Huayna Patosi

D Linda het en 5000er (Pico Austria) gmacht und het mit dem au ihri Wanderluscht mol gstillt cha. D Linda isch dennä 3 täg in La Paz bliebe währed ich noh es 3 Tagestöurli buecht han. I han noh de Huayna Patosi (6088m) wöllä mache.

Am erschte Tag simmer eifach vom Basislager chli uf de Gletscher es paar basics go üäbe und nochenä nochli go semi iskletterä. Doh mini ganzi Gruppe abgsprunge isch bini allai gsie mit em Bergfüährer. Drum hemmer au chli meh umäkräxla chönne.
Gschlofe hend mer dennä widr im Basislager welles eifach frech uf de höchi vom Mont Blanc isch. Am zweite Tag simmer dennä is nögschte Lager ufe uf 5250 m. Da sind so 2 stund chli laufe gsie. Aber hald glich recht streng doh mer alles hend mösse ufeträge (schlofsack, esse etc) und hald wiedr d höchi. S laufe isch no ohni problem gange, aber wommer a cho sind uf de 5250 hanni d höchi recht gspürt. Ha Kopfweh becho und schlecht isch mer au gsie.
Mer hend dennä uf em Höhelager noh Znacht gässe und sind dennä früäh is Bettli gange. Noch emne nöd vorhandene schlof isch es dennä am 11:30 wiedr uf gange zum go "zmorge" ässe. Um Mitternacht isch es dennä richtig Gipfel gangä. Da isch dennä alles tip top gange, doh mis kopfweh weg gsie isch und mer nüm schlecht gsie isch. Isch MEGA toll gsie. Würi gad wieder mache.. NICHT!
Natürli bini ufgwacht und s Kopfweh und s schlecht sie isch immer no awesend gsie. Ich bin dennä glich mol los. Diä erschte 2 Stund bis so 5750 m sind so chli diä unchilligschte Moment gsie bim wanderä ever. Durd Astrengig isch mer noh meh schlecht worde und i ha mi so all 15 min erbroche. Dötte bini aso recht am kämpfe gsie und bi mit de Gedanke immer chli bim eifach abbreche gsie. Aber ich bin dennä glich witer glofe doh mis Ego da nöd het wöllä zueloh.. Es isch nocher au besser worde und I ha mi widr fitter gfühlt. Bis uf 5950m isch dennä ganz guet gange. Aber nochenä ischs nomel id Kategorie de scheiss machi niä meh gange. Immerhim simmer dennä diä erschte uf em Gipfel gsie und hend de Sunneufgang chli chönne gnüsse. Obwohl mer de Körper scho gsait het: "du ghöhrsch doh nöd ane". Drum bini au happy gsie zum dennä schnell wiedr zrug i meh verträglichi Höhenä.
Fazit isch, ganz toll hanis gmacht aber machs sicher kais zweitmol meh in nöcher Zuekunft. Also zmindischt kain alpine 6000er meh.Read more