Death Road y dos días más

Als Abschluss und eis vode Highlights in Bolivie stoht hüt - am Simon sim letste Tag - d'Todesstross a. Bis 2007 und de neue Strass isch das di einzig Verbindig vo La Paz is Amazonasgebiet gsi. Hüt wird si na vo es paarne Locals als Zuefahrtsstross und vo vielne Touriste als Abfahrt mitem Velo gnutzt. Ich fühle mich am Morge leider ned guet, wetts aber trotzdem probiere und trette dementsprechend de Weg is Office und vo dete mitem Minibus und de Velos ufem Dach zude Laguna Estrellani a. Dete fassemer eusi Schutzchleider und s'Bike. Di meiste montiered das alles motiviert, während ich wege doch einigermasse starcher Übelkeit mitem Gedanke spiele, das ganze abzbreche. Letst mal woni das ufem Huayna Potosí überleit han, isches nachher guet cho und so entscheidi mi au jetz, zum mal de erst Teil in Agriff neh und denn wiiterluege. Zum eus as Bike gwöhne startemer d'Fahrt uf 4'650 müM und bringed di erste 1'000 Höhemeter mit faszinierende Gebirge um eus ume uf de neue Stross hinter eus :) Es goht würklich nume abwärts und isch dementsprechend gmüetlich 😎 Währedem fahre vergissi au mini Übelkeit recht guet. Jetz heissts Velos wider uf s'Dach lade wil es chunnt en recht lange Teil wos wider liecht astiegt. Erst nachher gohts los uf de richtige Todesstross. Beidruckend schlängled sich die grössteteils einspurig Schotterstross während knapp 30 Kilometer regelmässig ganzi 2'800 wiiteri Höhemeter s'Tal abwärts. Churz vor Abfahrt ischmer namel richtig schlecht aber jetz gibi nüme uf... Nach churzem Agwöhne fühli mi recht wohl bi dere holprige Sach (amel sicher wohler als ufem Töff ^^), bi aber trotzdem sehr gern eini vode hinterste. So chönnti wenn au immer nötig ahalte und niemer stresst vo hinde :) Stückli für Stückli lömer d'Schwerchraft ihri Arbet mache und erfahred bi verschiedene Stops Gschichte über d'Abschnitt und Unfäll vo do. A einere Stell häts erst grad en Hangrutsch geh, dete chömed grad nume Fuessgänger und Velos dure... D'Stops sind bitter nötig wil s'permanente Bremse goht ganz schön id Finger und Handglenk und au ab und zue richtig chöne d'Landschaft gnüsse isch super :) Nach knappe zwei Stunde erreichemer s'Ziel und chönd eus alli stolzi Überlebendi vode Todesstross nenne. Dass bis 2007 de ganz Verchehr, also au Büs und Lastwäge, die Stross meh oder weniger heil überstande hend, isch hüt unvorstellbar... Während de Guide über di wiit meh als 3'000 tödlich verunglückte Autofahrer und 49 tödlich verunglückte Velofahrer brichted, verschwind ich hinterem Hüttli und erledige, was sich scho de ganz Tag akündet hät. Immerhin häts gwarted bis jetz 🤢 Dankeme Tablettli us de Tourapothek überstohni di churz Fahrt bis zum Zmittagplatz problemlos und chume dete anstatt Buffetesse e Schüssle Frücht über - danke :) Denn hämer Ziit zum im Pool bade und dusche, mir nutzeds aber lieber zum uf de Liege chille und de anderne zueluege :) Schliessli gohts uf di rund drüstündig Zruggfahrt im Büsli - wasi grössteteils ohni Übelkeit übersto. Bin denn aber sehr froh, womer zrugg im Hotel sind und ich chan is Bett ligge. Das mitem T-Shirt hinterlegge hät ned ganz klapped wils hüt ned gliefered worde sind. Mir nehmed drum s'Geld zrugg. Gesse hani de ganz Tag nüt und dementsprechend chli sind d'Energiereserve jetz au... Eigentlich isches en geniale Tag gsi mit super Landschafte undere coole Velofahrt aber das mit dem chrank si trüebt d'Sicht halt chli... Ich entscheide schliesslich, ned wie planed morn morge sondern en Tag spöter uf Cusco wiiterreise. Es bitzeli Ziit ha zum erhole schaded sicher ned. Dank vollem Iisatz vom Receptionist klapped das mit de Umbuechig denn tatsächlich au - danke :)

Ide Nacht gohts mir besser, defür verwütschts de Simon au na - war zu befürchten... Für ihn ischs aber na doofer, wil i wenige Stunde wird er im Flugzüg zrugg id Schwiiz hocke. Am vieri lüted de Wecker und es heisst leider Abschied neh. Schön isches gsi! 🥰 Bi gspannt, wies wird wider elei...
Es paar Stunde spöter weissis: ned so lustig. So halbe chrank imene Hotelzimmer gammle womer vorher s'zweite gsi isch, macht kei Spass...
Es goht mer grundsätzlich grad es bitz besser, drum waagi mi id Stadt und sueche en Buechlade. Fündig wirdi ned. Entweder sinds zue oder gar ned ume 🤷🏻‍♀️ Zrugg im Hotel chilli uf e Liege ade frische Luft und befasse mi mal es bitz mit Cusco und Social Media ^^ Währenddesse merki, dass de Buch wider dümmer tuet und ich han wider kei Appetit meh. Es langed na für en churze Usflug zum T-Shirtlade, wo jetz s'gwünschte Stuck endlich acho isch, bevor d'Stimmig endgültig kipped. Di restlich Gschicht vom Obig verzelli ned detailliert, es beinhalted aber es Telefon id Heimat (sorry für d'Störig zmitzt ide Nacht...) und en Bsuech ide Farmacía direkt nebedem Hotel. Dete chumi anderi Medis über und tatsächlich beruhigt sich alles und ich chan einigermasse guet schlofe :)

D'Nacht zeigt sich recht guet und am Morge hani sogar hunger und isse s'ganze Zmorge. Do hani ja scho fast (würkli nume fast) wider Energie. Es folgt e Ziit im Hotel umegammelnd, bevori mi überwinde zum miteme Minibus (d'Reception erklärt, wele dasi am beste söll neh vo dene tuusige) gohts in Richtig vomene Park, woni mer es ruhigs Plätzli zum frischi Luft gnüsse und Blog schriibe erhoffe. De Bus findi, de Park isch aber entweder ned zuegänglich oder sus gschlosse. Wieso au immer en Park gschlosse isch... Jetz merki wie wenig Energie dasi han und sueche mer drum di negst Seilbahn womi wegtechnisch uf Umwege aber energietechnisch effizienter a mis negste Ziel, de Busterminal bringt. Unterwegs pösteli öpis chlises zum esse und mache amene andere grüene Plätzli Halt für mini Plän vo vorher :) Schliessli merki, wieni immer energieloser wirde und gange wiiter zum Busterminal. Ich reserviere für morn de Bus uf Cusco namel neu und hoffe, dasi mi dasmal chan dra halte. Leider wends mer mitem Priis ned entgege cho, au weni scho mal voll zahlt han - janu... Joa und churzi Ziit spöter bini erschöpft zrugg im Hotel, legge mi uf de Terrasse here und nicke i :) Nachher währedem gammle und Peru recherchiere chumi tatsächlich hunger uf öpis rechts z'esse über und mache mi uf zum Italiener nebeddra für en Teller Pasta. Devo esse magi nume so en Drittel aber bin scho recht glücklich über das, vorallem wili mi au nachher na guet fühle. Zrugg im Hotel folgt e längeri Packaktion. Es isch mal Ziit, zum alles us- und wider ordentlich iirume. Jetz mit Souvenir wirds platztechnisch ned eifacher 🙈 Selbstverständlich bini erfolgriich und chan beruhight wider früeh aneligge :)Read more