Holá Bolivia

Zack da bini wider - guet acho in Bolivie. Zude Reis: zweimal hani en Fensterplatz bueched aber es höckled scho anderi Lüt dete. Au egal, ha kei Lust zum diskutiere. Defür isch de dritt Flug so schlecht bueched (keis Wunder wemer vo 00.35 - 04.00 unterwegs isch) dasi freii Sitzplatzwahl han ^^ Ja und au sus lauft fast alles perfekt. Nume z'Lima chumi schnell is schwitze wil de Durchsag dass s'Boarding jetz göffnet isch folgt au na "Sie müend e Maske mitbringe und vorwiise" folgt. Das hät d'Maria natürli ned gwüsst und ihri Maske im grosse Gepäck la. Also muesi na schnellschnell eini go pöstele. Dete meint de Verchäufer dasi easy chan mit Dollar zahle (obwohl Peru ihri eige Währig hät) aber dases kei Rückgeld git. Also zahli die 72 Cent mit 75 Cent - woner aber ned wett akzeptiere wils ecuadorianischi Dollar sind. Ich ha gmeint es segi s'gliche 🤷🏻‍♀️ Schliessli hät de Typ ide Warteschlange hinter mir Mitleid (oder kei Geduld ^^) und zahlt für mich. Danke :) Denn bringt mi de letst Shuttle zu dem Flugi, woni chan de Sitzplatz wähle. Ja und es churzes Nickerchen spöter simer scho im Landeaflug uf Santa Cruz. Das ganze Flughafezüg isch es bitz hektisch, wils verschiedeni Zettel wend gseh womer im Flugi usgfüllt hend und ich nie so genau weiss wele wenn und blabla. Au mitem Impfzertifikat nehmedses genau (wie befürchted) und ich chume namel schnell is schwitze. Schliessli klappeds aber und mis Gepäck warted zum Glück au scho :) Ich tuusche schnell mini übrige Dollar in Bolivianos um und mache mi uf Taxijagd - am Morge am füfi imene Land woni ned kenne. Das chan nume guet cho ^^ Es klapped und de Taxichauffeur warted sogar na, bismer im Hotel öpper d'Türe ufmacht. Die Dame isch es bitz überrascht über mich wil sie mini Reservation no gar ned gseh hät. Si schnappt sich churzerhand Bettzüg und macht s'Zimmer (woni erst abem Obig zahle) parat - muchas gracias! Zimli müed leggi mi schnell here und merke denn drü Stund spöter, dasi wohl doch zimli müed gsi bi ^^ Mini Tagesziel hüt: Wäsche, SIM-Charte organisiere und e Schnalle für min Reiserucksack sueche. Zerst bruchi aber es Brötli vom Beck, denn gohts los zude Wöscherei. Unterwegs wirdi vomene Local ufghalte, wo am liebste grad wür es Kafi go trinke. Nei danke, ich wimmlen ab... Ja und denn gangi mal in Richtig Stadt für e SIM-Charte. Was do sehr uffallt: jedes Quartier hät sis Thema. Im eine häts dutzendi Farmacie, im negste Isewahrehändler, denn Optiker, Nagelstudius, Kleiderläde und so wiiter ^^ Bim Netzabüter segeds mer dasi min Pass mues debi ha, woni aber im Hotel la han. Sehr geil. Also tschumpli alles zrugg... Unterwegs frogi mi aber na vo Lädeli zu Lädeli dure und finde tatsächlich e passendi Rucksackschnalle 💪 Mit vollem Mage bini es paar wenigi Stündli spöter wider im SIM-Lade und dasmal klappeds denn au - fast. Ich chan Social Media nutze aber s'richtige Internet goht ned. Anschiinend öpis mit Iischränkige vom Handy us. Zum das löse, gangi zum technische Support. Dä erklärt mer ganz viel uf Fachspanisch, probiert e Stund lang öpis und git denn resigniert uf. Wieso genau dases ned goht weissi immerna ned aber ja, isch halt so 🤷🏻‍♀️ Jetz gangi na e Salbi für mis Chnü go poste und denn gmüetlich uf de Zruggweg zude Wäscherei. Au es Znacht derf natürli ned fehle. D'Essensgwohnheite mit viel Ries, Härdöpfel und Poulet schiined do ähnlich z'si wie z'Ecuador. Super müed bequemi mi früeh is Bett :)
Wasi au feststelle a dem erste Tag: d'Lüt do reded (amel sicher bis jetzt) viel seltener Englisch als na z'Ecuador 😅Read more