Cotopaxi 2 - Montar a caballo

Nachere zimli guete Nacht verwachi mit de Sunne und güggsle mal zum Fenster use, ob sichs echt lohnt zum scho ufsto. Es gseht vielversprechend us :) Also Kleider montiere, Kamera schnappe und los. D'Ussicht isch mit mehrerne Vulkän genial! De Cotopaxi isch dank sinere perfekte Form und de Höchi vo 5897 m de bekanntist Vulkan und zweithöchsti Gipfel vo Ecuador. Experte erwarted en negste Usbruch na i dem Jahr und d'Vorbote defür sind dur di dunkel ufstiegend Wulche dütlich z'erkenne. E Bestiigig isch drum aktuell au ned möglich. Ich gnüsse die ruhige Morgeminute, bevors Zmorge git. Nachher isch scho zimli gli Treffpunkt für d'Aktivitäte. Für mich isch am Fuess vom Cotopaxi im Nationalpark Pferderiite agseit. Bin ja sus kein grosse Kolleg vo dene Tier aber d'Beschriebig hät grandios tönt. Nach sehr churze Instruktione chömemer Helm und Ross über und los gohts. So ganz wohl fühli mi grad no ned aber wird scho besser werde. Mis Ross isch bitz stur und tested zerst mal us, waser alles chan mache ohni dases mich stört. Ich zeigem aber wer de Chef isch und vo denn a klappeds ganz guet und es isch au gar ned mal so ungmüetlich wieni denkt hett :) Über Wiese und entlang vonere Schlucht riitemer mängmal sicher und stellewies bitz unsicherer im Schlamm dur de Park. Mis Ross hät ned sonderlich gern Wasser und macht drum über de eint Bach en zimli grosse Sprung 🙈 Leider isches scho zimli bewölkt aber egal, isch glich schön. Nach 1.5 Stund gits e Kaffipause und bim Abstiege merki denn au, dasi bitz komisch ghocked bi - fühle mit wie öppe 70i ^^ De Zruggweg beinhalted au d'Möglichkeit zum galoppiere und grundsätzlich chan mer sich au gar ned wehre degege. Wenn eis Ross afangt, i eusem Fall das vom Guide, sprinted eifach all andere hinedri. Solangs graduus und imene ned allzuschnelle Tempo isch, stört mi das au ned aber eimal ischs scho cheibe schnell gsi und hät ned wele bremse wo ich han wele... Und es anders mal ischs wege irgendöpisem verschrocke und hät e scharfi Kurve gmacht, so dasi Glichgwicht und Fuesstritt verlore han. Kei Ahnig wie dases gange isch aber i hanen chöne ahalte bevori gheit bi 😅💪 Nach dene Gallopp-Einheite weissi jetz au, wieso das Riite astrengend söll si ^^ So alles i allem muesi sege ischs e geniali Sach gsi. Super Landschaft, de Rege gekonnt umritte und denn au na bitz unerwarteti Abentür gha :)
Zrugg im Hostel warted wider es Zmittag und d'Hängematte uf mich. Bi grad bitz gschluuched 🙈
Womer denn nachem Zmittag am Namittag gern würed in Hotpot go, isch de wege Dachersetzig gschlosse und wie sich usestellt hüt nüm würkli bruchbar. Das isch schlechts Timing aber janu, e langi heissi Duschi isch au guet. Und ich chan am Hostel-PC mis Hostel für di negste Nächt über Ostere bueche. Au hüt gits wider en Snack und nachher Marshmellows überem Chemine-Füür 😍 Au immer frei zuegänglich sind Banane und Bananebrot, mer mues also sicher ned hungere do... D'Bananeschale sind denn au s'Lieblingsesse vode huuseigne Lamas, womer selber chan go füettere :)
Hüt Obig bini recht müed und gange nachem Znacht und eim churze Gspröch is Zimmer. Das teili hüt nume mitem Paul us Irland, woni gester scho kenneglernt han. Irgendwie passierts, dasmer i rechte "gspürschi-fühlschmi-Gspröch" endet, was zwüsched all dem "vo wo chunsch? Wie lang bisch do? Was schaffsch?" au mal wider zimli e gueti Sach isch - wie mir beidi eus einig sind :)Read more