Lake oh i sire ganze Pracht gseh u mir hei ne de doch no spektakulär gfunge. 😍

D‘Herusforderig isch dr Wäg zrüg gsi wöus seeehr rütschig isch gsi über die Gröllfäuder u mir vorauem oh irgendwenn ke Bock meh hei gha.. 😂 nach total 7.5h simer de aber oh wieder dunge acho u hei müesse feststeue, dass die Zytagab vo 6-10h retour doch het gstumme.

Mir hei de no ä öffentlichi Duschi (ds heimer üs verdient 😂) und äs Plätzli für d‘Nacht gsuecht.

Morn geits witer uf Whitehorse - mi letst Stopp im Yukon und z‘Ändi vo üsem Roadtrip.Read more
See translation
Traveler Ja, gset steil u steinig us. 😅
2wReplyTranslate
Travelerjaa 🫣
2wReply
TravelerJa es het id Wadli glöötet sägeni dir!
2wReplyTranslate
7 more comments
4 likes
Canada & Alaska Roadtrip
Whitehorse & tschüss Maylea ❤️
August 13 in Canada ⋅ ⛅ 21 °C
Nach dere länge u asträngende Wanderig heimer am Mittwuch afang mau usgschlafe u si gmüetlech i Tag gstartet. Mir heis gnosse, dass d‘Sunne wieder mau het gschune und dass es tatsächlech oh wieder einisch churzi-Hose-Wätter isch gsi.

Gäge Mittag simer de när richtig Whitehorse gfahre und hei dert aus ersts z‘Visitor Center bsuecht zum usefinge wo dass es ä guete Campingplatz git und fürne gratis Chläber z‘übercho. 😉

Mir hei üs när ufemne Campingplatz i Stadtnechi igrichtet und si am Fluss entlang id Stadt gloffe. D‘Stadt säuber isch nid würklech sehenswärt, aber mir hei äs guets Restaurant gfunge woni mini ersti Poutine ha chönne ässe (ds isch z‘kanadische Nationalgricht u besteit eifach us Pommes, Bratesauce u Chääs.. 😂) ig ha ä fancy Variante bsteut wos no Poulet und Chnoblisauce drzue het gäh.

Lustigerwis heimer i däm Resti no lüt wiedertroffe wo mir ufem Boot nach Juneau hei kenneglehrt. Sie hei üs oh verzeut, dass es uf dr Strecki vo Carcross nach Skagway ä Erdrutsch het gäh u darum d‘Strass gsperrt isch. Mir si de froh gsi, dass mir vor 1 Wuche dert no hei chönne dürefahre süsch wär üsi Route nid ufgange.

Nachem Ässe simer gmüetlech am Fluss entlang wieder zrüggloffe u hei üses Ässe verdout u ig ha mini letsti Nacht i Maylea‘s Van (sie heisst übrigens Bessie) verbracht.

Hüt Morge heimer es letsts Campingzmorge gnosse u di derna no dr Miles Canyon ga aluege und ga käfele.

När hani mi nach knapp 3 Wuche wieder vor Maylea müesse verabschiede (🥹) u warte iz am Flughafe uf mi Flug nach Vancouver.

Merci für dä wunderbar Roadtrip liebi Maylea - ig ha viu glehrt uf mire erste richtige Campingreis! 🥰 Und bis ganz glii wieder ir Schwiz. ❤️Read more
See translation
Traveler❤️❤️❤️
2wReply
4 likes
Canada & Alaska Roadtrip
Vancouver - big city life
August 14 in Canada ⋅ ☀️ 25 °C
Im Flüger bini am Notusgang ghocket und ha drum gäbigi Beifreiheit chönne gniesse - us Tüpfli ufem i isch nachem Sandwich no äs warms Cookie serviert worde. 😍 Mi Flug isch auso sehr agnähm und zügig verbi gange und ig bi knapp 2h speter paar Kilometer witer südlich in Vancouver glandet.

Nachdäm ig mis Gepäck ha entgäge gno hani mi ufe Wäg gmacht id Stadt - ig ha äs Hostel in Downtown buecht. Ig bi zwar nid unbedingt Fan vo Zimmer mit Frömde teile, aber es Hotelzimmer für mi allei isch quasi unbezahlbar gsi. Z‘Hostelzimmer teili aber zum Glück nume mit 3 Froue, die si aui agnähm und z‘Zimmer isch suber. Ds isch scho viu wärt, da hani uf vergangene Reise scho durchus viiiu schlimmers erläbt. 😂

Da‘s scho relativ spät isch gsi hani numeno ä Spaziergang dürs Quartier gmacht u bi uf Snack Suechi gange und nachere Duschi is Bett.

Hüt Morge bini mitem Aquabus uf Granville Island gfahre und ha dert dr Public Market bsuecht, bi dür die härzige Lädelis gschlendert u ha es paar Postcharte verschickt. Nachdäm bini mitem Aquabus witer zur Rogers Arena gfahre - z‘Stadion vo de Vancouver Canucks. Ig ha im Vorfäud recherchiert u ghofft die heige scho Vorbereitgsspiu, d‘Pre-Season faht bi dene aber ersch Ändi September ah.. 🥲

Vo dert us bini dür „Gastown“ spaziert, es historischs Viertel in Vancouver mitere berüehmte dampfbetriebene Uhr.

Per Zuefau bini de am „Vancouver Lookout“ verbi cho u ha natürlech mau wieder z‘viu Gäud fürne eher durchschnittliche Ussichtsturm zaut, ds passiert mir äuä no i jedere grössere Stadt einisch… 😉 Es isch aber glich aube cool, ä Stadt vo obe z‘gseh.

Vo dert us isch mi Wäg witergange übere Canada Place u am Seawall Water Walk entlang wieder richtig Downtown. Zum Znacht hani mir feini Ramen gönnt - ä Vorteil vore grosse Stadt isch schliesslech oh internationals Ässe.

Bishär gfaut mir Vancouver sehr guet und ig gniesse d‘Annähmlichkeite vore grosse Stadt. Es bizli schockiert heimi aber die viele Drogeabhängige woni ha gseh - ds schiint hie extremer z‘sii aus i angerne Städt. Fentanyl isch anschinend ou in Vancouver es Problem.

Iz ligi mit knapp 20‘000 Schritte im Bett u bi gspannt, was die nächste Täg no wärde bringe.Read more
See translation
3 likes
Canada & Alaska Roadtrip
Stanley Park
August 15 in Canada ⋅ ☀️ 23 °C
Hüt bini quasi dr ganz Tag einisch rund ume, zwüschine quer düre, immer wieder ufe und abe u hin u här düre Stanley Park gloffe und voilà, das di d‘Föteli dervo. 😁

Ide meiste Reisefüehrer und Guides wird empfohle es Velo z‘miete (es het ä tiptope Velo- und Fuessgänger*inne Wäg). Ig ha mi aber entschide z‘Fuess z‘gah und bi rächt froh drum gsi wöu mir öpe 37‘265 Velos si entgäge cho.. 😂 Dr Velowäg isch nume one-way u ig bi i die entgägegsetzti Richtig gloffe.

Me oder weniger per Zuefau bini am Schluss wieder am English Bay Beach glandet und dert grad pünktlich füre Sunneungergang acho. Es isch aber ufgrund vo de Waudbränd ir Region sehr dunstig in Vancouver u drum hetme nid sooo viu Sunne gseh.

Ig ha äs Bannock (traditionells Fladebrot vor indigene Bevölkerig) mit Lachs gässe und d‘Ussicht gnosse, bevori wieder is Hostel zrüg bi - hüt hets für knapp 30‘000 Schritte glängt. 😁Read more
See translation
5 likes
Canada & Alaska Roadtrip
No meh (Buckel)wale & North Vancouver
August 16 in Canada ⋅ ☀️ 24 °C
Ig ha rächt lang überleit obi nomau (gnue) Gäud fürne Whale Watching Tour söu zahle wöui uuuunbedingt Orkas ha wöue gseh. Buckelwale si oh sehr toll, aber besser aus in Alaska wirds äuä nümme und ig ha se ou scho in Australie gseh.. (Luxusproblem, ig weiss! 😉)

Ig ha de gfunge uf die paar Franke chunts ou nümme druf ah u ig bi ize ä Monet nümme im Usgang gsi (😂) und ha die Tour buecht.

Es isch sehr spannend gsi und d‘Meeresbiologin wo drbi isch gsi het viu interessanti Sache über d‘Wale und angeri Meeresbewohner verzeut. Mir hei relativ schnäu zwöi Buckelwale gfunge wo aber „nume“ chli uf und ab toucht si.
Mir hei när am Horizont eine gseh uf gumpe und ds isch mega cool gsi wöu mir si när necher häre gfahre und är isch sicher no 3x ufgumpet und ig hane chönne fiume. 🥰

Nach dene Sichtige heimer ou no Seelöie und Seehünd gseh - aber leeeeider keni Orkas.. ig bi scho chli enttüscht gsi, da ig aber uf dere Reis SO viu cooli Tier ha gseh isch ds ou okay. 😉

Nachemne Zwüschestopp im Hostel bini mitem SeaBus nach North Vancouver gfahre. Dert hets es härzigs Hafequartierli und es lohnt sech vorauem wäg dr super Ussicht uf d‘Skyline. Aber oh da si d‘Fotos so semi worde wägem dunstige Himmu.. 🥲

Ufem Rückwäg bini nomau dür Downtown und ar Granville Street entlang gschlendert. Sie hei da ä rächt cooli Fuessgängerzone gmacht, ds si äuä no Überbliebsel vor Fuessbau WM. Ig ha mir de no ä „free“ Zuckerwatte und ä Pizza gönnt, bevors wieder is Hostel isch gange.Read more
See translation
3 likes
Canada & Alaska Roadtrip
Vancouver - Amsterdam - Thun ❤️
August 18 in Switzerland ⋅ 🌧 21 °C
Am Morge vo mire Abreis hani wöue usschlafe aber es het scho wieder öper am 08:00 z‘Gfüeu gha, sie müess ize z „grosse“ Liecht alah.. 🫠

Item, ig ha de mini Sache zämepackt und uscheckt u bi ga zmörgele. Ig bi ah glich Ort häre wie 2 Täg vorhär und die Dame dert het mi mitemne „Good to see you again!“ begrüesst. 😊 Aschliessend bini de nochli am Strand entlang spaziert, bevori es Uber ah Flughafe ha gno.
Ig bi sehr früeh dran gsi u ha drum no viu Zyt gha zum lädele u käfele.

Das mau bini schleuer gsi und ha ä Gangplatz reserviert, ds isch sehr viu wärt bimne Langstreckeflug fingi. Näb mir ische euteri Dame ghöcklet wo sehr nätt isch gsi u viu Smalltalk het gfüehrt. Irgendwenn het sie mir de gseit, dass sie ca. 1x pro Stung müess ufstah „because otherwise I will get cramps“ und „I hope you don‘t mind“… hät oh gschider ä Gangplatz buecht die gueti Frou. 😂

Sie het mi zwar nie aktiv gweckt, aber immer weni mi bewegt oder d‘Ouge uftah ha d‘Chance gnutzt zum säge „excuseee mee, sorryyyy..“ voilà, ig bi de nid sooo erholt 9h speter in Amsterdam ahcho.
Dert hani nomau 3h müesse warte u wieder glädelet u käfelet.. 😂 iz bini sehr müed im (immerhin direkte) Zug uf Thun u fröie mi uf mis Bettli.

Es ische wahnsinns Reis gsi, ig ha viu gseh, erläbt u glehrt und fröie mi scho ufs nächste mau!

Thank you, Canada! ❤️Read more
See translation
3 likes

Trip end
August 18, 2026