Koh Phangan

So mir sind wieder uf de Fähre as Festland.
Mir hend knapp ei Wuche uf Koh Phangan verbracht.
D Insle hät ois sehr guet gfalle. Am Afang hemmer biz päch gha mit de Unterkunft. S Hotel hät im Internet besser usgseh als es denn gsi isch. Mir hend ois so unwohl gfühlt, dass mer denn gfunde hend mer zihend wiiter. Hend denn bim dritte Ahlauf e mega schöns Hotel gfunde. Mir hend ois deht die letschte Täg super wohl gfühlt.
Sogar ein sunnige Tag hemmer gha und de usgibig am Secret Beach gnosse☀️ Sust häts wieder viel gregnet… janu jetzt söts besser werde☺️☀️ mir sind optimistisch.
Mir hend wieder en Roller gha und sind chli d Insle go erkunde, hend Äffli gseh uf de Strass, sind dur halbi Flüss gfahre und hend viel feini Curries und Fried Noodles gässe.
Sust simmer immer na biz im Feriemodus, so viel mache düemmer nanig, drum gits au nöd so viel z brichte🤷🏻‍♀️🤷🏼‍♂️ 😅
De Patrick schaffed immer mal wieder a sim Business, es lauft super, er hät scho sini erste Kunde 😍 Ah fast vergesse, mir hend na e Muay Thai Lektion gha. Am Patrick häts super gfalle, er hät sich super gschlage im Ring, ich han nach 40 min gege de Boxsack verlore und han en liecht verstuuchte Fuess gha und kei Lust meh druf, han denn uf d Bank gwächslet und die restliche 45 min zuegluegt 😅
En Tag vorher hemmer ide Yogaschuel nebed em Hotel e Meditation gmacht gha, das isch eher mis gsi🧘🏻‍♀️ Es isch e dynamischi Meditation gsi wo mer sich zerst gschüttlet hät, nacher tanzed und denn am Schluss na gsesse isch. Das hät au am Patrick super gfalle. Obwohl er am Afang sich biz komisch vorcho isch, nacher hät er s Tanze denn aber voll „gfühlt“🕺🏻

Mir freued ois jetzt zwei Wuche in Phuket zsii und die Gegend na z erkunde.もっと詳しく