Ingapirca

D'Busfahrt isch ned sonderlich bequem und ich schlofe glaub ned grad viel. Han vergesse, dass mis Nackechüssi es Loch hät und nüm funktioniert... Zimli müed chumi am Morge am achti im Hostel a und chan sogar grad s'Zimmer bezieh. Nach bitz umegammle machi mi uf de Weg zrugg zum Busterminal für d'Fahrt nach Ingapirca, em Machu Picchu vo Ecuador. Nach ewigs warte bis de Bus fahrt, zweiehalb Fahrstunde und eimal umstiege spöter chumi immerna müed und au sus ned so fit dete a. S'Dörfli isch super friedlich und d'Ruine ligged es bitz usserhalb ufeme Hügeli. Ich bueche e Tour und warte wider e Stund bis si losgoht. I dere Ziit gnüssi d'Rueh und bsueche churz s'Museum. D'Tour isch wie sich usestellt nume in Spanisch, was es bitzeli e grossi Enttüschig isch. Ich versto zwar bitz öpis aber sehr viel Informatione blibed ned hange und glaube sie verzellt allgemein ned soo viel. Wasi weiss: Grundstei sind vermuetli öppe 900 v.Chr. vom Volk Cañar gleit worde. Spöter hend d'Inka d'Alag überno und usgwiited, was a de verschiedene verbaute Steiarte z'erkenne isch. Bestandteil sind es Observatorium, es Getreidelager, Sohnflächi und en Turm. Für was genau di ganz Alag dient hät, weissmer bis hüt no ned. Ja und viel meh weissi denn scho nüm - janu ^^ Ufeme chline Rundgang nebed de Ruine gits na anderi Sache z'gseh, wie zum Bispiel d'Felsformation "Cara del Inca" und mit bitz Fantasie chamer würkli es Gsicht erkenne. Au uf de Retourfahrt dösi wider bitz und chume mitem Sunneuntergang zeme wider z'Cuenca a. Im Hostel muesi mi endli mal wider um Wösch kümmere. Dankemene Zwinkere an Mitarbeiter machters denn au gratis 🙈 Dasmer sini Wösch abgit und suuber zruggüberchunnt isch da normal :) Denn findi use, dasi d'Reis ad Küste für min negste Stop besser dur de Tag als ide Nacht mache wil mer mues in Guayaquil umstiege und die Stadt isch ned eifach nume es bitz kriminell sondern grössteteil würkli gföhrlich wils de Hauptumschlagpunkt vode aktuell grösser werdende Mafia und Drogeszene isch. Di meiste Touris und so au ich verbringed höchstens es paar Stunde dete zum umstiege oder en Flug verwütsche... Whatever, uf jede Fall hani denn am Obig na mitem Paul vo Cotopaxi abgmacht uf es Znacht. Mir sueched und finded e Pizzeria und hend en lustige Obig. Mitem Esse bin ich super glücklich aber de Paul chunnt es bitz e chlini Portion Pasta über und isch apisst. Verständlich, mir zahled defintiiv gnueg defür aber ich mag eh ned di ganz Pizza also gohts wider uf ^^ Aschlüssend gits en chline Verdauigsspaziergang ide Stadt und schliessli gheii super müed is Bett und schlofe ewigs lang und super guet :)Read more