stunning nature 🏜️

Noch emne entspannendä Tag am Pool isch’s für üs am Zistig dur dr „Joshua Tree National Park“ gange. D’Ussicht isch grandios gsi, Bäum in Hülle und Fülle, s’Kletterä es Abentüür, s’Picknick „lecker schmecker“. Dr Ihtritt in Park het sich alleweil glohnt. 😍

Nochme churze Zwüschestopp zur Übernachtig im Lake Havasu isch es direkt witter via Flagstaff AZ zum Grand Canyon gange. Was d’Ussicht am Zistig beihdruckend gsi isch, het sie üs am Mittwoch im Canyon sprachlos gmacht. Es Endi vu derä gigantischä Schlucht isch nid z‘gseh gsi, Felsformatione in unterschiedliche Farbe und e Tüüfi wo eim zruckträtte loh het.
Mier hen direkt vorem Iigang vum Park übernachtet, wodure mier am Dunnstigmorge früeh wieder innefahre und die restlich Route ahgo hen chönnte. E chlini Wanderig zum „Ooh Aah Point“ het nid dörfe fehle. An beidne Täg hemer en Fuessmarsch dur‘d Bäum und am Canyon entlang gmacht und sind diversä Tier begegnet - ca. 14 Reh, 5 Elch, etliche Vögel und 1 Eichörnli, 0 Schlange (thank god!)

Zur hüttige Übernachtig simmer witter nach Kayenta ins Gebiet „Monument Valley“ wo mier üs uf’s Ohr hauen und d’Ihdrück sacke lön. Good night from the desert ✨Read more