Quilotoa Loop: Chugchilán - Quilotoa

S'Ziel hüt und vode ganze Wanderig isch d'Laguna Quilotoa, en wiitere sehr bekannte und wunderschöne Kratersee. Für mich bedüted das en Ufstieg vo 3200 uf 3900 m.ü.M. Zerst aber gits wider es usgibigs Zmorge. Zum Bargeld spare chumi tatsächlich d'Kontoinfos vom Hostel über. E Überwiisig chani aber erst z'Latacunga mache, wo mini schwiizer SIM-Charte für de SMS-Empfang vom Banklogin warted... Danke 1000 für s'Vertraue! Denn goht d'Wanderig bi liechter Bewölkig los, zerst wider id Schlucht abe - wär ja langwilig wemer die ned wider müest überwinde. Ich bi froh um d'Wulche, es isch au mit dene no gnueg warm. Wider hine obe, füehrt de Weg es bitz weniger spektakulär entlang vode Hochebni zumene wiitere chline Dorf, bevors namel steil ufe uf d'Krete vom Krater goht. Zickzack-Wanderweg kenneds i dem Abschnitt ned würkli, es goht zimli grad ufe... Ich probiere einigermasse schnell vorwärts z'cho, so dasi hoffentli na gueti Sicht han dobe. Und das klapped. Nach 3 Stunde laufe (im Hostel hends gseit mer brucht öppe 6 ^^) wirdi miteme Wahnsinnsusblick uf de Kratersee belohnt 😍 Muesi mi grad zerst Mal miteme Zmittag belohne! Währed dem redi churz mitere Familie us Katalonie - dene ihres Spanisch isch definitiv unverständlich für mich... Gege Endi chömed zwei anderi Touris verbi und dene schlüssi mi denn für di wiiter Wanderig a. Wili meh als guet im Ziitplan bin, chani de länger Weg neh und wirde kei wiiteri Nacht do obe verbringe. De Sam isch us England und probiert i sim Johr Amerika sich selber finde. Mit sine Turnschueh häter vorallem i dene Teil wos abwärts goht grössti Müeh... Und sie isch e Nonne us Kolumbie und spielt sehr gern irgendwelchi chrummi Melodie uf de Panflöte. Intressanti Lüt... Irgendwenn holed eus zwei Schwiizerinne uf und ich schlüsse mi ihne a, si hend ehner mini Pace und mini Wellelängi ^^ Zeme mit ihrem Guide erreichemer im Graupel de höchst Punkt vode Rundi uf 3930 m.ü.M und werded ufem Abstieg na einigermasse verschiffed. Di letste paar hundert Meter gohts namel ufe und jetz merki wie kaputt dasi langsam bin. Isch en lange Weg gsi hüt. Zum Schluss laufemer na en chline Teil im Nebel aber das chani verchrafte. Im Dörfli suechi es WC und finde denn use, dass d'Schwiizerinne (wo jetz vier sind wil zwei scho früehner umkehrt hend) na en Platz im Auto hend für mich. Perfekt, denn muesi ned na de Bus go sueche und chan sogar na d'Iitrittsgebühr für de Nationalpark unfreiwillig umgo 🤗
Zrugg im Hostel stelli mi übertribe lang unter di heiss Duschi und gange nachher uswärts mit de Schwiizerinne go Pasta esse - hämer eus verdient! Gliichziitig probieri es Hostel im Cotopaxi Nationalpark z'reserviere, was aber mit de Zahlig irgendwie ned goht. Also schribi ihne es Whatsapp (das isch do z'Ecuador normal. Au Hüser werded über Whatsapp verchauft) und hoffe, dases so klapped. Ich weiss, dass si nume na sehr wenig freii Better hend. Einigermasse spoht chumi d'Antwort über, dasi weni jetz zahle grad na de letzt Platz ergattere chan. Und dasmal klappeds - hallelujah. Isch zwar zimli tüür aber ha nume guets vom Hostel und em Park ghört und glaube Esse und en Teil vode Aktivitäte sind inbegriffe. Hoffe das bewahrheited sich au...
Woni vom Znacht zrugg chume, triffi na d'Nonne vode Wanderig a. Si isch fix und fertig und froh, dass si jetz chan aneligge und erhole 😅

Mis Tattoo usem Amazonas verschwindet übrigens grad zimli fest - scho fast schad, jetz woni mi dra gwöhnt ha ^^
D'Nacht zeigt sich so halbe erholsam, aber sött locker lange für das wo hüt ufem Programm stoht. Nachem ufsto wird wider alles im grosse Rucksack verpackt, Zmorge gsuecht und gesse und uscheckt. Debi triffi au na de Engländer a, wo bestätigt, daser mit sine Schueh grossi Müeh gha hät gester aber trotzdem glücklich isch wils e schöni Rundi isch :)
Denn heissts für mich (mitem Reiserucksack) go Snacks poste und de richtig Bus nach Norde verwütsche, wo mi z'Machachi useschmeisst, wo mi widerum de Shuttle vom Hostel sött uflade. Bis uf Machachi klappeds und wies wiitergoht gsehni jetz denn 😁Read more