Quebrada Chaupihuayjo

15 km / 9-10 Stunde
Start uf 3340 mt, Pass uf 4215 mt, Abstieg uf 3600 mt, Pass uf 3900 mt, Camp uf 3650 mt

....und ich hans überläbt!
Ich han gmerkt, dass Wandere uf über 3000 mt Höchi ein Vorteil hät: me muess sich so fescht ufs Schnuufe konzentriere, dass Wädli, Oberschenkel oder Chnnüü gar keis Problem sind 🙈

Ganz ehrlich, villicht hilft au min voorbügende Medikamentecocktail us Schmerztablette, Magnesium und Glänktablette.
Es isch würkli mega, wie vill Zyt eim glaa wird uf dem Trail, wie me siis Tempo laufe chan. All paar Höhemeter schnell aahalte, dureschnuufe (reschpektiv wieder zu Luft choo) und denn wiiter laufe hilft scho.
Churz vorem Pass (4215 mt!!!) hani s'Gfühl ghaa, ich chan di letschte paar Meter i eim Schnurz durezieh ohni nomal aahalte. Das isch denn chli i d'Hose. Han fascht kei Luft überchoo und han aagfange Hyperventiliere. Bim iischnuufe häts nume no pfiffe 😵‍💫 De Rony, oise Guide hät denn grad d'Suurstoffläsche uuspackt, die hani aber nöd bruucht, will ich dank em guete Zuerede vom Markus und em Guide allei wieder abechoo bin. Jede Wanderer wird unter Applaus ufem Gipfel begrüesst, das isch mega schön.

De Abstieg zum Lunchcamp isch zwar steil aber guet gange.
Nachem Zmittag, wo wieder superschöön aagrichtet gsii isch, hämmer nomal en Pass gmacht. Dä isch au zimli happig gsii, will fascht alles Stägetritt sind. Ufe 300 Höhemeter und abe au fascht nomal sovill...
Mitem Wätter hämmer Glück ghaa, es hät teilwiis d'Sunne gschiene und mängisch händ ois Nebelschwade vode Cloudy Mountains iigholt.
Womer under Applaus vo oisne Porter im schöne Camp aachoo sind, simmer nachem Znacht scho glii mal is Bett.Read more