La ciudad de Cuenca

Nach usgiebig schlofe stoht hüt Stadt erkunde ufem Programm. Defür hani e Free Walking Tour bueched, wo erst am 11i afangt. Das langed also vorher grad no zum e Rundi go renne. Mis Hostel liit grad am Fluss und entlang vo dem häts en schöne Weg für das. Ha scho fast vergesse, wie astrengend dass renne uf 2500 müM isch aber tuet glich guet :)
Ufem Weg zude Tour chumi in Stress wili 1. z'lang dusche, 2. vo irgendwelche Unterschriftesammler ufghalte wirde und 3. de Treffpunkt ned so eifach z'finde isch... Janu, mit 3 Minute Verspötig findis und si hend amel no ned agfange. D'Tour started im Seminario San Luis, wo di erst Religionsschuel vo Cuenca gsi isch und hüt vorallem Restis beherbergt. Denn gohts uf d'Türm vode Catedral de la Inmaculada Concepción, womer Fakte zu dere erfahred:
- 1885 sind d'Bauarbete i vollem Gang, wos es schwers Erdbebe git. Es isch ide Folg eifacher zum neu afange als ufruume und wiiterbaue
- D'Türm fehled immerna und werded au nie meh ergänzt werde. De Grund: D'Planig hät vorallem uf guets Ussehe und weniger uf Statik gachted. Wo d'Statue vode Santa Ana ufgsetzt worde isch, häts en grössere Riss geh und d'Arbete hend müese gstoppt werde. Jetz stoht di ganz Altstadt unter Denkmalschutz - e Ergänzig isch also nüme erlaubt 😂
- Erst sit de Papst 1985 sin Sege geh hät isch das di offiziell Kathedrale. "Fertig" isch si sit 1980
- Bi dem Papstbsuech sind 16'000 anstatt de adenkte 8'000 Lüüt ide Kathedrale gsi
- D'Kuppe sind blau zum d'Nöchi zum Himmel symbolisiere.
De negst Halt isch bimene Gebäude, wo als Partyhuus dient hät und dete häts für die wos denn übertribe hend tatsächlich s'erst WC vode ganze Stadt geh zum sich erliechtere 😂
Wiiter gohts zude alte Kathedrale, wo hüt als Museum im Iisatz isch. Für mich intressant: Vo do isch di ganz Stadtvermessig usgange und do hät mer au usegfunde, dass d'Erde kei perfekti Chugle isch. E Plakette überem Iigang seit wege dem, dass de Ort wichtiger isch als d'Pyramide vo Ägypte.
Zwüscheddure gits au viel Facts über Cuenca z'erfahre:
- Religion isch immerna wichtig und vorallem de heilig Geist isch es Thema
- D'Santa Ana (Grossmuetter vo Jesus) isch d'Schutzpatronin vode Stadt
- Gründig vo Cuenca isch am 12.04.1557 passiert. Das isch vor 466 Jahr und 3 Täg gsi. Und s'beste dezue: Ecuadorianer fiired ihri Fiirtäg ned gern unter de Wuche und so isch de Unabhängigkeitstag halt hüt Friitig anstatt scho am Ziistig s'grosse Thema. Us dem Grund wird eusi Tour au vo Livemusig vode Polizeimusig im Park begleited und es hät viel meh Märt umenand als normal :) Es paar Fakte, womer sus na über d'Stadt erfahred:
- De Hauptplatz isch öppe 5 Mal umbenennt worde. Vo Waffeplatz zu öpis anderem und wider zrugg biser jetz Parque Calderón heisst. Das isch en Typ, wo 5 Chrieg für Ecuador überlebt hät und 15 Täg nachem letste ade Folge vo Verwundige gstorbe isch
- Für d'Inka isch Cuenca nach Cusco di zweitwichtigst Stadt gsi wil si glaubt hend, dass e wichtigi Inka de Enkel vo Gott ghürote hät, wo do wohnt.
Zum Schluss vode Tour gömer zude einte Märthalle, womer Hornado empfohle überchömed. Wemer das essed, segemer nachher meh Cuencaner als de Panamahuet und das bedüted öpis 😉 Jede Fritig chömed es paar Fraue uf Cuenca für d'Tradition "Limpiada". Debi mached si komischs Züg mit Äst und Wasser und reiniged debi eusi Körper vor allem Schlechte. Ich probieres ned... Es paar us de Tour schlüssed sich nach de Tour zeme und probiered das empfohlene zarte Schweinefleisch und ja, es schmöckt guet und ich fühle mi sehr iiheimisch nachher ^^ Denn gnüssi mit de Kristie us Holland (vo wo au sus...?) e bitzli e tüüri heissi Schoggi mit bester Ussicht uf d'Kathedrale und de Hauptplatz. Nachher gangi schnell is Hostel go umpacke und meh Kleider fasse für de Usflug am Obig mit es paarne us de Tour. Eigentli sötti mal na Wösch versorge aber ha kei Ziit meh. S'Taxi bringt eus vier zum Ussichtspunkt Turi. Eusi Stadtfüehrerin hät eus dä für Sunneuntergang und Ussicht ide Nacht empfohle und ja, es isch wunderschön und mir hends super lustig. D'Polizeimusig isch au wider unterwegs und git ihres Können zum beste (ohni Note übrigens...). Schliessli strosst au na de Paul zu eus bevormer fürs Znacht und en Barbsuech wider id Stadt abe gönd und en lustige Obig zeme hend - muchas gracias :)Read more