Quilotoa Loop: Isinliví - Chugchilán

De hütig Tag started mit Sunneschii - wow, die Ussicht! Han dummerwies mis Ladekabel für d'Kamera z'Latacunga vergesse und d'Kamera gester ned usgstellt, jetz bini natürli ohni Saft. Di andere Schwiizer hend glücklicherwiis eis woni chan bruche währedem Zmorge. Denn heissts au scho Abmarsch und zwar hüt elei wil all andere entweder e Nacht meh blibed oder i di ander Richtig unterwegs sind. Es gaht wider ab id Schlucht, hinde uf de Hoger ufe, denn steil i di negst Schlucht abe, entlang vom Tal hindere und denn namel steil ufe uf Chugchilán. S'Wetter blibt zimli lang zimli schön, was mini fleckewies scho verbrennt Huut ned so toll findet wie ich sus allgemein ^^ D'Landschaft ufem ganze Weg isch eifach nume wow und au de Weg selber isch grandios. Es wechsled zwüsched Feldweg, Möchtegernstrasse, Abschnitt i usgwäschne Felsspalte und de normale Wanderweg entlang vo Häng. Ufem ganze Weg triffi genau öper a und das isch ned en Wanderer, sondern en Iiheimische wo ide zweite Schlucht Chueche verchauft zum sini Chind über d'Runde bringe - da chani ja ned nei sege zu es bitz Energie für de Ufstieg. Zum perfekte Ziitpunkt ziehnd au Wulche uf, so dasi ned ganz so fest schwitze bim ufelaufe. Woni glaube dasi churz vorem Ziel bin, machi ufere erhöhte Stell Zmittagpause und gnüsse debi en phänomenale Rundblick 🥰 Plötzlich entdecki na en Fuchs wo über e Wiese sprinted :) Au am Zmittagplätzli luegt mer useme Loch wider e Spinne entgege. Ufem letste Abschnitt gohts entlang vomene chline Bächli und dur Büsch, was guet für Vögel z'si schiint, wil vo dene häts da diversi :)
Mit müede Bei aber überglücklich chumi schliessli im Hostel a. Da isch definitiv eini vode schönste Wanderige woni je gmacht ha!
Im Hostel bini - wenns kei Churzentschlossni meh git - die Nacht de einzig Gast und chume es Gratisupgrade ines Privatzimmer über - sehr geil :) Nume bitz schad dass dementsprechend au niemer ume isch zum rede aber he, wett mi ned beklage. S'Hostel hät anschiinend erst vor 3 Wuche eröffnet und das merkt mer sogar. De Duschvorhang fehlt z.B. na und au Höögge für verschwitzti Kleider gits na ned würkli ^^ Vorher isches nume es Restaurant gsi.
Au hüt Nami machi wider en churze Usflug is Dörfli, chille viel und probiere mini negste Täg mit es paar Froge a zwei Hostels es bitz z'plane. Fixiere wetti na nüt und muesi au ned wil d'Hostels würked allgemein überhaupt ned guet usbueched aber es bitz e Idee ha und wüsse was d'Möglichkeitd sind isch immer guet :)Read more