Cotopaxi 1 - Cascada Escondida

Pünklich am 5 vor 11i treffed au na es paar anderi Reisendi i, wo is Secret Garden Hostel wend und überraschend pünktlich am 11i denn au de Shuttlebus. Inere einstündige Fahrt meh oder weniger über Pflastersteistrosse bringt eus de is Hostel, wo usserhalb vom Nationalpark am Fuess vomene Vulkan lokalisiert isch. Dete acho, gits e grösseri Info mit allne mögliche Tagesusflüg. Ich wür gern 3 devo mache, ha aber nume 2 Täg bueched - doof. Egal, als ersts gits jetz mal Zmittag, denn werded Zimmer bezoge (wobi de Masseschlag bitz wenig Platz hät für Gepäck) und nachher heissts Gummistiefel fasse. Am erste Namittag isch immer e Wanderig zu versteckte Wasserfäll ide Nöchi inbegriffe. Öppe e Stund lang kämpfemer eus dur Schlamm und entlang / dur de Bach, was recht abentürlich und super schön isch :) Di ganz Muetige waaged bim Wasserfall de Sprung is iischalte Wasser - ich verzichte hüt gern druf, ha scho chalt bim zueluege und de Rege isch au nüm wiit weg... Währedem laufe merki, dass d'Bei vode Strapaze di letzte Täg na zimli müed sind - was mini Entscheidig für s'Tagesprogramm vo morn eifacher macht. Troche chömemer wider im Hostel a und gnüssed en Snack. S'Hostel isch super chillig, hät e mega familiäri Stimmig, en Hot Pot und bi guetem Wetter e grandiosi Ussicht uf verschidensti Vulkän. Wasi ned gwüsst han, isch, dases kei Internet git. Isch bitz doof, wil eigentli würi gern na es Hostel für s'Osterwuchenend bueche. Mal gugge... Nachem Snack beschäftigemer eus bis zum Znacht mit Chartespiel, unterbreched denn fürs Esse und mached nachher wiiter. E lustigi Sach :)
Einigermasse früeh ziehts mi is super bequeme Bett. S'Zimmer isch es eiges Gebäude und wird miteme Chemine ide Zimmermitti gheizt - richtig heimelig 🤗Read more