Cotopaxi 3 - Pasochoa

Die Nacht schloft sich super. Am früehne Morge ufem Weg zum WC muesi feststelle, dass d'Wulche immerna tüüf hanged. Das verspricht erfahrigsgmäss ned viel guets für de bald abrechend Tag. Egal, zum namel schlofe langeds. Na vorem Zmorge isch wider packe und uschecke agseit. Hüt gohts in Gummistiefel uf e sechsstündigi Wanderig - tönt vielversprechend ^^ De eint oder ander seit spontan wege schlechter Sicht au na ab, aber ich glaube as guete vode Wanderig. Ich teile de Rucksack mit mim Zimmerkolleg wil ihm siine kaputt isch. Er fangt ufem erste zimli steile Astieg dur de Wald direkt hinterem Hostel a mit schleppe :) Nachher wirds flacher, steiler, flacher und wider steiler. Mir hend e gueti Gschwindigkeit, mached aber immer zimli lang Pause. D'Wanderig gfallt mer super und meistens isch d'Sicht au gar ned soo schlecht. Mitem Gipfel in Ussicht entscheidemer zum ned ganz ufstiege. Mir sind z'langsam gsi, so dases eus nüme oder nume sehr knapp uf de Shuttlebus lange wür... Isch bitzeli schad aber d'Ussicht dobe wär eh zimli inexistent gsi und besser umchere als im Stress abstiege. Di ganz Wanderig isch e zimli matschigi aber lässigi Aglegeheit. Womer wider unter de Wulchegrenze sind, gsehmer tatsächlich au ab und zue bis is Tal abe. D'Füess halted isch überraschend guet ide Gummistiefel. Ich hett erwarted, dases astrengender isch und meh ribsched :) Gnueg früeh zum Füess dusche und gmüetlich esse simer zrugg is Hostel gschliefered ^^ Und denn heissts au scho Abschied neh vo Hostel und allne Lüt, wo ned mitem gliche Shuttle wie ich uf Baños chömed - schön ischs gsi!
Bitz meh als 3 Stunde spöter stiig ich als letzts vor mim Hostel zum Shuttle us und wirde dete direkt vonere Iiladig zum Bierpong hüt Obig iiglade. Mal luege, eigentli bini ja müed und wett zerst mal iichecke ^^ Das Prozedere stellt sich als üsserst langsam use aber han ja kei Stress, alles wasi na wett mache isch dusche und schlofe. Hunger hani dank vielne Snacks im Bus ned würkli ^^ Mitem einte Zimmerkolleg redi über mini Kamera - er hät di glich aber ohni Zoomobjektiv, waser je länger je schlechter findet - verständlicherwiis. Schliessli ziehts mi denn glich na in Richtig Bierpong. Ich spiele aber ned mit, ha kei Lust und wett chöne abschliiche. Schliessli triffi wider uf d'Schwiizerinne vo Quilotoa und pläuderle de Rest von Obig mit ihne und na öperem usem Thurgau. Erholsam nach zwei Täg eigentlich nume Englisch :) So gege Mitternacht schaffis denn schliessli is Bett, das sött lange zum morn fit si.

A alli wo fliessig mitlesed: ich freue mi über Nachrichte vo eu. Wie gohts, was lauft, was verpassi ide Schwiiz? 🙃Read more