Hola Peru y Cusco

D'Nacht isch unruhig, i gibe aber de Nervosität d'Schuld. Buchtechnisch fühli mi guet und das au no wo de Wecker schelled. Fertig packe, Taxi bstelle, Hostel in Cusco reserviere und ab die Post an Terminal! Usnahmswiis bini sogar mal z'früeh dra, das isch aber guet, so langeds na zum Snacks und es Zmorge organisiere :) Pünktlich 20 min nach de offizielle Abfahrtsziit startemer e theoretisch öppe 13 stündigi Busfahrt im no zimli leere Bus. Ich han widermal es guets Händli ide Sitzplatzwahl bewiese, chan nämli mini Lehne wider ned abela... Janu, hät ja grad na gnueg anderi freii Plätz :) I gnüsse di letste Blick uf La Paz abe, s'Chaos in El Alto und denn d'Sicht uf d'Berge und de Titicacasee. Nach 2.5 Stunde simer ade Grenze zu Peru und werded ufgfordered, eusi Frücht abzgeh. Hoffentli chömemer die zruggüber. Denn heissts usstiege und im Passbüro go ab- und wider amelde. Es wird i südamerikanischem Tempo gschaffed, also stömer recht lang ume. S'guete: mer chunnt in Kontakt mit de anderne Touris usem Bus und so ide Gruppe isch s'warte churzwiiliger. Wasmer no ned ahned: s'grosse Warte chunnt erst nachher zrugg im Bus. Anschiinend hät zerst grad de Verchehr, wo us Peru chunnt Vortritt, so dass mir namel einehalb Stunde müend warte bismer wiiter chönd - ups, das sind total gueti drü Stunde ade Grenze ^^ De weniger lustig Teil ade Sach isch, dass eusen Zmittaghalt jetz gstriche wird zum die einehalb Stunde wider irgendwie ufhole - zum Glück hani gester Obig und hüt morge na mini Snacks es bitzeli ufpoliert 🙈 De Kafihalt wo hett sölle am vieri passiere, loht uf sich warte bismer devo usgönd, dass au dä gstriche isch. Eigentlich chunnts ja ned drufa, wenn dasi achume aber han amel scho na gern e ungefähri Idee und ohni Internet und Google Maps isches schwer abzschätze. Bis am spötere Namittag beschäftigi mi mit es bitz Blog schriibe, useluege (ich entdecke Flamingos 🤗) und Podcast lose. Denn raffi mi sogar uf zum de E-Reader füreneh, mues aber feststelle daser kei Saft hät. Unlogisch, hanen doch gester na voll glade... So werded di letste vier Stunde nachem Sunneuntergang (wo dankenere Stund Ziitverschiebig gegenüber Bolivie jetz scho am halbi sechsi isch :/ ) sehr langwiirig. Zum schlofe bini z'wenig müed, jasse magi nüme, vom Podcast lose bruchi au mal e Pause und d'Sterne hani denn au mal gseh, au wenns wunderschön sind. Irgendwie goht d'Ziit ume und wieni öppe gschätzt han, simer churz nachem zähni, also nach 14 Stunde im Bus und ohni d'Möglichkeit zum Wasser und Ähnlichs nochefülle am Terminal in Cusco. Dete lönd sich d'Elisa us de französische Schwiiz und ich ines Taxi gheie und eus miteme Zwüschestop bimene Bancomat (ha bim ned existente Zmittaghalt au na kei peruanischi Sols chöne organisiere...) bi eusne jewiilige Hostels absetze. I bilde mer no gar kei Meinig zu mim, bin eifach froh dasi mini Nudelsuppe uf Vorrat debi han und no chan wärme und gnüsse, bevors ab in Masseschlag goht. Das hani fast vermisst 😂 Minere Gsundheit gohts hüt super, ha chöne esse wasi han wele und mi zu keim Ziitpunkt schlecht gfühlt :)

De erst Tag inere neue Stadt starti am liebste mitere Free Walking Tour. Ich verwache öppe mit de Sunne am sechsi und han dementsprechend na Ziit, zum umegammle, mitem Hostelbsitzer über Toure und so pläuderle und denn es Kafi sueche zum gmüetlich zmörgele bevor d'Tour started. Für s'eigne Zmorge bini no ned usgrüsted. Ide Stadt lauft scho einiges. Grund defür isch, dass am 24.6. (also i 13 Täg) s'Fiesta del Sol gfiired wird und das wird scho kompletti zwei Wuche im Vorus täglich gfiired, wils sus viel z'viel Lüt a eim Tag kanalisiert hetted. Anschiinened sind also au Peruaner guet im en Grund zum fiire finde 😂 Ich bin uf jede Fall perfekt pünktlich parat für d'Tour und folge em Guide ide chline Gruppe anen ruhige Platz. Dasmal gits leider ned so viel Fakte z'verzelle wil er redt so schnell, undütlich und abghackt, dasi selber nume en gfühlte Zehntel vode Informatione mitüberchume. Schad, aber chas geh. Uf jede Fall isch klar, dass Cusco d'Inkahauptstadt gsi isch und do alli Inkatrails herefüehred. Insgesamt gits 25'000 km Weg... Joa und denn weissi no, dass Peru sit 1824 unabhängig isch und zerst vo Mine, denn vom Fische und hüt hauptsächlich vom Tourismus lebt. Au na intressant isch, dass d'Sradt i wenige Jahre vo 50'000 und 500'000 Iwohner agwachse isch. Natürli chumi scho na anders es bitz mitüber aber hauptsächlich gnüssi di enge Strössli, Inkamuure, spanische Baute und feine Gschmäcker unterwegs. Uf engstem Ruum gits 13 Kathedrale z'beguetachte - ganz schön viel... Zum Abschluss stiigemer uf en Ussichtspunkt und kosted ufem Abeweg Ceviche. Us Ecuador kenni das als Fischsuppe, do isches aber ehner frische Fisch, wo übertriebe mit Zitrone und Zwieble gwürzt wird, was denn tatsächlich unerwarted fein isch :)
Nach de Tour schlenderi e Stund lang im Zickzack dur d'Strössli uf Nahrigssuechi und stelle am Schluss fest, dasi priistechnisch am gschiidste am Afang gesse hett. Ups, janu, wirds halt es bitz tüürer, isch immerna okey und super fein :) Nachher gangi uf Agency-Suechi zum mini negste Täg plane. Debi findi zerst e SIM-Charte miteme nette Verchäufer, womer denn grad au na en Kontakt für Toure git. Also besser gseit isches sini Familie und er lüted grad a. Ich mache so Züg ned gern am Telefon, isch doch viel eifacher vor Ort zum über alles rede aber ja, so kläremer das mitem Machu Picchu mal grob, si sött aber na Infos schicke. Währendi uf die warte, gangi für anderi Sache und meh Infos ine zuefälligi Agency und laufe dete erst öppe zwei Stunde spöter miteme volle Chopf und vielne Ideene wider use. Fix planed isch morn und de füftägig Salkantay Trek uf de Machu Picchu abem Mittwuch (hüt isch Sunntig). Sorry de andere Dame fürs ned beachte, hesch der mit de Infos z'viel Ziit lo 🤷🏻‍♀️ Mit dene Ideene und Plän freui mi jetz richtig uf di negste Täg und bi gspannt, obs mer überhaupt na go surfe langed bevori hei mues oder obs mer z'guet gfallt do. Nach jetzigem Ziitplan wirds scho fast knapp mit de denkte füf volle Täg am Strand - i wirdes gseh 🙈
Schliessli gits ufem Zruggweg bi Dämmerigstimmig es Stuck Torte und en Stop im Supermärt zum selber choche nachher. Ja und so verbringi de Rest vom Obig mit so ganz normale Alltagssache im Hostel und gange früeh go ligge. Merke di chline Energiereserve na und sött morn au einigermasse beziite ufsto :)
Trotz de schlechtere Tour muesi sege gfallts mer do recht guet. Es hät aber au sehr sehr viel Touris ume und isch dementsprechend sehr europäisch 🙈Baca lagi